Sandug Penjo

◼ Wanyalo timo ang’o mondo warit Od Romo e yo maber?

Nikech wadak e ndalo marach, dwarore ni watim gik moko e yo mariek mondo warit Od Romo e yo maber. Mana kaka watemoga ahinya mondo utewa olor kendo orit e yo maber, e kaka onego watim e Od Romo. Jodong-kanyakla onego one ni Od Romo orit maber. Ma en gima dwarore ahinya, nikech wayudo ripode mang’eny mawuok e alwora mopogore opogore manyiso ni ituro Ute Romo kendo ikwalo gik moko e iye.

Okang’ mokwongo monego okaw e rito Od Romo en neno ni iloro dhoudi duto, rangeye, kod dirisni, bang’ tiyo kode. Onego oyier owete minyalo gen kendo ma kawo migepegi mapek mondo one ni kinde duto bang’ ka oseti gi Od Romo to ilore maber. Onego gitim kamano kata bang’ tiyo kode e weche mamoko mopogore gi chokruoge mag kanyakla, kaka arus kata timo ler.

Kapo ni Od Romo nigi kuonde ma ichungoe geche, en gima ber ka omok taya man kuondego e sa mowinjore. Mano biro gayo joma nyalo kwelo e geche owete gi nyiminego kata monjogi sama giwuok e Od Romo. Kanyakla moko oseneno ni nyalo bedo maber ka gitimo chenro mondo owete ma jorwak welo owilre e rito kuonde ma ichungoe geche sama chokruok dhi nyime, mondo gigeng’ joma nyalo kwalo kata ketho gik moko kanyo.

Kanyakla moko oseyudo ni owinjore gilor dhoudi mag Od Romo kata mana e seche ma chokruok dhi nyime. Kuonde ma weche chalie kamano ber ka jorwak welo bet e dhoot kinde duto mondo ginon adimba jogo duto ma donjo e Od Romo. Buch jodongo onego one ni gin okenge mage ma gibiro kawo kaluwore gi chike ma sirkal oketo kuom wach rito kuonde ma ji chokoree. Ka chenro ma kamono nitie, onego oland ne kanyakla ni dhoudi mag Od Romo ibiroga lor sama chokruoge dhi nyime.

Wadwaro ni owetewa kaachiel gi joma nyien mabiro e chokruoge obed gadier ni gichokore kama orit maber. Wadwaro bende ni Utewa mag Romo orit maber mondo kik tur kata kwal gik moko e igi. Omiyo jodong-kanyakla duto onego onon chal mar alworagi, kae to gitim chenro madwarore kuom wach rito Od Romo kaachiel gi jogo duto ma biro e chokruoge.