Kaka Inyalo Nyagori gi Kuyo

Dhano osechiwo paro mopogore opogore e wi wachni. Kata kamano, nitie moko kuom parogo ma ok kony. Kuom ranyisi, jomoko nyalo nyisi ni kik iywag kata kik inyis ni ikuyo e yo moro amora sama ng’at migeno otho. Jomoko to nyalo nyisi ni iywag kendo inyis kaka iwinjo e chunyi. Muma to konyowa bedo gi paro mowinjore ma kata jotim nonro mathoth me kindegi bende oyie.

Nitie ogendini moko ma neno ni joma chwo ok onego oywag sama ng’ato otho. Be nitie gimomiyo wiwa onego okuod gi ywak e nyim ji? Lakteche moko ma thiedho obwongo wacho ni ywak en achiel kuom yore mag nyiso ni ng’ato okuyo. Kendo bedo mokuyo nyalo konyi ahinya nyagruok gi lit ma bedoe sama ilalo ng’ato e tho. Kata kamano, ng’at ma temo mondo kik onyis ni okuyo nyalo mana medo hinyore owuon. Onge kamoro amora e Muma ma nyiso ni dichwo ma ywak nikech olalo ng’ate e tho ni en ng’at ma yomyom. Par ane ranyisi mar Yesu. Noywak e nyim ji ka ne osiepne ma Lazaro otho, kata obedo ni ne en gi nyalo mar chiere!—Johana 11:33-35.

Mirima bende jabetie e kinde ma kuyo nitie, to moloyo kapo ni ng’at ma nwahero ahinya e ma otho apoya. Nitie gik mang’eny ma nyalo miyo ng’at molalo ng’ate e tho obed gi mirima. Iye nyalo wang’ kapo ni ng’at momiyo luor owacho gimoro ma ok oparo kata mochuogo. Dichwo moro miluongo ni Mike ma a e piny South Africa wacho niya: “Wuonwa ne otho ka ajahigni 14 kende. Ka ne wan e liend wuonwa, jatend din mar Anglikan nowacho ni Nyasaye dwaro joma beyo, kendo ni ojakawoga joma beyo mapiyo.a Wachno nomiyo mirima omaka, nikech ne pod wadwaro wuonwa ahinya. Sani koro higni 63 osekalo to wachno pod litnaga ahinya.”

To nade kapo ni wachako paro ni wan e ma wamiyo gima kamano otimore? Sama ng’ato otho apoya, yot chako paro ni, ‘Datimo gimoro mondo gima kama kik timre.’ Kata nyalo bedo ni ne ichwanyori gi jalno kapok otho. Mano nyalo miyo imed mana keto ketho kuomi.

Kapo ni weche ma kamago chando chunyi kata ijabedo gi mirima kinde ka kinde, kik iling’ aling’a gi wechego e chunyi. Kar mano, wuo gi osiepni moro migeno ma biro chikoni ite, kendo konyi neno ni kaka iwinjo e chunyino, e kaka jomamoko bende molalo jogi e tho winjoga. Muma paronwa niya: “Osiep ng’ato ohere ndalo duto; kendo omin ng’ato nonyuole mondo okonye chieng’ chandruok.”—Ngeche 17:17.

Osiep maber ahinya ma ng’at mokuyo nyalo bedogo en Jachuechwa Jehova Nyasaye. Nyise kaka iwinjo e chunyi nikech ‘odewi.’ (1 Petro 5:7) E wi mano, Jehova singo ni jogo duto ma nyise gima nie chunygi obiro miyogi “kuwe ma loyo ng’eyo duto.” (Jo-Filipi 4:6, 7) Bende, we mondo hoch ma Nyasaye chiwo kokalo kuom Wachne ma en Muma okonyi nyagruok. Ndik piny ndiko mopogore opogore ma nyalo hoyo chunyi. (Ne sanduk manie sulani.) Inyalo temo mako moko kuom weche manie ndikogo e wiyi. Ka iparo matut kuom ndikogo to moloyo seche mag otieno sama koro iyudo ka chunyi lit kendo nindo otamore teri, ginyalo konyi.—Isaiah 57:15.

Nyocha dichwo ma jahigni 40 ma wabiro luongo ni Jack, nolalo jaode e tho nikech tuwo mar kansa. Jack wacho ni nitie kinde ma ojawinjoga e chunye ni ong’ichno. Kata kamano, lamo osekonye ahinya. Owacho kama: “Sama asewuoyo gi Jehova, ok awinjga ka an kenda. Kinde ka kinde ajachiewga gotieno kendo bang’ mano ayudoga ka nindo orumo e wang’a. Bang’ ka asesomo kendo paro matut kuom Ndiko ma hoya, kendo nyiso Nyasaye e lamo kaka awinjo e chunya, awinjoga ka chunya okuwe. Kendo ajawinjoga ka kuwe moro makende konya bedo gi paro mokuwe ma achak nindo kendo.”

Min nyako moro miluongo ni Vanessa ne otho bang’ bedo matuwo. Vanessa bende oseneno kaka lamo nigi teko mang’eny. Owacho kama: “Kinde ma ne awinjo ka chunya lit ahinya, ne aluongoga nying Nyasaye kae to achako ywak malit. Jehova ne winjoga lamoga, kendo nomiya teko mar nyagruok.”

Joma chiwoga hoch ne joma olalo joggi e tho, wacho ni moko kuom gik manyalo konyo joma nigi kuyo en ka gichiwo thuologi mondo gikony jomoko. Timo kamano nyalo konyogi nyagore gi kuyo kendo bedo gi mor. (Tich Joote 20:35) Thoth Jokristo moselalo joggi e tho oseyudo ni konyo jomoko osehoyo chunygi ahinya.—2 Jo-Korintho 1:3, 4.