Tegruok Ng’ato gi Ng’ato e Tij Lendo
1 Waduto wamor ka wayudo wach ma tegowa “mowachi e ndalo mowinjore.” (Nge. 25:11) Seche ma walendo gi jolendo mamoko, ere kaka wanyalo neno ni weche ma wawacho kodgi jiwogi?
2 Weche ma Jipo: Mano kaka en gima jipo wacho weche mag winjruok gi Nyasaye ka waloso gi owete gi nyiminewa seche ma walendo! (Zab. 37:30) Wanyalo wuoyo kuom yo ma wadwaro tiyogo e lendo, kata lero gik ma nyocha ne waneno e tij lendo. (Tich 15:3) Be, nitie wach moro maber ma ne wayudo ka wasomo Muma, gasede manyien, kata e chokruok moro mar kanyakla? Wanyalo wuoyo kuom weche ma ne ochiw e twak mar ji duto ma nyocha ne wawinjo e Od Romo.
3 Wanyalo winjo ka chunywa ool ka wuon ot okwedowa e yo ma ok wanyal dwoko. Bang’ wuok e odno, en gima nyalo konyowa ahinya kawo dakika matin mondo wawuo kaachiel gi jalendo ma walendogo kaka wanyalo dwoko akwede machalo kamano e kinde mabiro ka wanono bug Kutoa Sababu. Kendo kapo ni ne wahero yo ma jalendo ma walendogo ne otiyo godo e chiwo wach maber, wanyalo jiwe kuom puoye gadier.
4 Kaw Thuolo Mokwongo: Be nitie jolendo moko e grup marwa mar puonjruok buk ma pok walendogo machiegni? Kwayo jolendogo mondo olend kodwa nyalo miyo wabed gi ‘jiwruok e yiewa.’ (Rumi 1:12) Jopainia mapile koda makonyo mor ka giyudo joma gilendogo, moloyo okinyi mang’ich kata godhiambo seche ma jolendo manok nyalo bedo ni lendo. Wanyalo konyo jopainiago kuom lendo kodgi. Be nitie jalendo ma jamidekre kendo ma tuwoneno miyo ok onyal timo duto ma dogomb e tij lendo? Chano mondo jalendo ma kamano olend kodwa, kanyalore oterwa e puonjruok Muma gi ng’ato, nyalo konyowa waduto.—Nge. 27:17.
5 Puoch kod weche manyiso erokamano pile gin gik makonyo, kata mana e weche matindo. Onego wabed gi wachno e paro seche ma ilendo gi jomoko, nikech wadwaro dhi nyime ‘kwategre ng’ato gi ng’ato.’—1 Thes. 5:11.