Jiw Joma Ilendogo
1. Ere kaka wanyalo luwo ranyisi mar jaote Paulo sama walendo gi jowetewa?
1 Kinde duto ma jaote Paulo ne nigi jowetene, noneno mano kaka thuolo mar ‘jiwruok kodgi.’ (Rumi 1:12) Sama ilendo gi joweteni, be itiyo gi thuolono e jiwogi kendo konyogi? Kar ling’ aling’a e seche ma kamago, donge inyalo pimonegi gik ma osekonyi medo lony mari e tij lendo?
2. Gin yore mage ma wanyalo konyogo jal ma walendogo mondo obed gi chir, to ang’o momiyo mano dwarore?
2 Konygi Bedo gi Chir: Jolendo moko bedoga maluor, kendo mano janenore e wang’gi koda kaka giwuoyo. Wanyalo konyogi bedo gi chir kuom pwoyogi kowuok e chunywa. Gin yore mage mamoko ma wanyalo konyogigo mondo gibed gi chir? Jarit moro malworo ohero nyisoga joma olendogo ni en bende nitie gik ma miyega luoro kendo ni lemo ema konyega loyo luoro. Owadwa moro bende nolero gima jakonye bedo gi chir. Nowacho kama: “Achakoga gi bwonjo. To samoro kata mana bwonjo abwonja nyalo bedona matek ma chuna ni nyaka alem.” Be nitie gik ma osekonyi bedo gi chir sama in e tij lendo? Pim ne nyawadu.
3. Gin gik mage ma wanyalo pimo ne jal ma walendogo ma nyalo konye medo lony mare e tij lendo?
3 Nyisgi Yore ma Tiyoni Maber: Be nitie weche moko mayot kata penjo moro motudore gi gimoro ma timore e alworau, ma iseyudo ka yotni chakogo mbaka gi ji? Koso dibed ni nitie paro moro mayudore e Tijwa mar Pinyruoth ma iseketo e yo mawinjore gi alworau ma otiyoni maber? Donge inyalo pimo ne jal ma ilendogo? (Nge. 27:17) Sama un e yo kudok limo ng’ato, donge inyalo pimo ne nyawadu gima idwaro chopo e limbeno, kendo nyise kaka ichano timo mano. Bang’ ka usetayo puonjruok Muma, inyalo pimo ne nyawadu gimomiyo niyiero tiyo gi wach moro, ndiko moro, kata yo moro mar puonjo mondo ikonygo japuonjrenino.
4. Ang’o momiyo onego waher konyo joma walendogo?
4 Jokristo mokwongo ne ok odich mana gi konyo joma ok oyie kende. Ne ging’eyo bende ni ne dwarore ni gikony Jokristo wetegi kendo jiwogi. (Tich 11:23; 15:32) Jaote Paulo notiego rawera ma Timotheo, kae to nojiwe mondo oti gi gik ma nosepuonjore e konyo jowetene. (2 Tim. 2:2) Wan bende ka wadhi nyime timo maber ne Jokristo wetewa, to mano biro kelonegi mor. Gibiro medo kindagi e tij lendo, to Wuonwa me polo bende biro bedo mamor kodwa.—Hib. 13:15, 16.