Bedo gi Chuny mar Chiwruok Kelo Gweth
1. Daudi gi Nehemia ne onyiso nade chuny mar chiwruok?
1 Kane Goliath thiano jolweny mag Jo-Israel, jalweny moro amora ne nyalo chiwore mondo oked kode. Kata kamano, wuowi ma jakwath ma bende ne podi ok otiegi kaka jalweny ema ne ochiwore. (1 Sam. 17:32) Kinde ma gero ohinga mag Jerusalem ne otamo Jo-Yahudi ma ne osegony mondo odhi otim kamano, jalos divai ne ruodh Persia ema ne ochiwore ma oweyo tichne modhial ei od ruoth modhi Jerusalem mondo ochan tij gedono. (Neh. 2:5) Jehova ne ogwedho ji ariyogi, tiendeni Daudi kod Nehemia, kuom chuny ma ne ginyiso mar chiwruok.—1 Sam. 17:45, 50; Neh. 6:15, 16.
2. Ang’o momiyo Jokristo onego obed gi chuny mar chiwruok?
2 Chuny mar chiwruok tin ahinya e piny kindegi. E “ndalo mag giko” ma wadakiegi, ji odak e ngima mopong’ gi dich mang’eny, kendo thoth ji gin “jo moherore giwegi.” (2 Timo. 3:1, 2) Yot mondo ng’ato obed modich ahinya gi gik ma moro chunye en owuon ma mone neno kata yudo thuolo mang’eny manitie monyalo tiyogo e chiwruok mondo okony jomoko ka mano dwarore. Kata kamano, wan kaka Jokristo, wagombo mondo waluw ranyisi ma Yesu ne oketo mar kawo okang’ mokwongo e konyo jomoko. (Joha. 5:5-9; 13:12-15; 1 Pet. 2:21) Wanyalo nyiso nade ni wan gi chuny mar chiwruok, kendo gin gweth mage ma wabiro yudo?
3. Bedo gi chuny mar chiwruok konyo nade e chokruoge mag kanyakla?
3 Chiwruok Ne Owetewa: Wanyalo chiwo “mich moro mar chuny” ne jomoko ka waikore mar chiwo paro, seche ma wan ei romo mag kanyakla ka timo kamano dwarore. (Rumi 1:11) Chiwo paro ei kanyakla en gima miyo Jehova duong’, kendo mano medo jiwo adiera e pachwa koda chunywa, kendo miyo romo mag kanyakla bedo gi mor. (Zab. 26:12) Bende wanyalo chiwore mondo wagol twak ei Skul mar Tij Nyasaye kapo ni ng’at ma ne omi twagno ok nyal timo kamano. Mano biro miyo wamed lony e tij puonjo.
4. Yore moko ma wanyalo nyisogo chuny mar chiwruok gin kaka mage?
4 Owete bende nyalo nyiso chuny mar chiwruok ka gichiwore mar mondo oketgi kaka jodongo kata jokony tich ei kanyakla. (Isa. 32:2; 1 Timo. 3:1) Ji duto nyalo konyo mondo chenro mag chokruoge mag distrikt kod mag alwora odhi maber ka gichiwore tiyo tije kuonde moketi mopogore opogore. Ka wachiwore mondo wati gi jarit-alwora e tije mag lendo, kata gwele e gago, mani miyo “wajiwre e yiewa.” (Rumi 1:12) Ka wachiwore e konyo nyithindo ma kiye, mond liete, joma tuwo kata joma nigi midekre, mine ma nigi nyithindo matindo, koda jomoko ei kanyakla, wabedo gi mor mang’eny kendo Jehova yie kodwa.—Nge. 19:17; Tich 20:35.
5. Gin tije kaka mage madwaro chuny mar chiwruok e Od Romo?
5 Yo machielo ma wanyalo nyiso godo chuny mar chiwruok en kawo kindewa mondo wakony e lwoko kendo rito chal mar Od Romo. To nikech ji mang’eny donjo e adiera, Ute Romo manyien dwarore kaachiel gi joma chiwore e gerogi. Dichwo moro gi chiege ne ochiwore ka gikonyo e Komiti Mochung’ne Tije Gedo kata obedo ni ne gionge gi lony mamalo kuom weche gedo. Bang’e mos mos, ne omigi tiegruok ma koro sani gikonyo e gero matofali e kor ot. Chiege nowacho kama: “Tiyo kanyachiel gi jomoko osemiyo wabedo gi osiepe mabeyo ahinya. Kata obedo ni waol kochopo seche mag odhiambo, to wabedo mamor ahinya ei chunywa.”
6. Ang’o momiyo tij lendo e tich maduong’ moloyo duto ma wanyalo chiwore mondo watim?
6 Chiwruok e Tij Lendo: Tich maduong’ moloyo duto ma wanyalo chiwore mondo watim e kindewagi en tij lando wach Pinyruoth. Kaka ji medo ng’eyo kendo tiyo gi puonj mowuok ei Muma, e kaka gimedo tiyo gi ngimagi e yo maber, kendo giyudo teko mar loyo timbe ma hinyogi. Gipuonjore kuom geno majaber mar kinde mabiro mowuok ei Muma. Kuom puonjo ji Muma, watimo tich majaber mar chiwruok ma nokel ne jomoko gweth mabiro siko. (Joha. 17:3; 1 Timo. 4:16) Ka thuolo marwa oyie, wanyalo tiyo tijni kaka painia mapile kata painia makonyo, kata dhi lendo kama jolendo dwarore ahinya, kata puonjruok dhok machielo.
7. Ang’o momiyo chuny mar chiwruok en gima dwarore ahinya e kindewagi?
7 Ruoth Daudi ne okoro ni e kinde ma Mesia ne dhi chako loch mare, oganda mar Nyasaye ne dhi ‘chiworene gi hera.’ (Zab. 110:3) Nikech Jehova miyo tij keyo mogik mondo odhi nyime mapiyo, nitie tije mang’eny monego wachiwore timo. (Isa. 60:22) Be ise yie ni: “An ka; ora”? (Isa. 6:8) Kuom adier, ka wanyiso chuny mar chiwruok, wamoro Jehova kendo wayudo gweth mogundho.