Dhiuru Nyime gi ‘Nyago Olemo Mang’eny’
1 Kotiyo gi ranyisi, Yesu ne owacho ni en e yadh mzabibu madier, Wuon mare e Japur, to jolupne mowal kuom roho gin bede mzabibu manyago olemo. Kolero tij Japur mar ranyisini, Yesu ne ojiwo gimomiyo siko kata makruok motegno gi yadh mzabibu dwarore. (Joha. 15:1-4) Puonj ma wayudo en ni ng’ato ka ng’ato ma nigi winjruok machiegni e kinde gi Jehova, nyaka nyag olemo ka en kaka bad yadh “mizabibu madier,” ma en Yesu Kristo. Nyaka wadhi nyime gi nyago ‘nyak mar roho’ koda mar Pinyruoth e yo mogundho.—Gala. 5:22, 23; Math. 24:14; 28:19, 20.
2 Nyak mar Roho: Dongruok ma watimo e wach Nyasaye inyalo ng’e kuom yore ma wanyiso godo nyak mar roho. Be itiyo matek mondo omi ibed gi nyak mar roho mar Nyasaye ka ipuonjri pile kendo paro matut kuom Wach Nyasaye? (Fili. 1:9-11) Kik idigni kwayo mondo iyud roho maler manyalo miyo inyag kido mamiyo Jehova duong’, kendo konyi medo timo dongruok e wach Nyasaye.—Luka 11:13; Joha. 13:35.
3 Bedo gi nyak mar roho bende biro konyowa bedo jotich Nyasaye mamedo bedo gi kinda. Kuom ranyisi, hera kod yie miyo wamanyo thuolo kata obedo ni wan gi chenro modich, mondo omi wati tij lendo ma ok wabare. Kido kaka mar kuwe, horuok, miwafu, muolo, ritruok, gin kido ma konyowa ng’eyo gima wanyalo timo ka waromo gi jo akwede. Iilo miyo wawinjo maber e chunywa kata mana e kinde ma ji ok dwar winjowa.
4 Nyak mar Pinyruoth: Wadwaro bende mondo wanyag nyak mar Pinyruoth. Mano oriwo kata chiwo “misango ma en pak mawuok kaka olemo e dhok ma hulo nyinge [nying’ Jehova].” (Hibr. 13:15) Watimo mae kuom lando wach maber gi kinda kendo ma ok wawe. Be itemo matek mondo imed nyago olemb Pinyruoth, kimedo tiyo tiji mar lendo e yo maber chuth?
5 Yesu ne onyiso ni, jolupne mochung’ motegno ne dhi nyago olemo e okang’ mopogore opogore. (Math. 13:23) Kuom mano, ok onego wapimre gi jomoko, to kar mano wati ne Jehova kar nyalowa duto. (Gala. 6:4) Nono chal marwa wawegi e yo ma ratiro ka watiyo gi Wach Nyasaye, biro konyowa dhi nyime miyo Jehova duong’ ka ‘wanyago olemo mang’eny.’—Joha. 15:8.