Chenro Manyien mar Chokruok mar Kanyakla
1, 2. Lokruok mage mibiro tim e chokruok chakre Januar 2009?
1 Riwruok mar owete e piny mangima ne oyudo lendo maber e juma mar April 21-27, 2008. “Kochakore Januar 1, 2009, Puonjruok mar Buk mar kanyakla ibiro timo kanyachiel gi Skul mar Tij Nyasaye. Nying’ Puonjruok mar Buk, ibiro loki ni Puonjruok Muma e Kanyakla.”
2 Chenro mar Chokruok Juma ka Juma: Chokruogni duto, moriwo nyaka wer kod lamo biro kawo sa 1 gi dakika 45. Chokruok biro chakore gi wer kod lamo (Dak. 5), ka iluwe gi Puonjruok Muma e Kanyakla (Dak. 25). Skul mar Tij Nyasaye (Dak. 30) biro luwe achiel kachiel. Bang’ mano, wer (Dak. 5) michakogo Chokruok mar Tijwa (Dak. 35). Chokruok biro rumo gi wer kod lamo (Dak. 5). Mondo okonyi timo ikruok ne chokruogegi, chenro mag Puonjruok Muma e Kanyakla, Skul mar Tij Nyasaye, kod Chokruok mar Tijwa ibiro keti dwe ka dwe ei Tijwa mar Pinyruoth.
3. Ere kaka ibiro ta Puonjruok Muma e Kanyakla?
3 Puonjruok Muma e Kanyakla: Chokruogni ibiro tim kaka itimo Puonjruok mar Ohinga mar Jarito. Ok bi chuno ni nyaka chak gi wuoyo e yo machuok kuom puonjruok mar juma mokalo. Mopogore gi mano, chokruogno onego ochaki gi weche machuok ahinya. Mani biro chiwo thuolo moromo ni jogo duto mantie mondo ochiw paro e yo machuok. Jarit matayo kanyakla biro chiwo migawo ne jodongo mondo giwilre e tayo chokruogni, kotiyo gi jaduong’ mopogore juma ka juma.
4. Lokruok mane mibiro tim e Chokruok mar Tijwa?
4 Chokruok mar Tijwa: Chokruok mar Tijwa ok bi loki, kata kamano obiro bedo gi migepe machuok. Lendo biro kawo dakika abich. Thuoloni biro romo chiwo lendo mochuno kod barupe moko mowuok e ofis. Lendo moko kaka chenro mar dhi lendo, lwoko Od Romo, ripot mar pesa, kod barupe moko mapile mawuok e ofis ok ochuno ni nyaka som e ndiri, kar mano ibiro bawgi e bod mar lendo mondo owete osom. Jogo ma nigi migepe e Chokruok mar Tijwa onego otim ikruok maber kendo orit sa mochiw kod weche mochiw mag timo migawogo.
5. E juma mar limbe mar jarit-alwora, chenro mar chokruok biro bedo nade?
5 Limbe mar Jarit-Alwora: Chenro ma iluwo e jumb limbe mar jarit-alwora ok bi loki. Chieng’ Tich Ariyo, Skul mar Tij Nyasaye kod Chokruok mar Tijwa ibiro tim kae to iluwe gi wer. Bang’ mano, jarit-alwora biro golo twak mar dakika 30. Kendo mana kaka itimo sani ka jarit-alwora otimo limbe, odhiambo machielo ibiro tim Puonjruok Buk e Kanyakla ka iluwe gi wer kod twak migolo gi jarit-alwora. Chokruok ibiro tiek gi wer kod lamo.
6. Tij jarit-grup en ang’o?
6 Romo mag Chano Dhi Lendo: Jodong-kanyakla biro miyo jorit-grube migawo mag rito grube mag dhi lendo, kendo timo tij kwath ne jolendo manie grubegi. Ka jakony-tich ema tiyo tijno, onego oluonge ni “jakony-grup.”
7. Ang’o ma wanyalo geno kuom chenro manyien mar chokruok?
7 Kaluwore gi gik ma osewachi kae, wabiro bedo gi thuolo mar yudo puonj kod jiwruok mabiro konyowa e loso winjruok motegno gi Jehova. Mani biro konyowa bedo jolendo kendo jopuonj molony, mosetieg mondo obed gi nyak maber e tij lendo.—Efe. 4:13, 14; 2 Tim. 3:17.
8. Ere kaka timo ikruok chon biro konyowa kaachiel gi jomamoko?
8 Puonjruok chon weche mibiro puonjruok e chokruogegi biro konyowa keto pachwa kuom thuond weche ma ibiro jiw sa chokruok ka chokruok. Waduto wabiro bedo gi thuolo mar chiwo paro, ka wamiyo jiwruok ng’ato gi nyawadgi obedie. (Rumi 1:11, 12; Hib. 10:24) Dwarowa onego obed mar miyo ‘ji one dongruok marwa e yore duto’ ka ‘wapuonjo kare wachno mar adiera.’—1 Tim. 4:15; 2 Tim. 2:15.
9. Dwaro marwa en ang’o, to nikech ang’o?
9 Wamor ahinya gi lokruok maduong’ni mosetim e chokruogewa. Waduto wameduru tiyo gi weche mag tayowa ma “jatichno mogen, kendo mariek” chiwo, kendo wasik machiegni gi Jakwadhwa Maduong’ kaka omedo ikowa tony e “masira” maduong’ ma okayo machiegni.—Math. 24:21, 45; Hib. 13:20, 21; Fwe. 7:14.