Kampen mar Lendo Maduong’ie Moloyo ma Osetimore e Piny!

Kuom higini mokalo 100, Joneno mag Jehova osechanore mondo mi giland wach maber. (1 Kor. 9:23) Kuom kampen maduong’ie moloyo mar lendo ma osetimore e piny, wachiwo wachni e dhok mang’eny. Wachiwe e pinje mokadho 230. (Math. 24:14) To ang’o ma omiyo tijni dwarore? Kendo ere kaka itime e piny mangima?

Vidio mar Jehovah’s Witnesses—Organized to Share the Good News dwoko penjogo, konyiso yore mopogore opogore mag tijwa matimore e piny mangima. Seche ma ing’iye to par ane penjogi: (1) Ere kaka tijwa ichano kendo ichiko? (2) Ere kaka migepe mag Ndiko Bugewa, Tij Loko Dhok, Goro Pichni, kod Loso Kasede-CD/Vidio konyo e chiwo ne ji wach maber? (3) Ang’o momiyo itimo tij goyo buge mang’eny kod orogi? (Joha. 17:3) (4) Buge kod gik moko mopogore opogore adi migoyo e higa achiel? (5) Ang’o ma bugewa ma wuoyo kuom Muma osetimo? (Hibr. 4:12) (6) Ang’o ma itimo mondo okony jogo ma nigi chandruok e neno kata ma itgi ok winj mondo oyud puonj e Wach Nyasaye? (7) Pesa ma itiyo godo tijni nwang’ore nade? (8) Ang’o ma migepe mag Hospital Information Services, Service Department, kod Convention Department konyowago? (9) Vidioni osekonyi nade kaka achiel kuom Joneno mag Jehova e neno kendo mor gi (a) kinda ma riwruok mar oganda Jehova timo e lando wach maber? (b) famili mag Bethel mokadho 100 man e piny ngima? (c) puonj ma tiego jorit-kanyakla kod jomisonari? (d) ber mar chako odiechieng’ kodiechieng’ gi ndiko mowuok e Muma kod ikruok ne chokruok mag juma ka juma? (e) ber mar dhi e chokruokwa mag Jokristo? (f) kaka ngima biro chalo e Paradis ma e piny? (Isa. 11:9) (g) tiyo gi thuolo ma in-go e tij keyo madhi nyime?—Joha. 4:35.

Weche mage mabeyo ma iseneno kuom nyiso wedeni, osiepeni, joma idok limo, kata jopuonjreni mag Muma vidioni? Donge inyalo nyiso ng’at machielo vidioni kaachiel gi landone wach maber mapiyo?—Math. 28:19, 20.