Wach ma Nyasaye Wachonwa Kokalo Kuom Jeremia
1. En buk mane ma ne wayudo e chokruog-distrikt ma 2010, to wabiro tiyo kode nade?
1 Mano kaka ne wamor kane wayudo buk manyienni e Chokruog-Distrikt ma 2010 ma wiye ne wacho ni “Siki Machiegni gi Jehova!” Bugni lero puonj mayudore e buge mag Yeremia kod Yuagruok manyalo konyowa e ngimawa mapile. (Rumi 15:4) Nikech olose mondo oti kode e Puonjruok Muma e Kanyakla, ibiro chak none e juma mar Novemba 5, 2012.
2. Ang’o momiyo wanyalo yudo ber kuom nono buge mag Muma mag Yeremia kod Yuagruok?
2 Okonyo e Kindegi: Jeremia ma e jandik bug Muma mokudh gi much Nyasayeni ne en janabi e kinde ma piny Juda ne nigi tungni ahinya. Mokwongo, noparo ni ne ok owinjore gi migawono. (Yer. 1:6) Bende osiepene ne sande, to nyalo bedo ni kata mana wedene mawuok Anathoth kuma nonyuolee bende ne sande. (Yer. 11:21, 22) Omiyo ok kawwa gi wuoro ni chuny Jeremia ne nyosore kinde moko. (Yer. 20:14) Sama wachopo migawo momiwa mar ‘timo ogendini duto jopuonjre,’ kinde ka kinde waromo gi pek mana kaka ma Jeremia noromogo. (Math. 28:19) Nono weche ma nondiko biro konyowa tiyo tijwa mar lendo ka wan gi kinda kod chir.
3. Ere kaka wabiro tiyo gi kuonde mopogore opogre e bug Jeremia?
3 Kaka Olose: Ndiko madongo monego osom e kinde mag puonjruok ondik gi nyukta mopiel. E giko puonjruok mar juma ka juma nitie penjo achiel kata ariyo mondiki gi nyukta momorore mondo ojiw weche madongo ma ua puonjoru. Onego openj penjogi sama unwoyo gik musepuonjoru. Bugni bende nigi pichni mabeyo maonge kiawa ni jo kanyakla biro dwaro wuoyoe.
4. Ere kaka wanyalo yudo ber chuth sama wanono bug Jeremia?
4 Mondo bugni okonyi chuth, ne ni itimo ikruok motelo. Tem manyo weche minyalo tiyogo e ngimani kod e tij lendo. Tem matek mondo ichiw paro e chokruok ka chokruok. Jehova nogwedho Jeremia mochopo migawone ka en gi mor mogundho. (Yer. 15:16) Mad buk manyienni konywa tiyo tijwa mar lendo mana kaka Jeremia notimo.