Sandug Penjo
◼ Ere kaka onego oland ne ji wer michakogo Skul mar Tij Nyasaye, Chokruok mar Tijwa, Chokruok mar Ji Duto, koda Puonjruok mar Mnara wa Mlinzi, to onego tim kamano gi ng’a?
Wende moyier mag juma ka juma michakogo Skul mar Tij Nyasaye, ni e Chenro mar Skul mar Tij Nyasaye, ma en kalatas madiere mar Tijwa mar Pinyruoth mar Oktoba. Wende michakogo koda mitiekogo Chokruok mar Tijwa mar juma ka juma onyis e ite mar 2 e Tijwa mar Pinyruoth. Bende, namba mag wende mitiyogo e Puonjruok mar Mnara wa Mlinzi, yudore e ite mar 2 e moro ka moro kuom Mnara wa Mlinzi. Wende michiwogo, otudore gi chokruok miwerogieno, omiyo jal matayo chokruogno ema onego oland wendno, to ok jakom mar chokruok ma oa telo ne mano.
Kuom ranyisi, jarit Skul mar Tij Nyasaye, biro rwako ji duto kendo lando wer michakogo skul. Obiro tayo skul, to bang’ mano ogwelo jalo ma nigi migawo mokwongo e Chokruok mar Tijwa. Jal ma nigi migawo mokwongono e Chokruok mar Tijwa, ema onego oland wer michakogo chokruogno.
Kamano bende, jakom ema biro chako Chokruok mar Ji Duto. Obiro rwako gi mor ji duto mantie kendo gwelogi mondo giwer wer michakogo moseyier gi jagol-twak. Jakom (kata owadwa mowinjore mosemi migawono chon) biro chiwo lamo michakogo. Jakom biro nyiso wi twak kendo gwelo jagol twagno. Bang’ twagno, jakom biro goyo erokamano e yo machuok kuom puonjgo, ma ok onwo weche ma jagol-twak osewuoyoe. Obiro lando wi twak mibiro chiwo e juma maluwo, kae to ogwelo ji duto mondo odong’ e Puonjruok mar Mnara wa Mlinzi. Onge tiende jakom kwayo jowinjo ka digiher oro mos ne kanyakla ma jagol-twak owuokie. Bang’ mano, jakom biro gwelo jal matayo Puonjruok mar Mnara wa Mlinzi.
Jal matayo Puonjruok mar Mnara wa Mlinzi biro lando wer mokwongo mar puonjruogno. Obiro tayo puonjruogno kaluwore gi chenro ma oseketi, kae to bang’ mano, obiro lando wer mitiekogo. Jal matayo Puonjruok mar Mnara wa Mlinzi, kinde mang’eny biro gwelo owadwa ma oa golo twak mondo ochiw lamo mitiekogo.
Luwo chenro ma oseketgi, biro konyo e miyo chokruogewa mag kanyakla ota e yo machalre.