Be Awinjora Tiyo Tij Lendo?
1. Ang’o momiyo ok onego wane ni ok wawinjore tiyo tij lendo?
1 Kapo ni isepenjori kamano, kik iluor! Ok en rieko miyudo e skul kata nyalo monyuolwago e mamiyo wabedo mowinjore tiyo tij lendo. Moko kuom jopuonjre machon ne owach ni gin “jopoya gi jo makiya.” Kata kamano, ne gin jolendo molony mag wach maber nikech ne giketo chunygi kuom luwo ranyisi mar Yesu.—Tich 4:13; 1 Pet. 2:21.
2. Yesu ne puonjo e yo machalo nade?
2 Kaka Yesu Nopuonjo: Yesu ne puonjo e yo mayot ma ng’ato ang’ata ne nyalo winjo. Penjo, ranyisi kaachiel gi yore mayot ma notiyogo e chako wuoyo gi ji ne ywayo pach jowinjo mage. (Math. 6:26) Nodewo ji gadier. (Math. 14:14) E wi mano, Yesu ne wuoyo gi chir kendo kaka ng’ama ni gi teko kong’eyo ni Jehova noore kendo omiye teko mar chopo migawone.—Luka 4:18.
3. Ere kaka Jehova konyowa chopo tijwa mar lendo?
3 Jehova Konyowa: Kokalo kuom Wachne kod riwruok mare, Japuonjwa Maduong’ chiwo tiegruok madwarore mondo omi waland wach maber e yo makare. (Isa. 54:13) Nikech Jehova noyie mondiki weche kuom kaka Yesu ne puonjo, wanyalo nono kendo luwo yorene mag puonjo. Jehova miyowa roho mare maler kendo otiegowa kokalo kuom chokruoge mag kanyakla. (Joh. 14:26) E wi mano, omiyowa jolendo molony manyalo konyowa medo lony ma wan-go.
4. Ang’o momiyo onego wane ni wawinjore lando wach maber ne jomoko?
4 Wan gi gimomiyo onego wane ni wawinjore tiyo tij lendo nikech nyalo ma wan-go “a kuom Nyasaye.” (2 Kor. 3:5) Ka wageno kuom Jehova kendo tiyo maber gi gigo momiyowa, wabiro ‘bedo molony, kendo moikore chuth ni tich mabeyo duto.’—2 Tim. 3:17.