Kaka Wanyalo Ikore ne Chokruok mar Tijwa
1. En wach mane maduong’ ma inono e Chokruok mar Tijwa, kendo ere kaka wanyalo yudo ber kuom chokruogni?
1 Chokruok mar Tijwa oket mondo okonywa tiyo tij lendo e yo molony. Wach maduong’ ma inono e chokruogni en tij lando wach maber mar Pinyruoth, timo jopuonjre, kod lando wach bura ma Nyasaye chiegni kelo. (Math. 28:19, 20; Mari. 13:10; 2 Pet. 3:7) Chokruogni konyowa ahinya ka waikorene maber kendo ka wachiwo paro.
2. Ere kaka wanyalo ikore ne winjo twak?
2 Twak: Kama igoloe weche mag twak onyis e weche ma jagol-twak onego oluw. Inyalo nono kama wechego wuokie, kaachiel gi ndiko moketi, kendo paro kaka inyalo tiyo gi wechego e tiji mar lendo.
3. Ang’o mwanyalo timo mondo waikore ne migawo mar penjo gi duoko?
3 Penjo gi Dwoko: Migawoni ibiro tayo kaka puonjruok mar Ohinga mar Jarito, ka jal matayo chako kendo tieko gi weche machuok. Gor lain e bwo thuond weche e paragraf ka paragraf, kendo iikori mar chiwo paro machuok kendo majiwo wach ma ipuonjruok.
4. Ere kaka wanyalo ikore ne migawo mar wuoyo moriwo jowinjo?
4 Wuoyo Moriwo Jowinjo: Migawoni ibiro golo kaka twak, mak mana ni jal matayo biro kwayo jowinjo moko mondo ochiw paro. Ka igoro lain e bwo thuond weche kendo nono ndiko moketi, inyalo chiwo paro seche mopenji penjo. Owadwa matayo migawoni biro temo kaka nyalore mondo one ni omiyo jowinjo thuolo mar wuoyo kuom thuond weche.
5. Ang’o mabiro konyowa yudo ber kuom ranyisi mitimo?
5 Timo Ranyisi: Migawo moko biro riwo timo ranyisi mondo onyis kaka weche mipuonjruokgo inyalo tigo e alworawa mar lendo. Jodongo, jolendo molony kata jopainia ibiro kwa mondo otim ranyisi. Ikruok mari ne migawoni nyalo riwo paro kaka ranyisino ibiro tim. Ka ichano timo ranyisi kitiyo gi paro moket e Tijwa mar Pinyruoth, non ane kaka inyalo keto parogo e wecheni iwuon kaluwore gi chal mar weg udi mopogore opogore. Ne ni in gi buk kata gaset mibiro tigo e ranyisi. E odhiambo mutimoe Lamo mar Joot, unyalo yudo ni ber ka utimo ranyisi kuom kaka inyalo ti gi paro mochiwgo.
6. Moko kuom gik momiyo waikore ne Chokruok mar Tijwa gin mage?
6 Chokruok mar Tijwa jiwowa ka waikore motelo ne migawo duto kendo paro kuomgi. Timo kamano biro miyo wamed jiwore e yiewa. (Rumi 1:11, 12) Ka wakawo kinde mar timo ikruok ne Chokruok mar Tijwa, wabiro bedo moikore chuth ne chopo ote ma wan-go.—2 Tim. 3:17.