Wajiwreuru Ng’ato gi Ng’ato
1. En thuolo mane makende mabedoe e kinde ma jorit malworo timo limbe?
1 Jaote Paulo nondiko ne kanyakla man Rumi kowachonegi kama: “Agombo nenou, mondo amiu mich moro mar chuny, ni mondo uchung’ matek, tiende ni mondo wajiwre e yiewa, an kaachiel kod un.” (Rumi 1:11, 12) Limbe ma jorit malworo timo e ndalogi bende chiwo thuolo machalo gi mago mag jiwruok kaachiel ng’ato gi ng’ato.
2. Ang’o momiyo ithoro lando chon wach limbe mar jarit-alwora?
2 Ne Kanyakla: Ithoro lando ne kanyakla wach limbe mar jarit-alwora dweche madirom adek kapok obiro. Mano miyowa thuolo mar timo lokruok e chenrowa mondo omi wayud kony chuth. (Efes. 5:15, 16) Kapo ni ondiki tich, lendo motim chon kamano nyalo konyi ikwa thuolo chon mondo omi iriw lwedo tij lendo e jumano. Jomoko chano bedo painia makonyo e dwe ma gibedo gi limbe mar jarit-alwora. Kapo ni chenro ma ne itimo nyalo miyo ibed ma onge, be inyalo timo lokruok mondo omi ibedie e jumano?
3. En ang’o ma ng’ato ka ng’ato kuomwa nyalo timo mondo omi wayud jip e kinde limbe mar jarit-alwora?
3 Gima duong’ momiyo jarit-alwora timo limbe en, jiwo ng’ato ka ng’ato kendo tiegogi e tij lendo. Be inyalo kwayo mondo ilend kode kata ilend gi chiege kapo ni osekendo? Jarit-alwora mor lendo gi jolendo mopogore opogore, moriwo nyaka jogo manyalo bedo ni pok olony ahinya e tij lendo. Ji duto nyalo puonjre kuom neno kaka olendo, kendo tiyo gi paro moro amora mochiwo gi ng’wono. (1 Kor. 4:16, 17) Ka igwele mondo ugagi, mano nyalo miyi thuolo machielo mar jiwruok e yie. (Hibr. 13:2) To nikech twege mogolo oiko kaluwore kod dwaro mag kanyakla, tem ichik iti malong’o.
4. Ere kaka wanyalo jiwo jarit-alwora?
4 Jarit-Alwora: Jaote Paulo ne chalo gi owete ma ne okonyo, nimar en bende noyudo chandruoge mana kaka gin, omiyo ne omor yudo jip koa kuomgi. (2 Kor. 11:26-28) Kane kanyakla man Rumi owinjo ni Paulo, ma kindeno ne ni e twech, gikone koro ne biro kuno, jomoko kuomgi nodhi nyaka e Chiro mar Appio mondo girom kode—kama borne en kilomita 74! “Ka Paulo nonenogi, nogoyo ni Nyasaye erokamano, kendo nonwang’o chir.” (Tich 28:15) In bende inyalo jiwo jarit-alwora maru e yo ma kamano. Nyise “pok [luor] nyadiriyo” ka iriwo lwedo limbeneno gi iilo. (1 Timo. 5:17) Nyis e wecheni koda e timbeni ni imor kuom kinda motimo nikech un. En kaachiel gi chiege, gibiro bedo mamor ka gineno yie, hera kod kinda ma unyiso.—2 Thes. 1:3, 4.
5. Ang’o momiyo dwarore ni waduto wayud jip ndalogi?
5 E kinde ‘mag chandruokgi,’ en ng’ano kuomwa ma ok diher ni mondo ojiwe? (2 Timo. 3:1) Ng’ad gie sani mondo ibi bedie kendo iriw lwedo chuth juma makendeno mopong’ gi tich ka un kanyachiel gi jarit-alwora. Waduto—jorit malworo koda jolendo bende—wanyalo jiwore ng’ato gi ng’ato. Kuom timo kamano, wabiro bende dhi nyime ka ‘wahore ng’ato gi ng’ato, kendo ka wategore.’—1 Thes. 5:11.