Sandug Penjo

◼ Gin puonj mage mag Muma monego otawa kuom wach tiyo gi simbe mag lwedo ka wan e chokruogewa kata e tij lendo?

‘Gik Moko Duto Nigi Kinde Mowinjorenegi.’ (Ekl. 3:1): Simbe mag lwedo kata ong’we-yamo konyowa wuoyo gi joma onge machiegni kodwa kata oronegi ote machuok sa asaya. Kata kamano, nitie kinde moko ma wan kaka Jokristo ok wabi yie mondo simbewa ochochwa kata okik it jomamoko. Kuom ranyisi, sama wan e chokruogewa, mago gin kinde ma wayudoe thuolo mar lamo kendo pako Jehova, pidhruok gi Wach Nyasaye, kod jiwruok gi owetewa gi nyiminewa. (Rapar 31:12; Zab. 22:22; Rumi 1:11, 12) Donge nyalo bedo maber ka waloro simbewa kendo rito nyaka watiek chokruok eka wasom ote ma dipo ni ng’ato ooronwa? To kapo ni nitie wach moro mochuno ma dimi kik ineg simbi sama chokruok dhi nyime, donge inyalo kete e yo maok obi kiko it jomamoko?

‘Tim Duto Nikech Wach Maber.’ (1 Kor. 9:23): Nitie kinde ma simo nyalo konyowa ka wan e tij lendo. Kuom ranyisi, owadwa ma tayo grup mar lendo nyalo tiyo gi simo mondo otudre gi jolendo man kuonde mamoko e alwora. Kinde moko, jolendo jogochone joma orwako wach kata jopuonjregi mag Muma mondo ging’e kabe ginyalo yudogi, to moloyo ka joma gidwa limogo ni mabor. Kapo ni wan gi simbe mag lwedo, onego wapar ketogi e yo maok gibi chochowa sama walendo ne ng’ato. (2 Kor. 6:3) Sama jalendo wadwa wuoyo gi ng’ato kata sama warito jolendo mamoko mondo owuog e ot kata e dala moro, kar tiyo gi thuolono e gocho ne osiepewa kata oronegi ote machuok, donge nyalo bedo maber ka waketo pachwa e tij lendo kaachiel gi joma walendogo?

Dew Jowadu. (1 Kor. 10:24; Fili. 2:4): Ok onego wadek adeka ne romo mar dhi lendo ka waparo ni kata wayud ka ji osedonjo e alwora to wabiro gocho kata oro ne ng’ato ote machuok ka wapenje kama ji nitie. Sama wachopo ka romo mar dhi lendo oserumo, kinde mang’eny biro chuno ni ochan ji kendo. En adier ni nitie kinde ma wanyalo deko ne romo mar dhi lendo nikech wach moro mochuno gadier. Kata kamano, sama watemo matek mondo wachop e wang’ sa, wanyiso ni wamiyo chenro mag Jehova luor, ni wadewo owete matayo romo mag dhi lendo, kaachiel gi jolendo wetewa.