Gima Duong’ e Ngimawa
1. Ere kaka Yesu nonyiso ni tij lendo ema ne duong’ e ngimane?
1 Tij lendo e gima ne duong’ e ngima Yesu. Notiyo matek ahinya, kowuotho kuonde maboyo e piny Palestina duto mondo olend ne ji mang’eny kaka nyalore. Nodak e ngima mayot mondo oyud thuolo momedore kendo oket pache e tij lendo. (Math. 8:20) Kane oganda temo geng’e ka chune mondo ochang joggi matuwo, nowacho kama: ‘Onego ayal wach maber mar pinyruodh Nyasaye e mier moko bende, nikech ma e momiyo noora.’—Luka 4:43.
2. Ang’o momiyo tij lendo ne en gima duong’ ahinya e ngima Yesu?
2 Ang’o momiyo tij lendo ne en gima duong’ ahinya e ngima Yesu? Dwaro mare maduong’ ne en ni nying’ Jehova obed maler. (Math. 6:9) Nohero Wuon-gi me polo, omiyo nogombo chopo dwache kendo rito chikene duto. (Joh. 14:31) E wi mano, nodewo ji gadier kendo nodwaro konyogi.—Math. 9:36, 37.
3. Ere kaka wanyalo nyiso ni tij lendo e gima duong’ e ngimawa?
3 Luw Ranyisi mar Yesu: Siko ka wan gi paro ma Yesu ne nigo kuom tij lendo nyalo bedo gima tek nikech piny dwaro ni wati gi seche mang’eny e gik mamoko, kendo oting’o gik mang’eny magalo paro. (Math. 24:37-39; Luka 21:34) Kuom mano, nyaka waket gik madwarore ahinya obed mokwongo e ngimawa, keto tenge thuolo mar timo ikruok kaachiel gi lendo pile. (Fili. 1:10) Watimo kinda mondo wasik ka wadak e ngima mayot kendo ok wadwar tiyo gi pinyni chuth.—1 Kor. 7:31.
4. Ang’o momiyo dwarore ni wasik ka wakawo tij lendo kaka tich maduong’ e kindegi?
4 E kinde ma thuolo tin, ng’at mariek kwongo timo gima dwarore ahinya. Kuom ranyisi, kowinjo ni masira moro chiegni timore, obiro tiyo gi sechene e timo ikruok mondo orit joode e kindeno kendo chiwo siem e wi masirano ne jogo modak machiegni kode. Gik maok ochuno ahinya inyalo tim bang’e. Odong’ kinde machuok to masira mar Har-Magedon timore. (Zef. 1:14-16; 1 Kor. 7:29) Mondo wares ngimawa kaachiel gi mar jogo ma winjowa, nyaka waritre wawegi kendo rito weche mwapuonjo, bed ni wan e kanyakla kata oko mar kanyakla. (1 Tim. 4:16) Mondo oreswa, nyaka waket tij lendo obed gima duong’ e ngimawa!