Bedo Osiep Maber Sama Osiep Chiegni Kethore

OSIEPE mabeyo gin joma igeno ahinya kendo bedo gi osiepe ma kamago ok en gima biro abira kende. Ka po ni osiep manie kindu chiegni kethore, inyalo timo ang’o mondo osiepuno kik kethre? Nono ranyisi mag jomoko miwuoyo kuomgi e Muma ma ne gin osiepe nyalo konyowa, nikech gin bende osiep ma ne ni e kindgi ne chiegni kethore.

SAMA OSIEPNI OTIMO RICHO

Daudi ne en jakwath kendo ruoth, omiyo ne en gi osiepe mang’eny ahinya. Achiel kuom osiepenego ne en Jonathan. (1 Sa. 18:1) Kata kamano, Daudi ne nigi osiepe mamoko mang’eny, kaka janabi Nathan. Muma ok nyiswa ni osiep ma ne nie kindgi nochakore karang’o. Nitie kinde ma Daudi nowuoyo gi Nathan kopimone wach moro kaka ng’ato nyalo wuoyo gi osiepne mogeno. Daudi ne gombo gero ne Jehova ot. Nyaka bed ni Daudi nogeno paro ma Nathan ne dhi ng’adone nikech nong’eyo ni Nathan ne nigi roho mar Jehova kendo ne en osiepne mogene.—2 Sa. 7:2, 3.

Kata kamano, gimoro notimore ma ne nyalo miyo osiep ma ne ni e kindgi okethre. Ruoth Daudi noterore gi Bathsheba kae to bang’e nonego chuore ma Uria. (2 Sa. 11:2-21) Kuom higni mang’eny, Daudi nosebedo komakore gi chike Jehova kendo nohero bura makare. To e ma notimo richo maduong’ kama! Ang’o momiyo ruoth maber kamano notimo richono? Dibed ni nokiya rach ma ne nyalo betie nikech tim marachno? Dibed ni noparo ni nonyalo pando richono e wang’ Nyasaye?

Nathan ne dhi timo nang’o? Be nodhi ling’ aling’a korito mondo ng’at machielo e ma odhi openj ruoth wachno? Nitie joma nong’eyo ni Daudi e ma nochano mondo oneg Uria. Kuom mano, be nitie gimomiyo Nathan nyaka ne donjre e wach ma ne nyalo ketho osiep ma ne nie kinde gi Daudi? Wuoyo kuom wachno ne nyalo miyo Nathan olal kata mana ngimane. Nego Nathan ne ok en gima lich, nikech noyudo Daudi osenego kata mana Uria ma ne onge ketho moro amora.

Kata kamano, Nathan ne wuoyo e lo Nyasaye. Janabino nong’eyo maber ni ka oling’ gi wachno, to osiep manie kinde gi Daudi ne dhi kethore, to chunye bende ne dhi chande. Osiepne ma Daudi notimo gima ok mor Jehova. Ne dwarore ni okony ruoth mondo obed gi winjruok maber gi Jehova kendo. Mano e kama Daudi koro ne dwaree osiep madier mondo okonye. Nathan ne en osiep ma kamano. Nathan nowuoyo gi Daudi kotiyo gi ranyisi ma ne nyalo mulo chunye, nikech Daudi nosegabedo jakwath. Nochiwo siem mowuok kuom Nyasaye e yo ma Daudi ne nyalo nenogo pek mar richone mi okaw okang’ mowinjore.—2 Sa. 12:1-14.

Inyalo timo nang’o ka osiepni moro migeno otimo richo mapek ahinya? Samoro inyalo paro ni kiwachone richoneno, to osiep manie kindu biro kethore. Kata ni ka inyiso jodongo richo motimo mondo gikonye, to mano nyalo nyiso ni indhoge. Ibiro timo nang’o?

Gianni, ma ne osewuo kuome e chak sulani wacho kama: “Nafwenyo ni gimoro rach. Maurizio ne ok ni thuolo koda kaka pile. Nang’ado mar penje gima ne rach kata obedo ni timo kamano ne tekna ahinya. Naparora e chunya ni, ‘En ang’o mokiya ma eka adwa dhi nyise? Samoro onyalo wuok koda mager! ’ Ka naparo adiera ma ne wasepunjore nyaka chop kindeno, nang’ado mar dhi wuoyo kode. Maurizio bende nosegawuoyo koda kinde moro ma ne dwarore ni okonya. Ne ok adwar ni osiep manie kindwa orum, to bende nadwaro konye nikech nadewe.”

Maurizio wacho kama: “Gianni nowuoyo koda e yo moriere, kendo ne ok omung’a wach moro amora. Nang’eyo ni gik maricho ma ne yuda, ne yuda nikech yiero marach ma natimo, to ok nikech osiepna ma Gianni kata Jehova. Omiyo, ne ayie gi kum ma nomiya kendo bang’ kinde, ne abedo gi winjruok maber gi Jehova kendo.”

SAMA OSIEPNI NI E CHANDRUOK

Daudi ne nigi osiepe mamoko ma ne okonye ahinya e kinde ma ne en e chandruok. Achiel kuom osiepenego ne en Hushai, ma Muma wacho ni ne en “osiep ruoth” Daudi. (2 Sa. 16:16; 1 We. 27:33) Nyalo bedo ni ne en achiel kuom joma ne tiyo e od ruoth, kendo ne en osiep Daudi ma ngita gi del. Nenore ni nong’eyo weche maling’ling’ mag ruoth.

