Wabiro Puonjore Bug “Ritreuru e Hera mar Nyasaye” Chakre Januar 6
1. Chakre Januar 6, wabiro puonjore buk mane, to ne ogo bugno mondo okonywa timo ang’o?
1 Mano kaka wagombo ahinya puonjore buk mar “Ritreuru e Hera mar Nyasaye” e Puonjruok Muma e Kanyakla chakre Januar 6, 2014! Barua ma Bura Maduong’ nondiko ne ng’ato ka ng’ato mohero Jehova tieko gi wechegi: “Wageno gadier ni bugni biro konyi dhi nyime tiyo gi adiera e ngimani mondo omi iritri ‘e hera mar Nyasaye . . . nyaka ichopi e ngima ma nyaka chieng’.’—Juda 21.”
2. Puonjruok bugni biro konyowa e yore mage?
2 Gik Mwageno Puonjore: Ere kaka puonj mag Muma konyo e weche kaka bedo gi osiepe, yore mag yiero mor, nyiso luor ne jogo ma omi loch, timbe mag ng’ato, wach kend, weche mwawacho, kod timbe oganda? Chunywa mar pogo ber gi rach ibiro tiegi kaluwore gi chike makare mag Nyasaye ma yudore e Muma. (Zab. 19:7, 8) Kaka wamedo winjo tiend paro ma Jehova nigo, e kaka wabiro bedo gi gombo mar moro chunye kendo luwo chikene e yore duto mag ngima.—Nge. 27:11; 1 Joh. 5:3.
3. Ang’o momiyo onego watim matek mondo wachiw paro kuom weche mipuonjruok juma ka juma?
3 Ikri Chiwo Paro: Seche mitimo ikruok ne chokruok, bed gi gombo mar pako Nyasaye e kind chokruok mar ogandane. (Hib. 13:15) Kanyakla biro puonjore bugni kanyachiel. Bedo ni wabiro puonjore ka matin ei bugno juma ka juma biro miyowa thuolo mar timo ikruok maber, mamiyo wabedo gi chir mar chiwo paro kuom gik ma wasepuonjore. Iko paro machuok kendo e yo maber, biro jiwo jomoko mondo omed bedo gi hera kod timbe mabeyo, kendo mano biro miyo wabed gi ilo kendo chiwo paro magero ji. (Hib. 10:24) Bende, mor ma wan-go biro medore sama wachiwo paro manyiso yiewa.
4. Ang’o momiyo dwarore ahinya mondo warit chike Jehova?
4 E otieno mogik ka Yesu ne nie piny, ne owacho ni rito chike Jehova otudore gi ritruok e hera mar Nyasaye. (Joh. 15:10) Bug “Hera mar Nyasaye,” biro konyowa timo matek moloyo kinde duto, mondo waluw puonj mag Muma e ngimawa mapile kendo ‘waritre e hera mar Nyasaye.’—Juda 21