Weche ma Joma Nigi Migawo e Chokruok mar Tijwa Onego Oluw
Chakre gi gochoni mar Tijwa mar Pinyruoth, nyinge mag migepe e chenro mar Chokruok mar Tijwa ibiro keti e yo machuok. Weche kod paro maluwogi lero kendo nyiso kaka sani onego watim kaluwore gi wiye ma ne wacho ni “Kaka Wanyalo Ikore ne Chokruok mar Tijwa,” e Tijwa mar Pinyruoth ma Mei 2009.
◼ Twak: Mae en migawo migolo kitiyo gi buk monyis kanyo, kendo jowinjo ok chiw paro. Jagol-twak onego ogol twagni e yo mabiro konyo kanyakla.
◼ Penjo gi Dwoko: Mana kaka itimo puonjruok Ohinga mar Jarito, migawoni nigi weche machuok michakogo kod mitiekogo, kendo ipenjo penjo e paragraf duto. Jal matayo onego otang’ kik owuo ahinya e migawoni. Inyalo som ndiko masiro thuond weche kaluwore gi thuolo mantie. Ok onego osom paragraf mak mana kowach ni mondo otim kamano.
◼ Wuoyo: Ma en twak moriwo paro ma jowinjo chiwo. Ok en mana twak kende, bende ok onego ogole kaka migawo mar penjo gi dwoko.
Kapo ni migawo moro nigi weche makende monego oluw, onego utem matek mondo uluw wechego. Ka joma nigi migawo e Chokruok mar Tijwa oluwo weche monyis malogo, gibiro miyo chokruogno “otimre maber kendo makare.”—1 Kor. 14:40.
◼ Ranyisi kod Penjo Ji: Kowach ni timuru ranyisi nyiso ni owadwa matayo migawoni nigi ting’ mar neno ni otim ranyisi e migawono; ok ochuno ni en owuon otim ranyisino. Jogo moyiero mondo otim ranyisino onego obed joma owinjore kendo ma gin ranyisi maber, kendo onego otim ikruok maber kodgi chon. Ka ber to ok onego oti gi jolendo mapok olony e timo ranyisi mana ni mondo giyud thuolo mar dhi e ndiri, kata obedo ni inyalo ti gi moko kuomgi e bedo weg udi. Jolendo matimo ranyisi onego omanyre gi jowinjo. Joma ipenjo penjo onego ochiw dwoko ka gin e ndiri to ok ka gibet e kombegi. Ranyisi mitimo kod penjo mipenjo ng’ato onego oik chon. Kapo ni seche modong’ tin kendo chuno ni owadwano ong’ad wechene e migawono, ok onego owe maok otimo ranyisi kata penjo ng’ato. Jokony-tich onego openj jachan bura mar jodongo, kata jaduong’ machielo kapok giyiero ng’at ma gibiro tiyogo e migawo moro.