Vidio mar Jehovah’s Witnesses—Organized to Share the Good News
Kuom higini mokalo 100, Joneno mag Jehova osechan maber mondo giland wach maber. Lando wach maberni e kampen maduong’ moloyo mosebedo ka dhi nyime e piny ngima, walando wachni e dhok mang’eny kendo e pinje mokalo 230. (Math. 24:14) Ang’o momiyo nyaka ti tijni? Ere kaka itime e piny ngima? Vidio miluongo ni Jehovah’s Witnesses—Organized to Share the Good News chiwo dwoko mag penjogo kuom lero weche mang’eny motudore gi tijwa e piny ngima. Bang’ neno vidiono, par ane kuom dwoko minyalo chiwo e wi penjogi.
Ere kaka vidioni osekonyi ng’eyo matut (1) kinda ma riwruok mar oganda Jehova timo mondo giland wach maber? (2 Tim. 4:2) (2) jood Bethel me piny duto? (3) tiegruok michiwo ne jomisonari kod jorit mopogore opogore? (2 Tim. 2:2) (4) ber mar chako odiechieng’ gi nono ndiko e Muma kaachiel gi timo ikruok ne chokruogewa mag kanyakla juma ka juma? (Tich 17:11) (5) ber mag bedo e chokruogewa mag Jokristo? (Hib. 10:24, 25) (6) gweth ma ibiro yudo ka pinyni olok obedo Paradis? (Isa. 11:9) (7) migawo makende ma in-go mar riwo lwedo tij keyo madhi nyime?—Joh. 4:35.
Vidioni osekonyo ji mang’eny moserwako wach mondo ging’e tije ma Joneno mag Jehova timo e piny ngima. (8) Kinde mage mowinjore nyiso jopuonjreni mag Muma, wedeni, kod jomamoko vidioni? (9) Joma isenyiso vidiono osebedo gi paro mage mabeyo kuome?
Seche ma waparo matut kuom gima Jehova chopo, wayie gi weche ma jandik-zaburi nowachogi: ‘A Jehova Nyasacha, honini misetimo ging’eny, gi wecheni bende miparo kuomwa, gitama chano e nyimi.’ (Zab. 40:5) Mad wati gi vidioni e konyo jomoko mondo obed gi ng’eyo matut e wi Jehova kod riwruok mar oganda joge!