Kaka Inyalo Chako Somo Muma

En yo mane minyalo tiyogo e somo Muma mondo iyud ber moloyo? Ne ane gik moko abich ma ji mang’eny osetimo ma giyudo ber kuom somo Muma.

Bed kama okuwe. Tem manyo kama okuwe. Bed mabor gi gik ma nyalo gali mondo keto pachi e gima isomo obed mayot. Bed kama nitie ler moromo kendo kama yamo kuthoe maber.

Bed gi paro mowinjore. Muma owuok kuom wuonwa manie polo, omiyo ibiro yudo ber moloyo sama isome ka in gi paro machal gi mar nyathi moikore yudo puonj koa kuom janyuolne mohere. Ka in gi paro ma ok kare e wi weche manie Muma, ket parogo tenge mondo iyie Nyasaye opuonji.—Zaburi 25:4.

Lem kapok ichako somo Muma. Muma oting’o pach Nyasaye, mano e momiyo dwarore ni Nyasaye okonywa mondo wawinj tiend weche manie iye. Nyasaye singo ni obiro chiwo “roho maler e okang’ malach moloyo ne joma kwaye.” (Luka 11:13) Roho maler nyalo konyi ng’eyo kaka Nyasaye paro. Bang’ kinde, roho maler biro yawo pachi mondo iwinj tiend “gik matut mag Nyasaye.”—1 Jo-Korintho 2:10.

Tem winjo tiend gima isomo. Kik isom asoma nikech idwaro tieko kama isomono. Tem paro matut gik ma isomo. Penjri penjo machalo kaka magi: ‘Ng’at ma Muma wuoyo kuome kama asomoni nigi kido mage ma beyo ma nyalo konya? Ere kaka anyalo tiyo gi wach ma asomoni e ngimana?

Bed gi gimoro midwaro chopo sama isomo Muma. Mondo iyud ber mar somo Muma, ikri mar puonjori gimoro ma biro konyi e ngimani. Kuom ranyisi, inyalo dwaro ng’eyo Nyasaye e yo matut, inyalo dwaro bedo gi kido mabeyo, kata ng’eyo kaka inyalo bedo dichwo maber kata dhako maber. Yier kuonde moko e Muma ma biro konyi chopo wechego.a

Yore abichgi biro konyi chako somo Muma. Kata kamano, ang’o minyalo timo mondo imed hero somo Muma? Sula maluwo mae nyisowa yore ma nyalo konyowa timo kamano.