Kaka Wanyalo Konyo Joma Ok Ong’eyo Somo Maber

1. En pek mane ma wanyalo yudo sama watemo puonjo joma ok ong’eyo somo maber?

¹ Moko kuom weg udi ma waromogo nyalo dwaro puonjore Wach Nyasaye, kata kamano ginyalo dikore nikech gineno Muma kod bugewa mamoko kaka buge madongo matek somo. Ka wamiyo joma kamago bug Muma Puonjo ka eka wahango romo kodgi, ginyalo luor ma gitamre puonjruok. Wanyalo timo ang’o mondo wapuonj joma kamago wach Nyasaye? Ne wapenjo jolendo molony ma wuok e pinje mokalo 20 gima gijotimo. Weche maluwogi oting’o dwoko ma ne gichiwo.

2. Gin buge mage minyalo tigo e konyo joma ok ong’eyo somo maber?

² Kapo ni japuonjre ok ong’eyo somo maber kata okiya somo chuth, inyalo chako puonjori kode kitiyo gi brosua mar Winj Nyasaye kata Winj Nyasaye Mondo Idag Nyakachieng’. Painia moro e piny Amerka ohero tang’o ne ji brosua ariyogo kae to openjogi ma digiher puonjore. Ofis ma Kenya ne owacho ni brosuago konyo ahinya e alwarogi nikech Jo-Afrika kinde mang’eny ipuonjo kokalo kuom sigendni, to ok e yor penjo gi dwoko kaka wajotimo gi bugewa mamoko. Ng’at mosomo samoro ok nyal neno pek kokwaye ni osom kae to ipenje penjo, kata kamano, ng’at ma sombe tin to nyalo yudo ka mano pekne. Kapo ni japuonjre nyalo somo kata mana matin, jolendo mang’eny ohero chako puonjruok kodgi ka gitiyo gi brosua kaka Wach Maber Mowuok Kuom Nyasaye!, Inyalo Bedo Osiep Nyasaye!, kata bugwa miluongo ni Buga Moting’o Sigendini mag Muma.

3. Gin weche mage monego wapar kinde duto ka wadwaro ni wakony joma ok ong’eyo somo maber?

³ Pwogi: Joma ok ong’eyo somo nyalo bedo gi wich-kuot kata ginyalo chayore gi wegi. Okang’ mokwongo ma wanyalo kawo mondo wapuonjgi adiera en konyogi bedo thuolo. Thoth joma ok ong’eyo somo riek arieka kendo ginyalo puonjore somo. Migi luor mowinjore. (1 Pet. 3:15, 16) Gibiro dwaro dhi nyime gi puonjruok ka gineno ni kinda ma giketo ok dhi nono, kendo ni gitimo dongruok e winjruokgi gi Nyasaye. Omiyo, pwogi kinde duto ma gitimo maber.

4. Ere kaka wanyalo konyo joma ok ong’eyo somo maber mondo giikre ne puonjruok?

⁴ Kata ka japuonjre ok ong’eyo somo maber, jiwe mondo otim ikruok ne puonjruok. Jolendo moko ma South Africa jiwoga jopuonjregi ma kamago mondo gipenj achiel kuom wedegi kata osiepegi mong’eyo somo mondo okonygi. Jalendo moro e piny Britain miyoga jopuonjrene siso mar timo ikruok ne puonjruok kuom yienegi nono paragraf moko manok ka gitiyo gi buge owuon ma osekiewo. Mano konyo jopuonjrego fwenyo kaka yudo dwoko yot sama ng’ato ononogi mi okiewogi motelo. Owadwa moro e piny India jiwoga jopuonjrene mondo onon pichni manie sula ma gibiro nono e puonjruok maluwo kendo gipar matut kuom pichnigo.

5. Ere kaka wanyalo nyiso horuok sama wapuonjo joma ok ong’eyo somo maber?

⁵ Hori: Kata obedo ni upuonjoru buk mane, jiw puonj madongo, kendo kony japuonjreni mondo owinj tiend gik ma upuonjoru e yo maber. Kinde ma eka uchako puonjoru, nyalo bedo maber ka upuonjoru kuom dakika 10 kata 15 kama. Kik upuonjru weche mang’eny nyadichiel, kar mano nonuru mana paragraf moko manok. Hori kapo ni japuonjre somo koyware. Kaka omedo ng’eyo Jehova, e kaka obiro medo timo kinda mondo osom maber. Mondo ikonye omed ng’eyo Jehova, gwele e chokruogewa mapiyo kaka nyalore.

6. Ere kaka wanyalo konyo ji mondo ging’e somo?

⁶ Ka jopuonjre mag Muma opuonjore somo, gibiro timo dongruok mapiyo e winjruokgi gi Nyasaye. (Zab. 1:1-3) Jolendo mang’eny osekonyo jopuonjregi mag Muma ka gitiyo gi buk miluongo ni Jitahidi Kusoma na Kuandika kuom dakika manok bang’ puonjruok ka puonjruok. Kapo ni chuny japuonjre onyosore, inyalo jiwe kuom nyise moko kuom dongruok mosetimo. Jiwe ni Jehova biro guedho kinda moketo kendo ni okwa Jehova e lamo mondo okonye. (Nge. 16:3; 1 Joh. 5:14, 15) Jolendo moko e piny Britain jiwoga jopuonjregi mondo obed gi chenrogi giwegi mar timo dongruok mosmos. Kuom ranyisi ginyalo chano ni gidwaro chako gi mako alfabet, kae to gipuonjore manyo ndiko e Muma kendo somogi, to bang’e gipuonjre somo weche mayudore e bugewa ma ondik e yo mayot. Kinde mang’eny konyo ji mondo ging’e somo ok en mana puonjogi somo kende, to oriwo bende konyogi bedo gi gombo mar timo kamano.

7. Ang’o momiyo ok onego wadikre puonjo adiera ne joma sombgi tin?

⁷ Jehova ok ochayo joma sombgi tin. (Ayub 34:19) Gima Jehova odichgo en chuny ng’ato. (1 Weche 28:9) Kuom mano, kik idikri puonjo adiera kata mana ne joma ok ong’eyo somo maber. Nitie buge mabeyo ahinya minyalo chako puonjogigo. Bang’ kinde, inyalo terogi e bug Muma Puonjo mondo okonygi ng’eyo Ndiko e yo matut.