Ka ne wuod Daudi ma Absalom okawo loch gi thuon, thoth Jo-Israel noriwe lwedo, Hushai to ne ok otimo kamano. Ka ne Daudi ringo nikech Absalom, Hushai nodhi ire. Daudi ne owinjo malit ahinya e chunye ni wuode owuon kod ng’at ma nogeno ahinya noriwore mondhoge. Kata kamano, Hushai to nomakore gi Daudi kendo noketo ngimane kama tek ka noyie timo gima ne dhi ketho tim andhoga mar Absalom. Hushai ne ok otimo kamano mana nikech notiyoga e od ruoth. Notimo kamano nikech ne en osiep madier.—2 Sa. 15:13-17, 32-37; 16:15–17:16.

En gima ber neno kaka hera manie kind owete gi nyimine en hera ma ok dew ni ng’ato nigi migawo mane e kanyakla. Kaluwore gi gik ma gitimo, chal mana ka gima ginyiso jowetegi ni, “In osiepna nikech ageni ahinya, to ok nikech ochuna ni nyaka abed osiepni.”

Mano e gima owadwa moro miluongo ni Federico noneno. Osiepne miluongo ni Antonio nokonye ahinya e kinde ma weche ne tek e ngimane. Federico wacho niya: “Ka ne Antonio obiro e kanyaklawa, ne wabedo osiepe mati mata. Waduto ne wan jokony-tich, kendo ne wahero timo gik moko kanyachiel. Bang’ kinde matin, ne okete jaduong’-kanyakla. Mopogore gi bedo osiepna, noketonaga ranyisi maber e weche Nyasaye.” Kinde moro, Federico notimo richo moro. Nomanyo kony kuom jodongo, kata kamano, ne ok odhi nyime bedo painia kata jakony-tich. Antonio notimo nang’o?

Federico wacho kama: “Nanyalo fwenyo ni Antonio ne ong’eyo lit ma ne an-go. Notimo kar monyalo mondo okonya kik abed gi kuyo mang’eny. Nikech nodewa ahinya kendo nodwaro ni abed gi winjruok maber gi Jehova kendo, ne ok ojwang’a. Nojiwa ni mondo atem atema kendo kik chunya tho.” Antonio wacho niya: “Najakawo thuolo mondo awuo gi Federico. Nadwaroga ni obed thuolo wuoyo koda e wi gimoro amora ma ne chande, moriwo nyaka lit ma nowinjo e chunye.” Gima ber en ni bang’ kinde, Federico nobedo Jakristo motegno kendo, ma okete painia kod jakony-tich. Antonio tieko ka wacho kama: “Kata obedo ni sani wan e kanyakla mopogore opogore, pod wan osiepe ma pata gi dhoot.”

BE IBIRO NENO NI OSIEPNI OJWANG’I?

Inyalo winjo nade ka osiepni ojwang’i sama onego bed ni okonyie moloyo? Onge gima lit maloyo mano. Be inyalo ng’wonone? Be osiep manie kindu nyalo bedo motegno mana kaka ne en chon?

Par ane gima notimore ne Yesu e odiechieng’ ma ne onegee. Nosebedo gi jootene kuom kinde malach kendo ne giherore ahinya. Yesu ne ni kare luongogi ni osiepene. (Joh. 15:15) Kata kamano, ang’o ma notimore ka ne omak Yesu? Jootego nong’wel nono. Noyudo Petro osekuong’ore ni ne ok odhi jwang’o Ruodhe kata matin, to e ma Petro achiel achielno notwo dhoge e otienono kowacho ni ok ong’eyo Yesu!—Mat. 26:31-33, 56, 69-75.

Yesu nong’eyo ni nodhi romo gi tembe ka en kende. Kata kamano, pod nowinjo malit ka ne osiepenego ojwang’e. To ka ne osechiere moromo gi jootego, mbaka ma nogoyo kodgi ok nyis kata matin ni iye nowang’ ni nomakonegi sadha kata ni noywago ang’e ni ne gin osiepe ma ok nyal gen. Yesu ne ong’eyo ni onge tiende kwano ne jootego ketho matindo tindo ma ne gitimo moriwo nyaka kaka ne gijwang’e e otieno ma nomakee.

Kar mano, Yesu nojiwo Petro kod joote mamokogo duto. Nonyiso ni pod ogenogi ka ne omiyogi tich maduong’ ahinya mar puonjo ma ne idhi tim e piny ma ngima. Yesu ne pod neno jootego kaka osiepene. Wi jootego ne ok owil gi hera ma Yesu noherogigo. Ne gidhi temo matek mondo kik gichak gijwang’ Ruodhgi kendo. To adier, ne gitimo tich ma Yesu nomiyogi e yo maber ahinya.—Tich 1:8; Kol. 1:23.

Nyaminwa moro miluongo ni Elvira paro maler ahinya gik ma notimore ka ne ochwanyo osiepne mogeno miluongo ni Giuliana. Elvira wacho kama: “Ka ne onyisa ni nowinjo malit nikech gima natimo, nawinjo marach. Ne en kare ka ne iye owang’. Kata kamano, gima nomora ahinya en ni nodewa kendo chunye ne chandore ni gima natimono ne nyalo kelona hinyruok. Gima apwoyego kinde duto en ni ne ok oketo pache kuom gima rach ma natimone, kar mano, gima ne chande ahinya ne en kaka gino ne dhi hinya an awuon. Agone Jehova erokamano ni an gi osiep ma dewa ahinya.”

Kuom mano, osiep madier onego otim nang’o sama weche tek? Onego obed osiep moikore wuoyo gi nyawadgi e yo mang’won kendo ma ok pand wach moro amora ka mano dwarore. Ng’at ma kamano biro chalo gi Nathan gi Hushai ma nomakore gi osiepgi kata e kinde ma weche ne tek, kendo obiro chalo gi Yesu ma ne oikore ng’wono ne osiepene. Be in osiep machalo kamano?