Gik Mosingi ma Biro Timore
Wach maber mar Pinyruodh Nyasaye ilando e piny mangima mana kaka Yesu ne okoro. (Mathayo 24:14) Bug Daniel ma yudore e Muma nyisowa ni Pinyruodhno en sirkal mar Nyasaye. Sula mar 2 e bugno nigi weche mokor ma nyiso kaka sirkande madongo mag dhano ne dhi luwore kochakore gi loch Babilon nyaka e kindewagi. Kwan matindo 44 nokoro kama:
“Nyasaye manie polo nochung piny ruoth moro ma ok norum nyaka chieng’, onge oganda moro ma nobedi gi loch kuom piny ruodhno; to enong’iny pinje ruodhigi duto, mi notiekgi, kendo nobedie nyaka chieng’.”
Ndikono kod mamoko ma ni e Muma wacho ni Pinyruodh Nyasaye biro tieko loje mag dhano kae to okelo ngima maber ne dhano e piny. Ngima biro chalo nade e bwo Pinyruodh Nyasaye? Ne ane moko kuom gik mosingi ma chiegni timore.
LWENY OK BI BETIE KENDO
Zaburi 46:9: ‘[Nyasaye] miyo lwenje rumo nyaka giko piny; oturo atum, kendo ong’ado tong’ diere; owang’o gache lweny e mach.’
Parie kaka piny dikoro chalo ka dine bed ni pesa ma itiyogo e loso gik lwenje dikoro itiyogo e loso gik ma konyo ji! Singono biro timore mana e bwo Pinyruodh Nyasaye.
TUOCHE BIRO RUMO
Isaiah 33:24: “Japiny ok nowachi, Atuwo.”
Parie kaka ngima nyalo chalo ka koro onge ng’ama nigi tuo mar adundo, kansa, malaria, kod tuoche mamoko. Osiptende gi yedhe koro ok bi dwarore. Mano e ngima morito joma biro dak nyaka chieng’ e piny.
CHIEMO NOBED MODHURO
Zaburi 72:16: “[Cham] nobedi mang’eny e piny e wi gode madongo.”
Chiemo ma romo ji duto biro nyak e piny. Kech kod tuoche ma mako ji nikech kech ok nobedie kendo.
REM, KUYO, KOD THO OK NOBEDIE KENDO
Fweny 21:4: “[Nyasaye biro] yweyo pi wang’ duto oa e wengegi, mi tho ok nobedie kendo, kata kuyo, kata nduru, kata rem ok nobedie kendo. Gik machon osekadho.”
Mano nyiso ni ji biro dak e ngima maber nyaka chieng’ e paradiso e piny! Mano e gima Jehova Nyasachwa ma jahera osingonwa.
“ENOTIM GIMA NE ACHANO”
Be gik mosinggo gin mana lek? Kata obedo ni ji mathoth nyalo wacho ni ngima ma Nyasaye osingonwa en ngima ma ng’ato ang’ata gombo, pod gineno ni ngima ma kamano ok nyalre. Mano ok bwogwa nikech onge ng’ato ang’ata ma osedak e ngima ma kamano ma nyalo pimonwa kaka ochalo.
Richo kod tho osemiyo dhano oyudo rem kod chandruoge mathoth kuom higni mang’eny ma miyo gineno ni mano e ngima mapile. To mano opogore ahinya gi ngima ma Jehova Nyasaye ma ne ochueyowa ne dwaro ni dhano odagie.
Nikech Nyasaye dwaro ni wabed gadier chuth ni gik mosingo biro timore, onyisowa kama: “Wach mawuok e dhoga . . . ok noduog ira kapok otiyo tije, to enotim gima ne achano, mi ochop ote mane aoree.”—Isaiah 55:11, The Bible in Luo, 1976.
Muma wacho ni Jehova en Nyasaye “ma ok nyal riambo.” (Tito 1:2) To nikech osingo ni gik mabeyogi biro mana timore e kinde ma biro, nyalo bedo maber ka wapenjore niya: Be en gima nyalore mondo ji odag nyaka chieng’ e Paradiso e piny? Ang’o ma nyaka watim mondo wayud gik ma Nyasaye osingo? Ibiro yudo dwoko mag penjogo kaka imedo somo gasedni.