Be Ipuonjori Duto Minyalo Kowuok Kuom Jehova?

1. Jehova neno nade wach puonjruok?

¹ Jehova ma e ‘Japuonjwa Maduong’,’ dwaro ni wapuonjre. (Isa. 30:20, NW) Nochako puonjo mana bang’ chweyo Wuode makayo. (Joh. 8:28) Jehova ok noweyo puonjo bang’ ka Adam noseng’anjo, to nonyiso herane kuom chiwo puonj ne dhano morem.—Isa. 48:17, 18; 2 Tim. 3:14, 15.

2. En kampen mane mar puonjruok masani dhi nyime?

² E kindegi, Jehova tayo kampen maduong’ mar puonjruok mapok none e kinde moro amora mosekalo. Mana kaka Isaya nokoro, milionde mag ji e piny ngima sani biro e got mar ranyisi “ka ma od Jehova obetie.” (Isa. 2:2) Ang’o momiyo onego wadhi e got mar ranyisino? Mondo Jehova opuonjwa yorene! (Isa. 2:3) E higa mar tijwa ma 2010, Joneno mag Jehova notiyo gi seche mokalo bilion 1.6 e lando kendo puonjo ji adiera mag Muma. E wi mano, ipuonjo wach Nyasaye juma ka juma e kanyakla mokalo 105,000 e piny ngima, kendo jatichno mogen kendo mariek goyo buge mag Jokristo e dhok mokalo 500.

3. In iwuon iseyudo ber mage kuom puonj ma Jehova chiwo?

³ Yud Ber Chuth: Waseyudo ber ahinya kuom puonj ma Nyasaye chiwo. Wasepuonjre ni Nyasaye nigi nying kendo ni odewowa ahinya. (Zab. 83:18; 1 Pet. 5:6, 7) Waseyudo dwoko mag moko kuom penjo madongo e ngima kaka: Ang’o momiyo dhano chandore kendo tho? Ere kaka anyalo yudo mor madier? Ang’o momiyo wangima? Jehova bende osemiyowa chike matayowa mondo ‘wami yorewa obed maber.’—Josh. 1:8.

4. Moko kuom tiegruok ma jotich Nyasaye nyalo yudo gin mage, to ang’o momiyo onego wapuonjre duto mwanyalo kuom gik ma Jehova puonjo?

⁴ E wi mano, Jehova osetimo chenro mar chiwo tiegruok makende mondo okony jotichne mathoth madwaro tiyone e okang’ momedore. Chenro mag tiegruokgo onyis e ite mag 4-6. Kata kapo ni sani kit ngimawa ok oyienwa yudo tiegruok monyisgo, be watimo duto ma wanyalo mondo wayud ber chuth kuom puonj ma Nyasaye chiwonwa waduto ma kit ngimawa nyalo yienwa yudo? Be wajiwo rowere mondo oket chenro mar tiyo ne Nyasaye ka gitiyo gi somo maber moloyo ma Jehova chiwo, kar luwo chenro ma jopuonj e skunde kaachiel gi jomamoko ma kinde mang’eny jiwogi mondo giluw mar yudo somo mamalo e pinyni? Ka watimo duto mwanyalo mondo wapuonjre gik ma Jehova chiwo, mano biro miyowa mor e kindegi kod ngima mochwere e kinde mabiro.—Zab. 119:105; Joh. 17:3.

Moko Kuom Tiegruok Mayudore e Riwruok mar Oganda Jehova

Klase mag Puonjruok Somo

• Gimomiyo Itime: Mondo opuonj ji somo kod ndiko eka gin bende gitim puonjruok margi giwegi mar Muma kaachiel gi puonjo jomamoko adiera.

• Kinde Mokawo: Kaluwore gi dwaro ma nitie.

• Kama Itime: E Od Romo.

• Joma Nyalo Dhiye: Jolendo duto kaachiel gi ng’ato ang’ata morwako adiera.

• Kaka Ng’ato Donjoe: Kaluwore gi dwaro ma nitie, jodong-kanyakla nyalo chano mondo ochak klasego kendo jiwo ji duto ma diher bedoe mondo otim kamano.

Skul mar Tij Nyasaye

• Gimomiyo Itime: Mondo otieg jolendo olend kendo opuonj wach maber e yo molony.

• Kinde Mokawo: En skul ma dhi nyime.

• Kama Itime: E Od Romo.

• Joma Nyalo Donjoe: Jolendo duto. Jomoko bende matimo kinda e kanyakla, moyie gi puonj mag Muma kendo ma kit ngimagi owinjore gi chike mag Jokristo.

• Kaka Ng’ato Donjoe: Wuo gi jal marito Skul mar Tij Nyasaye.

Klase mag Puonjruok Dhok Mawendo

• Gimomiyo Itime: Mondo opuonj jolendo kaka ginyalo lando wach maber e dhok machielo.

• Kinde Mokawo: Dweche ang’wen kata abich. Kinde mang’eny itimo klasegi chieng’ Ngeso okinyi kuom sa achiel kata seche ariyo.

