Be Iikori ne Lendo Maok Ochan?
1. Ranyisi mane manyiso ni lendo maok ochan nyalo kelo nyak maber?
1 Lendo maok ochan nyalo kelo nyak maber ahinya. Muma oting’o ranyisi mang’eny mag lendo maok ochan ma ne okelo nyak mabeyo. (Joh. 4:7-15) Ang’o mwanyalo timo mondo waikre ne lendo maok ochan?
2. Ere kaka rwakruokwa nyalo konyo e bedo moikore ne lendo?
2 Rwakruokwa: Keto paro kuom rwakruokwa kinde duto biro miyo wabedo thuolo mar lendo ne jomoko. (1 Tim. 2:9, 10) Kapo ni waneno wichkuot nikech yo ma warwakorego, ok bi bedonwa mayot lendo. Kar mano, rwakruokwa maber, kod bedo maler nyalo miyo jomoko odwar ng’eyo gimomiyo. Kuom ranyisi, owadwa moro gi jaode ne obet machiegni gi dichwo moro ma Ja-Islam kane gidhi wuoth. Ja-Islamno noneno rwakruokgi maber, kendo nopenjogi kapo ni gin Jokristo. Mano ne omiyo giwuoyo e wi Muma kuom seche adek.
3. Ere kaka iseluwo ranyisi mar Yesu e chako wuoyo gi ji?
3 Chako Wuoyo gi Ji: Kane Yesu oromo gi chi Samaria e soko mar Jakobo, nochako wuoyo kode kokwaye pi modho. Kamano bende, wanyalo chako wuoyo gi ji kuom wacho wach moro e yo machuok kata chako gi penjo moro mayot. Kata obedo ni seche moko wanyalo bedo maluor, ka wageno kuom Jehova mondo okonywa, wanyalo ‘timo chir’ mi wachak wuoyo gi ng’ato.—1 Thes. 2:2.
4. Ere kaka wanyalo ikore ne lendo maok ochan?
4 Manyo Thuolo: Jolendo mang’eny oseyudo yore mag lendo maok gichano. Non ane chal mari, kendo iket e paro joma inyalo romogo e odiechieng’. Ting’ buge mowinjore kaachiel gi Muma. Bed ng’at ma ng’iyo gik matimore, kendo madewo joma nie bute. Ka iparo mokwongo kuom thuolo ma inyalo yudo e odiechieng’, ibiro ikri maber ne lendo.—Fili. 1:12-14; 1 Pet. 3:15.
5. Ang’o momiyo onego waikre maber ne lendo maok ochan?
5 Wan gi weche madongo ariyo momiyo watiyo gi thuolo moro amora e lendo maok ochan, wechego gin hero Nyasaye kod hero dhano wadwa. (Math. 22:37-39) Bedo ni tij lendo onego otim mapiyo, ber ka waikore ne lendo maok ochan. Onego waikre mar tiyo gi thuolo moro amora e lando ne jomoko wach maber mar Pinyruoth ka kinde pod nitie.—Rumi 10:13, 14; 2 Tim. 4:2.