Bed Motang’ Sama In e Tij Lendo
1. Ang’o momiyo dwarore ni wabed motang’ sama walendo?
1 Mana ‘kaka rombe manie dier ondiegi,’ jotich Nyasaye lendo e “kind tieng’ mobam kendo mokethore.” (Math. 10:16; Fili. 2:15) Ripode mag tungni mag siasa, timbe gero, kod jomahundu mamako ji mondo giyudgo pesa gin gik matimore pile manyiso ni ji medo “bedo marach moloyo.” (2 Tim. 3:13) Gin puonj mage mag Ndiko manyalo konyowa ‘bedo mariek’ kata motang’ sama wan e tij lendo?—Math. 10:16.
2. Gin kinde mage manyalo bedo maber ka wawuok e alwora moro ma walendoe kendo dhi e machielo?
2 Bed Mariek: Ngeche 22:3 nyiso maler ni ka ‘wapondo’ sama waneno masira, mano en tim rieko. Bed motang’! Alwora ma nenorega ni okuwe nyalo lokore apoya nono. Samoro inyalo neno ka kwan mar polise kata ji medore e yo. Seche moko wuon ot maber nyalo nyisi gimarach madhi nyime e alwora. Kar ywari kanyo kidwaro neno gima timore, nyalo bedo tim rieko ka iwuok kanyo mapiyo.—Nge. 17:14; Joh. 8:59; 1 Thes. 4:11.
3. Puonj mayudore e Eklesiastes 4:9 tiyo nade sama walendo?
3 Tem Kik Ilend Kendi: Eklesiastes 4:9 wacho ni ‘ji ariyo oloyo achiel gi ber.’ Nyalo bedo ni iseng’iyo gi lendo kendi e kinde mosekalo, kata kamano, be mano pod ber e kindegi? Kuonde moko mano nyalore. Kata kamano, kuonde moko to ok ber ka nyaminwa moro kata jalendo ma hike tin olendo kende e ot ka ot, to moloyo ka chieng’ osepodho. Weche mosene nyiso ayanga ni lendo gi ng’at machielo motang’ ber moloyo. (Ekl. 4:10, 12) Ng’ato ka ng’ato manie grup mar dhi lendo onego ong’e kuma jowadgi nitie. Seche miwuok e alwora mar lendo, temga nyiso jomamoko kapok iwuok.
4. Ere kaka wanyalo konyo e rito jolendo duto e kanyaklawa?
4 Nikech jodongo ema ‘rito chunywa,’ gin gi ting’ mar tayowa kaluwore gi chal mar alwora. (Hib. 13:17) Ka wariwogi lwedo chuth gi chuny mamuol kaka Jokristo, wanyalo bedo gadier ni Jehova biro gwedhowa. (Mika 6:8; 1 Kor. 10:12) Mad waduto kaka jotich Nyasaye wadhiuru nyime gi chiwo neno e alworawa, ka kinde duto wabedo motang’.