Puonj Joma Ok Olony Maber e Somo

1. En pek mane mwanyalo yudo e tij lendo?

¹ Ka wan e tij lendo, kinde moko waromo gi joma ok ong’eyo somo maber, mano nyalo miyo puonjo adiera obed matek. Ang’o mwanyalo timo?

2. Wanyalo nyiso luor nade ne joma ok olony maber e somo, to ang’o momiyo mano owinjore?

² Nyisgi Luor: Kaka chuny ng’ato chalo e gima duong’ e wang’ Jehova, to ok somo mar pinyni. (1 Sam. 16:7; Nge. 21:2) Omiyo, ok onego wabuon joma ok olony maber e somo. Joma kamago nyalo rwako kony mwachiwo ka wanyisogi luor kod horruok. (1 Pet. 3:​15) Mano nyalo dwaro ni kik wachun jal mwalendoni ni osom ndiko kata paragraf. Kaka ng’ato medo timo dongruok e puonjruok adiera mag Muma, onyalo medo bedo gi siso mar timo dongruok e somo mondo omi oyud mor mabiro kuom somo Wach Nyasaye gi duol ma piny “odiechieng’ gi otieno.”​—Zab. 1:​2, 3.

3. Gin yore mage mag puonjo minyalo tiyogo e puonjo joma ok olony maber e somo?

³ Yore Mwanyalo Puonjogo Muma: Tiyo gi picha en yo maber ahinya mar puonjo kendo okonyo ng’ato e paro weche ma osepuonjore. Inyalo kwayo jal ma upuonjorego mondo ochiw paro kuom picha moro manie buk mutiyogo. Kae to ti gi penjo moko mabiro konye ng’eyo puonj monyalo yudo e pichano. Ti gi ndiko machiwo puonj moko kuom pichano. Piche bende inyalo tigo e nwoyo thuond weche ma usepuonjore. Kik upuonjre kama lach ahinya dichiel. Jiw wi wach maduong’ kod thuond weche manie sula ma upuonjore, kendo kik imed weche ma ok otudore gi wach ma upuonjore. Som ndiko achiel kachiel ei Muma, kendo ti gi penjo mondo omi ine ni japuonjre owinjo gima osom ei Muma. Mano nyalo miyo omed bedo gi gombo mar timo dongruok e somo mondo omi omany adiera momedore mag Muma en owuon.

4. Ere kaka wanyalo konyo japuonjrewa mondo otim dongruok e somo?

⁴ Gik Makonyo e Timo Dongruok e Somo: Joma ok olony maber e somo kata ma ok oseyudo thuolo moromo mar puonjruok somo maber, nyalo winjo tiend wach kendo make maber. Inyalo jiwo joma kamago mondo ochik itgi maber sama ng’at mong’eyo somo maber somo, ka giluwo kama isomono ei bugegi kendo ka gimedo nyaka gi nwoyo weche misomogo gi duol mapiny. Timo kamano biro konyo joma mapuonjore mondo obed gi lony maber e somo. Brosua mar Jitahidi Kusoma na Kuandika nyalo konyo ahinya. Kuonde mamoko, jodong-kanyakla nyalo timo chenro mondo klase mag puonjruok somo otim e kanyakla. Paro mochiwgi nyalo konyowa e konyo joma ok nigi lony maber e somo mondo owinj tiend “Ndiko Maler,” manyalo miyogi rieko makelo warruok.​—2 Tim. 3:​15.