Vidio Manyien mar Chako Puonjruok Muma gi Ji

Nitie vidio moro ma wiye wacho ni “Ang’o Momiyo Onego Ipuonjri Muma?” ma oket e Websaitwa mar jw.org, kendo ji mang’eny madhi e Websaitno nene. Olose mondo ojiw joma ohero wach ma walando mondo giyie puonjore Muma kodwa ma onge chudo. Ng’ato ang’ata nyalo neno vidio machwokno ka odiyo kama ondik ni “Kwa Puonjruok Muma” mayudore gi piny e kama kwongo yawore sama ng’ato odonjo e Websaitwa, kata onyalo menyo QR (quick response) code moket e tok moro ka moro kuom trakt manyien-go. Paro maluwogi nyalo konyowa tiyo maber gi vidiono:

• Sama idok neno ng’ama ne ilosogo e limbe mokalo, inyalo nyise kama: “Donge anyalo tang’onie vidio moro machuok ma lero kaka wanyalo yudo dwoko mag penjo mag Muma? ” Ka oyie, to nyise vidiono e gir tudruok moro amora ma in-go manyalo timo kamano, kata e kompyutane.

• Sama wachiwo trakt manyien-go ka walendo seche ma wan e dijewa kata kuonde ma ji mang’eny yudoree, siem ne ng’ama ilosogono kama QR code yudoree kendo ijiwe ni ka en gi gir tudruok moro amora ma nyalo menyo code manie tok traktgo to otim kamano. E dhok mang’eny, ka imenyo QR code to oteri moriere e Websaitwa kama vidiono yudoree; omiyo yot mondo itug vidiono gikanyono ka itiyo gi gir tudruok manyalo timo kamano.

• Wuo gi jotich weteni, joma isomogo, wedeni, koda osiepeni e wi vidiono, kendo inyalo tang’onegi vidiono. Kata inyalo oronegi gimoro ma nyalo konyogi chopo e vidiono (link) ma ka gidiyo to ginyalo neno vidiono e thuolo margi.

Ka watiyo maber gi gir tich manyienno, wanyalo chako puonjruok mag Muma momedore, kendo konyo ‘ji duto ma chunygi ni kare ne ngima mochwere’ mondo gibed gi winjruok maber gi Nyasaye.​—Tich 13:48, NW.