Wan Joneno Kinde Duto
1. Ang’o mwanyalo puonjore kuom kaka Yesu nolendo ne dhako moro e but soko?
1 Yesu noyudo osewuotho kuom seche mang’eny. Nool kendo riyo noloye. E seche ma jopuonjrene nodhi ng’iewo chiemo, nobet but soko moro ma ne ni oko mar dala mar Samaria mondo oyue. Yesu ne ok odhi Samaria lendo; ne oyudo okalo ka odhi Galili mondo odhi nyime gi tije mar lendo kuno. Kata kamano, ne otiyo gi thuolono mondo olend ne dhako moro ma ne umbo pi. (Joh. 4:5-14) Ang’o momiyo? Yesu ne ok oweyo bedo “janeno migeno kendo madier” mar Jehova. (Fwe. 3:14) Waluwo ranyisi mar Yesu kuom bedo Joneno mag Jehova kinde duto.—1 Pet. 2:21.
2. Ere kaka wanyalo ikore ne lendo maok ochan?
2 Ikri: Wanyalo ikore ne lendo maok ochan kuom ting’o bugewa kinde duto. Jolendo mang’eny bedo gi trakt machiegni mondo gimi joma uso e duka, joma tiyo e stesen mag petrol, kod joma ginyalo romogo e odiechieng’. (Ekl. 11:6) Nyaminwa moro ma jadhiga wuoth neno ni nyaka oting’ Muma kod bug Muma Puonjo, kendo otemo chako wuoyo gi jogo mobet e dire.
3. Ere kaka wanyalo chako wuoyo gi ng’ato?
3 Chak Wuoyo gi Ng’ato: Seche mwalendo ka ok wachano motelo, ok ochuno ni nyaka wachak wuoyo e wi wach moro mawuok e Ndiko. Yesu ne ok ochako wuoyo gi dhako ma ne oyudo e dho soko kuom fwenyorene kaka Mesia. Ne okwayo mana pi modho mondo dhakono openje penjo. (Joh. 4:7-9) Nyaminwa moro yudo ni tiyo gi yorno konye e chako wuoyo gi joma penje kapo ni notimo nyasi mar Krismas kata moko mag odiechienge yueyo. Kar dwoko ni ne ok otimo nyasigo nikech en achiel kuom Joneno mag Jehova, ojawacho ni, “Asetimo yiero mara awuon mondo kik atim nyasigo.” Ng’at mapenjeno kinde mang’eny medo penje gimomiyo, to mano miyo nyaminwano thuolo mar lendo.
4. Ang’o momiyo Mathayo 28:18-20 jiwi?
4 Kata obedo ni Yesu ne otieko tije mar lendo ma ne otimo gi kinda e pinyka, pod omor ahinya gi tij lendo ma itimo mana kaka notimo. (Math. 28:18-20) Omiyo, kaka Yesu jal ma en Ranyisiwa, wan Joneno moikore wuoyo kuom yiewa e kinde moro amora.—Hib. 10:23.