Pim Gik Miyiego e Ratil

BE IN Jakristo? Ka en kamano, to kare in achiel kuom ji mokalo bilion ariyo e piny mangima ma wacho ni gin jolup Kristo. Sani, nitie dinde mang’eny ma luongore ni Jokristo, kata kamano, gipogore nikech chike ma tayogi kod paro mopogore opogore ma gin-go. Samoro nyalo bedo ni yie ma in-go opogore gi ma jomamoko ma be luongore ni Jokristo nigo. Be mano onego ochand pachi? Ee, mano onego ochand pachi ka kuom adier diher bedo Jakristo ma Muma wuoye.

Jolup Yesu Kristo machon nong’ere gi nying mar “Jokristo.” (Tich Joote 11:26) Ne onge tiende luongogi gi nyinge mamoko, nikech ne nitie mana din achiel kende mar Jokristo. Jokristo duto ne luwo puonj mag Yesu Kristo ma e jal ma nochako din mar Jokristo. To nade kanisa mileme? Be kanisau luwo gik ma Kristo nopuonjo kod gik ma Jokristo mokwongo noyiego? Ere kaka inyalo bedo gadier ni kanisau timo kamano? Yo achiel kende ma nyalo konyi en pimo puonj mag kanisau e ratil kitiyo gi Muma.

Par wachni: Yesu Kristo nomiyo Ndiko luor kendo nong’eyo ni Ndikogo ne gin Wach Nyasaye. Ne ok oyie gi joma ne puonjo puonj mag dhano kar puonjo Wach Nyasaye. (Mariko 7:9-13) Omiyo, wanyalo wacho ni gik ma jolup Yesu madier oyiego nyaka luwre gi puonj mag Muma. Ka en kamano, kare Jakristo ka Jakristo onego openjre niya, ‘Be gik mipuonjo e kanisawa isiro gi Muma?’ Mondo iyud dwoko mar penjono, onego ipim gik ma kanisa mileme puonjo kod gik ma Muma puonjo.

Yesu nowacho ni yo ma walemogo onego otenre kuom adiera, to adierano yudore mana e Muma. (Johana 4:24; 17:17) Jaote Paulo nowacho ni warruok marwa otenore kuom ‘bedo gi ng’eyo malong’o chuth e wi adiera.’ (1 Timotheo 2:4) Omiyo, gigo ma wayiego nyaka tenre kuom ng’eyo malong’o e wi Muma. To mano adier, nikech gik ma wayiego nyalo miyo wayud ngima kata kik wayud!

KAKA WANYALO PIMO YIE MARWA E RATIL KA WATIYO GI MUMA

Som penjo auchiel moket e bwo sulani kod dwoko ma Muma chiwo. Som ndiko moket kendo ipar matut kuom dwoko mochiw. Kae to ipenjri kama, ‘Be gik ma Muma puonjogi e ma ipuonjo e kanisawa?’

Penjo machuokgi nyalo konyi pimo puonj mag kanisau kod gik ma Muma puonjo. Be diher nono puonj mamoko ma ok oket e sulani? Joneno mag Jehova nyalo konyi mondo ing’e puonj ma yudore e Muma. Donge inyalo kwayo achiel kuomgi mondo opuonji Muma nono ma onge chudo? Kata inyalo dhi e websait marwa mar jw.org/luo.

1 PENJO: Nyasaye en ng’a?

DWOKO: En Jehova ma Wuon Yesu. En e Nyasaye ma nyaka nene kendo Jachuech mar gik moko duto.

GIMA MUMA WACHO:

“Kinde duto wagoyo erokamano ne Nyasaye ma Wuon Ruodhwa Yesu Kristo sama walamonu.”—Jo-Kolosai 1:3.

“In Jehova Nyasachwa, in e ma iwinjori yudo duong’, gi luor, kod teko nikech ne ichueyo gik moko duto.” —Fweny 4:11.

Ne bende Jo-Rumi 10:13; 1 Timotheo 1:17.

2 PENJO: Yesu Kristo en ng’a?

DWOKO: Yesu en Wuod Nyasaye makayo. Ne ochue Yesu, omiyo en gi chakruokne. Yesu winjo Nyasaye kendo oluwo chikene.

GIMA MUMA WACHO:

“Wuora duong’ moloya.”—Johana 14:28.

“[Yesu] en kido mineno mar Nyasaye ma ok ne, en e jal makayo kuom chuech duto.”—Jo-Kolosai 1:15.

Ne bende Mathayo 26:39; 1 Jo-Korintho 15:28.

3 PENJO: Roho maler en ang’o?

DWOKO: Roho maler en teko ma Nyasaye tiyogo e chopo dwache. Ok en ng’ato. Roho maler nyalo pong’o ng’ato kendo miye teko.

GIMA MUMA WACHO:

“Sama Elizabeth nowinjo ka Maria mose, nyathi ma ne ni ei Elizabeth notugo, kendo roho maler nopong’o Elizabeth.”—Luka 1:41.

“Ubiro yudo teko ka roho maler obiro kuomu.”—Tich Joote 1:8.

Ne bende Chakruok 1:2; Tich Joote 2:1-4; 10:38.

4 PENJO: Pinyruodh Nyasaye en ang’o?

DWOKO: Pinyruodh Nyasaye en sirkal manie polo. Yesu e Ruoth mar Pinyruodhno. Machiegnini, Pinyruodhno biro miyo dwaro mar Nyasaye otimre kuonde duto e piny.

GIMA MUMA WACHO:

“Malaika mar abiriyo nogoyo turmbetane. Kendo dwol moko ma kok matek ne owinjore e polo ka wacho niya: ‘Loch mar Pinyruodh piny koro osebedo mar Ruodhwa kod mar Kristone, kendo obiro locho ka en ruoth mochwere nyaka chieng’.’”—Fweny 11:15.

Ne bende Daniel 2:44; Mathayo 6:9, 10.

5 PENJO: Be joma beyo duto dhi e polo?

DWOKO: Ooyo. Mana joma nok miluongo ni “kueth matin” kendo ma Nyasaye oyiero e ma dhi e polo. Gibiro locho gi Yesu kaka ruodhi e wi dhano.

GIMA MUMA WACHO:

“Un kueth matin, kik ubed maluor nimar Wuonu oseyie miyou Pinyruoth.”—Luka 12:32.

“Ginibed jodolo mag Nyasaye kod mag Kristo, kendo giniloch kaka ruodhi kanyachiel kode.”—Fweny 20:6.

Ne bende Fweny 14:1, 3.

6 PENJO: Nyasaye ochano timo ang’o gi pinywani kod dhano manie iye?

DWOKO: E bwo loch mar Nyasaye, piny biro bedo paradiso, kendo dhano makare biro dakie nyaka chieng’ ka gin gi ngima maber kod kue mosiko.

GIMA MUMA WACHO:

“Jo mamuol ginicham piny; kendo ginimor moloyo kuom kwe mang’eny.”—Zaburi 37:10, 11.

“Obiro yweyo pi wang’ duto oa e wengegi, mi tho ok nobedie kendo, kata kuyo, kata nduru, kata rem ok nobedie kendo. Gik machon osekadho.”—Fweny 21:3, 4.

Ne bende Zaburi 37:29; 2 Petro 3:13.