Be Ibiro Chako Puonjruok mar Muma gi Ji e Dwe mar Oktoba?
1. Ang’o mibiro tigo e tij lendo e dwe mar Oktoba?
1 Wabiro chiwo gasede mag Ohinga mar Jarito kod Amkeni! e dwe mar Oktoba. Seche ma wadok timo limbe ne joma norwako wach, ijiwowa mondo wati gi trakt mar Bende Diher Ng’eyo Adiera? kendo timo kinda mar chako puonjruok Muma. Ere kaka wanyalo timo kamano seche ma wadok timo limbe?
2. Ere kaka wanyalo tiyo gi trakt mar Ng’eyo Adiera e chako puonjruok mar Muma seche ma wadok timo limbe ne ng’at ma nokawo gasedewa?
2 Kaka Inyalo Ti gi Traktni: Wanyalo wacho kama: “Gasede ma ne aweyonika jiwo ji mawuok kuonde mopogore opogore kod din mopogore opogore mondo onon Muma. [Mi wuon ot trakt mar Ng’eyo Adiera, kendo inyise penjo manie e ng’e traktno.] Magi gin moko kuom penjo machando ji ma Muma chiwo dwokogi e yo mawinjore malong’o. Be isepenjori achiel kuom penjogi?” Bang’ winjo dwoko mar wuon ot, nonuru kode dwoko ma traktno chiwo kuom penjo moyiero, kae to isom achiel kuom ndiko mochiw. Bang’e to inyise ni mano en mana achiel kuom gik ma Muma puonjo, kae to imiye bug Muma Puonjo. Bang’ mano wanyalo wuoyoe paragraf motelo mag sula moyiero e achiel kuom weche mantie. Kata wanyalo tiyo gi sula mwayiero mondo wayud weche mathoth kuom gima wasewuoyoe e traktno. Magi gin moko kuom ite mwanyalo tiyogo:
● Bende Nyasaye dewowa kuom adier? (ite mag 10-11, par. 6-10)
● Bende lweny gi chandruok chieng’ norum? (ite mar 12, par. 12-13)
● Ang’o matimore ka ng’ato otho? (ite mag 59-60, par. 7-8)
● Bende nitie geno ni joma otho? (ite mar 71, par. 13-15)
● Ere kaka anyalo lemo mondo Nyasaye owinja? (ite mag 166-167, par. 5-8)
● Ere kaka anyalo yudo mor e ngima? (ite mar 9, par. 4-5)
3. Ere kaka wanyalo lendo ne ji e yo mopogore opogore kaluwore gi chal margi?
3 Kapo ni ok nyalre chako puonjruok kata nyiso wuon ot kaka itimo puonjruok mar Muma ka watiyo gi bug Muma Puonjo e limbe ma wakwongo dok timo, pod wanyalo timo chenro mar dok kendo dhi nyime gi wach ma ne wachako wuoyoe. Kendo kaluwore gi kaka wuon ot rwako wach, wanyalo neno ni owinjore wuoyo kuom penjo mokalo achiel e traktno e limbe moko kapok wamiye bugni. Mad wamed tiyo gi trakt makonyo ahinyani e dwe mar Oktoba mondo wachakgo puonjruok Muma gi ji kendo konyo jogo moikore winjo wach mondo ‘ong’e adiera.’—Joh. 8:31, 32.