• Kama Itime: Ng’enyne itime e Od Romo mani machiegni.

• Joma Nyalo Dhiye: Jolendo ma gin ranyisi maber kendo ma diher lendo e alwora miwachoe dhok mawendo.

• Kaka Ng’ato Dhiye: Ofis ema chano klasegi kaluwore gi dwaro ma nitie.

Gero Od Romo

• Gimomiyo Itime: Mondo oger kendo uro Ute Romo. Mae ok en skul, kata kamano kokalo kuom chenroni ipuonjo joma ochiwore mondo oyud lony mopogore opogore ma ginyalo konyogo e gero utego.

• Kinde Mokawo: Kaluwore gi chal mar ng’at mochiwore.

• Kama Itime: Kamoro amora manie bwo Komiti Mochung’ne Tije Gedo e Alwora kata kamoro machielo seche ma joma ochiwre tiyo gi Grup mar Gero Ute Romo. Inyalo kwa jochiwre moko mondo odhi okony kuonde ma masira moro otimore.

• Gik Madwarore: Owete gi nyimine mosebatisi kendo bura mar jodongo nyaka pwodhgi. Ginyalo bedo gi lony moro kata ginyalo bedo maonge lony.

• Kaka Ng’ato Nyalo Oro Kwayo: Pong’ fom mar Kingdom Hall Volunteer Worker Questionnaire (S-82) kata Application for Kingdom Hall Construction Volunteer Program (A-25) mayudore kuom jodong-kanyaklau.

Skul mar Jopainia

• Gimomiyo Itime: Mondo okony jopainia ‘chopo tich duto momigi.’—2 Tim. 4:5.

• Kinde Mokawo: Jumbe ariyo.

• Kama Itime: Ofis ema ng’ado; kinde mang’eny itime e Od Romo mani machiegni.

• Gik Madwarore: Jogo mosebedo jopainia mapile kuom kinde maromo higa achiel.

• Kaka Ng’ato Dhiye: Jopainia mowinjore ema dhi e skundno, kendo jarit-alwora ema nyisogi.

Skul mar Joma Nyien e Bethel

• Gimomiyo Itime: Skundni ochan mondo okony joma nyien e Bethel mondo ochop migepegi e yo makare.

• Kinde Mokawo: Sa achiel juma ka juma kuom jumbe apar gauchiel.

• Kama Itime: E Bethel.

• Gik Madwarore: Nyaka ng’ato obed jakanyo mar jood Bethel kata mosetiyo kaka joma chiwore kuom kinde malach (higa achiel kata mokalo).

• Kaka Ng’ato Donjoe: Jood Bethel mowinjore kende ema dhiye.

Skul mar Tij Pinyruoth

• Gimomiyo Itime: Mondo okony jodongo kod jokony-tich chopo migepe kod ting’ momigi e riwruok mar oganda Nyasaye. (Tich 20:28) Skundni itimo bang’ higini matin kaluwore gi kaka Bura Maduong’ ong’ado.

• Kinde Mokawo: E higini matin mosekalo, jodongo osebedo ka dhi e skundni odiechieng’ achiel gi nus, to jokony-tich dhi odiechieng’ achiel.

• Kama Itime: Kinde mang’eny itime e Od Romo kata Od Chokruok mar Alwora mani machiegni.

• Gik Madwarore: Nyaka ng’ato obed jaduong’ kata jakony-tich.

• Kaka Ng’ato Dhiye: Jarit-alwora ema gwelo jodongo kaachiel gi jokony-tich mowinjore.

Skul mar Jodong-kanyaklaa

• Gimomiyo Itime: Mondo okony jodongo ochop ting’ ma gin-go e kanyakla.

• Kinde Mokawo: Ndalo abich.

• Kama Itime: Ofis ema ng’ado; kinde mang’eny itime e Od Romo kata Od Chokruok mar Alwora mani machiegni.

• Gik Madwarore: Nyaka ng’ato obed jaduong’-kanyakla.

• Kaka Ng’ato Dhiye: Ofis ema gwelo jodong-kanyakla mowinjore.

Skul mar Jorit Malworo kod Mondegib

• Gimomiyo Itime: Mondo okony jorit-alwora gi jorit-distrikt omed lony e tiyo ne kanyakla kod “tiyo matek tich mar yalo kendo puonjo,” kod rito kweth manie bwogi.—1 Tim. 5:17; 1 Pet. 5:2, 3.

• Kinde Mokawo: Dweche ariyo.

• Kama Itime: Ofis ema ng’ado.

• Gik Madwarore: Nyaka ng’ato obed jarit-alwora kata jarit-distrikt.

• Kaka Ng’ato Dhiye: Ofis ema gwelo jorit malworo mowinjore kaachiel gi mondegi.

Skund Muma ne Owete Maok Nie Kendc

• Gimomiyo Itime: Mondo oik jodong-kanyakla kod jokony-tich maok nie kend ne migepe momedore. Ng’eny joma odhi e skundni ibiro mi migawo mar konyo e alwora ma jolendo dwarore e piny ma giwuokie. Matin kuomgi to nyalo yudo migawo mar dhi konyo e piny machielo kapo ni ginyiso ofis ni mano nyalore.

