Dibed ni Chon ne In Painia Mapile?
1. En thuolo mane makende ma jomoko oseyudo, kata kamano, osechuno moko kuomgi timo ang’o?
1 Kuom higini mathoth, ji mang’eny oseyudo thuolo makende kuom “puonjo kendo yalo” wach maber e thuologi duto. (Tich 5:42) Kata kamano, gik mopogore opogore osemiyo moko kuomgi oweyo bedo jopainia. Kapo ni chon ne in painia mapile, be isenonoe ka sani inyalo bedo painia kendo?
2. Ang’o momiyo joma ne gin jopainia chon onego onon kit ngimagi sani?
2 Kit Ngima Lokore: Nyalo bedo ni gik ma nomiyo iweyo bedo painia sani koro onge. Kuom ranyisi, kane iweyo bedo painia nikech ne ok inyal chopo seche 90 e dwe, be inyalo bedo painia kendo nikech seche moketi koro gin 70 e dwe? Dibed ni koro tiji ok odiyi ahinya kata ting’ ma in-go mar rito joot koro odok chien kopim gi kinde ma ne in painia? Nyaminwa moro ma noweyo bedo painia nikech tuwo nochako bedo painia kendo ka en jahigini 89. Nosebedo ka ok odhi osiptal kuom kinde mokalo higa achiel kendo noneno ni tuwo koro ok chande ahinya, omiyo nobedo painia kendo!
3. Ere kaka joot nyalo winjore mondo gikony achiel kuomgi obed painia?
3 Samoro in ne pok ibedo painia, kata kamano, nyalo bedo ni achiel kuom joodu ne en paina chon, to nochune weyo nikech ting’ mar rito achiel kuom joodu, kaka janyuol ma koro hike ng’eny. (1 Tim. 5:4, 8) Ka en kamano, be nyalore mondo in kata joodu mamoko okony e ting’ ma kamano? Donge nyalo bedo maber ka uwuoyo e wachni kaka joot? (Nge. 15:22) Ka joot owinjore mi ng’at achiel kuomgi obedo painia, joot duto nyalo neno ni giriwe lwedo.
4. Ang’o minyalo timo kapo ni sani ok inyal bedo painia mapile kendo?
4 Kik chunyi tho ka kit ngimani pod ok yieni bedo painia kendo. Bedo gi chuny moikore kamano miyo Jehova mor. (2 Kor. 8:12) Ti gi lony ma ne iyudo kaka painia e tij lendo mitimo sani. Ket gombo ma in-gono e lamo, kendo inyalo timo lokruok madwarore e ngimani kapo ni thuolo moro oneno. (1 Joh. 5:14) Samoro kuom kinde mowinjore Jehova nyalo yawoni “dho ot malach mar tich” mondo ichak inwang’ mor kuom bedo painia mapile!—1 Kor. 16:9.