Ang’o ma Pinyruodh Nyasaye Biro Timo?

GIK MA PINYRUODH NYASAYE OSETIMO

E sula mokalo, ne waneno ranyisi ma Yesu nochiwo ma ne dhi nyiso ni Pinyruodh Nyasaye osechako locho e polo ka Yesu e Ruoth.

Muma wacho ni ka Yesu osebedo Ruoth, nodhi riembo Satan gi jochiendene e polo. Sani koro ok ginyal dok e polo, kendo mano en achiel kuom gik momiyo weche osebedo maricho e pinyni chakre higa mar 1914.​—Fweny 12:7, 9.

Kata obedo ni chandruok osebedo ka medore e piny, Yesu ma e Ruoth e Pinyruodh Nyasaye, osebedo ka kelo gueth ne dhano e piny ma ngima. Sani ipuonjo ji Muma e piny duto mana kaka Yesu nowacho ni ne dhi timore, kendo ji mang’eny oseyudo ber sama gitiyo gi gik ma gipuonjore. (Isaya 2:2-4) Ji tara gi tara osepuonjore kaka ginyalo bedo jokinda e tijegi, kaka ginyalo pidho joutegi e yo maber, kod gimomiyo ok onego giket genogi kuom mwandu mag piny. Joma kamago yudo ber mang’eny e kindegi, kendo gibiro yudo gueth momedore e kinde ma Pinyruodh Nyasaye biro locho e piny.

GIK MA PINYRUODH NYASAYE CHIEGNI TIMO

Kata obedo ni Yesu sani locho e polo, sirkende mag dhano to pod locho e piny ka. Kata kamano, Nyasaye osechiko Yesu niya: “Bed gi loch e dier wasiki.” (Zaburi 110:2) Machiegnini, Yesu biro tieko ji duto ma kwedo loch Nyasaye, kae to ogolo chandruoge duto ma hinyoga joma obolore ma winjo Nyasaye.

Mago e kinde ma Pinyruodh Nyasaye biro timo gik ma luwogi:

• Ketho dinde mag miriambo. Ibiro gol dinde duto ma osebedo ka puonjo miriambo e wi Nyasaye kendo sando dhano. Muma luongo dinde mag miriambo te koriw ni dhako ma jachode. Ibiro kethe apoya, kendo ji mang’eny biro bwok ahinya gi kethruokne.​—Fweny 17:15, 16.

• Tieko loch dhano. Pinyruodh Nyasaye biro tieko loje duto mag dhano.​—Fweny 19:15, 17, 18.

• Golo joma richo. Ang’o ma biro timore ne joma ohero timo gik maricho kendo ma odagi winjo Nyasaye? Muma wacho niya: “Joricho ibiro gol oko e piny.”​—Ngeche 2:22.

• Golo Satan kod jochiendene. Satan kod jochiendene ‘ok nochak owuond ogendni kendo.’​—Fweny 20:3, 10.

Ere kaka timo gigo biro konyo joma obolore e bwo Pinyruodh Nyasaye?

GUETH MA PINYRUODH NYASAYE BIRO KELO NE DHANO

E kinde ma Yesu biro locho e wi piny ka en e polo, obiro timo gik mabeyo moloyo ma sirkal moro amora mar dhano osetimo. Obiro locho kanyachiel gi ji 144,000 ma Nyasaye oseng’iewo e piny. (Fweny 5:9, 10; 14:1, 3) Obiro neno ni dwach Nyasaye otimore e piny. Gin gueth mage ma Pinyruodh Nyasaye biro kelo ne joma biro dak e piny?

• Tieko tuoche kod tho. “Onge japiny ma nowachi niya: ‘Atuo,’” kendo “tho ok nobedie kendo.”​—Isaya 33:24; Fweny 21:4.

• Kelo kue madier. “Yawuoti duto . . . ginibed gi kuwe mang’eny,” kendo “ng’ato ka ng’ato nobed e tiend yadhe mar mzabibu kod mar ng’ope, [kendo] onge ng’at ma biro bwogogi.”​—Isaya 54:13; Mika 4:4.

• Miyo ji tije mabeyo. “Joga moyier nobed mamor gi tich lwetegi. Ok giniti matek kayiem nono.”​—Isaya 65:22, 23.

• Golo gik ma ketho alwora. “Thim kod piny motwo nobed mamor, ee, thim nobed mamor kendo nothiew ka safron.”​—Isaya 35:1.

• Puonjo ji gik monego gitim mondo gidag nyaka chieng’. “Ka ng’ato ong’eyi, in Nyasaye makende mar adier kod jal ma ne ioro Yesu Kristo, to en gi ngima ma nyaka chieng’.”​—Johana 17:3.

Nyasaye dwaro ni in be ibi iyud guethgo. (Isaya 48:18) Sula ma luwo mae lero gik minyalo timo mondo ibi idag nyaka chieng’.