Sandug Penjo

◼ Be jolendo onego olend ne joma gikia manie pinje mamoko kata puonjre kodgi Muma ka gitiyo gi Intanet?

Nitie jolendo moko ma osetiyo gi Intanet e chako puonjruok mar Muma gi joma nie pinje mogoe Joneno marfuk, kata manie pinje ma jolendo tinie. Jolendo moko oseyudo nyak kuom timo kamano. Kata kamano, nitie hinyruok ma nyalo bedoe sama jolendo otudore gi joma gikia ka gitiyo gi yore mag tudruok ma yudore e Intanet. (Som Tijwa mar Pinyruoth ma Julai 2007, ite mar 3.) Kata obedo ni gombo maduong’ ma jalendo nigo sama olendo gi Intanet en nyiso ji wach Pinyruoth, tudruok ma kamago nyalo miyo owadwa kata nyaminwa moro ochak tudore gi joma richo kaka joma ong’anyo moweyo adiera. (1 Kor. 1:19-25; Kol. 2:8) E wi mano, e pinje ma ogo tij Joneno marfuk, sirkal nyaloga nono tudruok ma kamago. Omiyo, mano nyalo keto ngima owete kod nyimine man kuondego kama rach. Kuom mano, jolendo ok onego oti gi Intanet e manyo joma odak e pinje mamoko mondo gilandnegi wach maber.

Kapo ni walendo ne ng’at ma a e piny machielo, ok onego watem tudore kode kosedok thurgi, mak mana kapo ni bad ofis ma tayo tij lendo e alworawa onyisowa ni wanyalo dhi nyime tudore kode. Kar mano, wanyalo nyiso ng’atno kaka onyalo donjo e Websaitwa mar jw.org mondo oyud weche momedore, kata wanyalo nyise kaka onyalo tudore gi bad ofis ma korgi. Bende, wanyalo jiwe mondo omany Od Romo man machiegni gi kama odakie e pinygi. En adier ni nitie pinje moko ma onge Od Romo. Kapo ni ng’atno diher mondo Joneno olime, onego wapong fom mar Tafadhali Fuatia Upendezi (S-43), kendo wami jagoro mar kanyakla mondo oore ne ofis kotiyo gi jw.org. Bad ofis ma tayo tijwa e piny ma ng’atno wuokie ong’eyo maber chal mar pinyno kendo gibiro chiwo kony mowinjore mondo omed kony ng’atno e wach Nyasaye.—Som Tijwa mar Pinyruoth ma Jun 2014 ite mar 7, kod ma Novemba 2011 ite mar 2.

Kapo ni ng’at ma wapuonjrego Muma sani odar modhi e piny machielo, kata kapo ni sani wapuonjre gi ng’at mwakia modak e piny machielo e yor Intanet, onego waluw weche ma onyiswa malogo. Kata kamano, podi wanyalo dhi nyime puonjore kode nyaka chieng’ noorne jalendo moro manie alworagi. Onego wabed motang’ ahinya sama watudore kode kwatiyo gi barua, simo, kata yore mamoko mag tudruok, kapo ni odak e piny ma tijwa ogoye marfuk.—Mat. 10:16.