• Kinde Mokawo: Dweche ariyo.

• Kama Itime: Ofis ema ng’ado; kinde mang’eny itime e Od Chokruok mar Alwora kata e Od Romo.

• Gik Madwarore: Owete maok nie kend ma hikgi nie kind 23 kod 62 maok tuwore ahinya kendo madwaro keto dwaro mag owetegi kod mag Pinyruoth motelo. (Mari. 10:29, 30) Nyaka gibed joma osebedo jokony-tich kuom higini ariyo kata jodongo.

• Kaka Ng’ato Dhiye: Kapo ni skundni itimo e alwora manie bwo ofisu, romo mar jogo ma diher dhi e skundni itimo e chokruok mar alwora. Weche moko momedore iwacho e romono.

Skund Muma ne Jokristo Mokendored

• Gimomiyo Itime: Mondo jogo mokendore oyud tiegruok makende mondo Jehova kod riwruok mare oti kodgi e okang’ malach. Ng’eny joma odhi e skundni ibiro mi migawo mar konyo e alwora ma jolendo dwarore e piny ma giwuokie. Matin kuomgi to nyalo yudo migawo mar dhi konyo e piny machielo kapo ni ginyiso ofis ni mano nyalore.

• Kinde Mokawo: Dweche ariyo.

• Kama Itime: Klase matin mokwongo sani dhi nyime e Watchtower Educational Center e Patterson, New York, Amerka. Kae to bang’e, skundni ibiro tim kuonde mopogore opogore ma ofis oyiero, inyalo time e Od Chokruok mar Alwora kata e Od Romo.

• Gik Madwarore: Jogo mokendore ma hikgi nie kind 25 kod 50 maok tuwore ahinya, manyalo dhi lendo kamoro amora ma jolendo dwarore kendo ma nigi chuny mar: “An ka; ora.” (Isa. 6:8) E wi mano, onego gibed joma osekendore kuom higini ariyo kendo gisebedo e tij Nyasaye e thuologi duto kuom higini ariyo maok giweyo.

• Kaka Ng’ato Dhiye: Kapo ni skundni itimo e alwora manie bwo ofisu, romo mar jogo ma diher dhi e skundni itimo e chokruok makende mar alwora. Weche moko momedore iwacho e romono.

Skul mar Gilead

• Gimomiyo Itime: Mondo otieg jopainia kod jomamoko matiyo ne Nyasaye e thuologi duto e tij bedo jomisonari.

• Kinde Mokawo: Dweche abich.

• Kama Itime: Watchtower Educational Center, Patterson, New York, Amerka.

• Gik Madwarore: Onego gibed joma nie kend, ma nobatisi higini adek kadhi nyime kendo ma hikgi nie kind 21 kod 38 e kinde ma gioro fom mokwongo mar kwayo dhi e skundno. Nyaka gibed joma wacho dho Ingresa, mosebedo e kend kuom higini ariyo, kendo sama gioro fomno onego obed ni gisetiyo ne Nyasaye e thuologi duto kuom higini ariyo kendo podi gidhi nyime. Ok onego gibed joma tuwore ahinya. Jogo ma bende nyalo kwayo dhi e skundni kapo ni gichopo gik madwarore gin jopainia matiyo e piny machielo (moriwo nyaka jogo manie migepe machalo kaka jomisonari); jorit malworo; jood Bethel; kod joma osedhi e Skul mar Tiego Owete e Tije Kanyakla, Skund Muma ne Owete Maok Nie Kend, kod Skund Muma ne Jokristo Mokendore.

• Kaka Inyalo Dhiye: E ofise moyier, romo mar joma diher dhi e skundni ojatim e chokruog-distrikt. Weche moko momedore iwacho e romono. Kapo ni romono ok tim e chokruog-distrikt e pinyu to diher dhi e skundno, inyalo ndiko ne ofis maru mondo iyud weche moko momedore.

Skul mar Jokomiti Matayo Bad Ofis kod Mondegi

• Gimomiyo Itime: Mondo okony joma nie Komiti mag Bede Ofise e tijegi mag tayo Bethel, weche motudore gi tij lendo e kanyakla, rito alwora kod distrikt manie piny kata pinje me bwogi, tayo tij loko buge e dhok mowinjore, goyogi, koda terogi kuonde mopogore opogore, kaachiel gi rito migepe mamoko e Bethel.—Luka 12:48b.

• Kinde Mokawo: Dweche ariyo.

• Kama Itime: Watchtower Educational Center, Patterson, New York, Amerka.

• Gik Madwarore: Jogo manie Komiti mag Bede Ofise kata manie Komiti mar Piny kata jogo ma ibiro ket e migepego bang’ wuok e skundno.

• Kaka Ng’ato Dhiye: Bura Maduong’ ema gwelo owete mowinjore kaachiel gi mondegi.

[Weche moler piny]

[Penjo mag Puonjruok]