Kaka Wanyalo Medo Lony e Tij Lendo—Bedo Jakony Maber Seche ma Ulendo

Gimomiyo Mano Dwarore: Yesu nong’eyo ber mar bedo gi jakony seche ma wan e tij lendo. Omiyo sama nooro jopuonjrene 70 mondo otelne e alwora ma ne gidhi lendoe, noorogi ji ariyo ariyo. (Luka 10:1) Jalendo ma en jakony maber nyalo chiwo kony madwarore sama jalendo wadgi oyudo pek moro kata ok ong’eyo kaka onyalo dwoko penjo moro ma wuon ot openjo. (Ekl. 4:9, 10) Onyalo pimone nyawadgi kaka en osebedo kotimoga sama oromo gi pek kaka mago kendo onyalo chiwo paro manyalo konyo jalendo wadgino obed jaland injili molony. (Nge. 27:17) Bende onyalo chiwo jip kokalo kuom mbaka mabeyo ma gigoyo sama giwuok e ot moro ka gidhi e machielo.—Fili. 4:8.

Kaka Wanyalo Timo Mano:

Chik iti malong’o seche ma jalendo wadu wuoyo gi wuon ot. (Jak. 1:19) Seche ma osomo ndiko, in bende luwri kode e Mumbi. Timo mano biro miyo ichiw kony ka mano dwarore.
Inyalo pimo seche ma owinjore in bende iwuo to mana ka dwarore. (Nge. 25:11) Kapo ni ikowo jalendo wadu e puonjruok mar Muma, paro ma ibiro ichiwo biro konyo ahinya. Kata kamano, seche ma ulendo ot ka ot, jalendo wadu nyalo dwaro ni imiye thuolo mondo en ema owuo gi wuon ot. Kapo ni nyawaduno en jalendo manyien, kata ok en gadier kaka onego odwok penjo kata wach moro ma wuon ot ok oyiego, onyalo mor ka ikonye. Kata kamano, bed ni ulendo ot ka ot, udok timo limbe, kata utayo puonjruok mar Muma, kik imwomri e chiwo paro ka jalendo wadu pok okwayi mar timo kamano, kata wuoyo aming’a, kata wuoyo e gima opogore gi gima ne iwuoyoe.
Nyis nyawadu yore ma ijatiyogago ma osekeloni nyak e tij lendo. Kapo ni kinde ka kinde, in-gi paro moro manyalo konyo jalendo wadu mondo obed molony e tij lendo, kik iling’ maok ijiwe. (Nge. 3:27) E kinde mowinjore, inyalo chako wuoyo kuom wacho niya: “Iparo ni mbaka ma wa a goyo gi wuon ot odhi nade? ” kata “Anyalo chiwe paro moro? ” kata “Ma e gima an atemoga timo.” Bed king’eyo ni jomamoko nyalo bedo mamor gi paro ma imiyogi e sa madwarore. Kata kamano, chunygi nyalo nyosore kata ginyalo jok ka wasiko wanyisogi mana kuonde ma ok gitimie maber.

Tem Timo Mae e Dweni:

Bang’ wuok e tij lendo gi jakonyni, nyise gima ber ma ne iwinjo kowacho kata ma ne otimo ma ne omiyo obedoni jakony maber.