Sandug Penjo

◼ Ng’ano monego opong’ fom mar kwayo buge kata puonjruok mayudore e ng’e bugewa kata e Intanet?

Ng’eny bugewa nigi fom ma ng’ato nyalo tiyogo e kwayo buge kata puonjruok mar Muma monyalo pong’o kendo oro ne bad ofis mar Joneno mag Jehova. E wi mano, Websait marwa mar www.watchtower.org bende inyalo tigo e kwayo puonjruok mar Muma. Ji mang’eny puonjore adiera kokalo kuom chenrogi. Kata kamano, pek osebedoe seche ma jolendo moko tiyo gi chenrogo e kwayo buge kata puonjruok mar Muma ne wedegi kata jomamoko.

Jomoko oseng’ur bang’ yudo buge ma ofis ooronegi to ne ok gikwayo, ka gineno ni riwruokwa chunogi mondo gikaw bugego kata oketogi e kwan mar joma gioronegi buge. Jolendo moko ma oseor ir ng’at ma ne ok okwayo mondo olime gi Joneno, oseyudo wichkuot ka ng’atno nyisogi ni ne ok okwayo mondo ng’ato ang’ata olime. Kuom mano, jogo morwako wach ema onego oor kwayo e Websait marwa kata pong’o fom ka gikwayo mondo oornegi buge kata jalendo moro mondo opuonjre Muma kodgi, to ok ni jolendo oro kwayogo e logi. Kapo ni ofis ofwenyo ni kwayo ma kamago oor e lo jomamoko, ok gibi chiwo gik ma okwago.

Koro, ere kaka wanyalo konyo watwa kata osiepwa moro e weche Nyasaye? Kapo ni diher mondo oorne buge, donge nyalo bedo maber ka in iwuon iorone kaka mich? Kapo ni onyiso ni doher puonjruok kendo odwaro ni Joneno olime to ok ing’eyo kaka inyalo tudori gi jodongo manie alwora ma owuokie, onego ipong’ fom mar Tafadhali Fuatia Upendezi (S-43) kendo imi jagoro mar kanyaklau, mabiro nono fomno kae to ore ne ofis. Kata kamano, kapo ni jalo otwe e jela, kata en kuonde ma iketoe jogo ma ne tiyo gi yedhe mamero mondo pachgi oduogi, kata en e osiptal moro mar sirkal, ok onego oor ne ofis fomno. Kar mano, onego ujiw ng’atno mondo owuo gi owete ma jolimo kuonde kaka mago kata ni mondo en owuon ondik ne ofis.