Lam Nyasaye Makende mar Adier
1 Buk mar Lam Nyasaye Makende mar Adier onego opuonjruok gi joma osetieko puonjruok buk mar Muma Puonjo. Somo bugni e chokruok mar Puonjruok-Buk mar Kanyakla biro konyowa tiyo gi bugni e lendo, kendo biro miyo wamed hero Jehova koda riwruok mar oganda mare. Ere kaka wanyalo yudo kony chuth e kinde ma wapuonjore buk mar Lam Nyasaye?
2 Tayo Puonjruokno: Nikech wabiro puonjore sula mangima juma ka juma, jorit puonjruok buk onego opim sa e yo maber kaka dwarore. Onego gitim paragraf motelo mapiyo piyo mondo omi giwe thuolo malach mar wuoyo e wi weche mapek, ma pile jayudore bang’e e sula ma iwuoyoe. E giko mar puonjruok, nwoyo e yo machuok penjo manie sandug “Be Inyalo Paro?”, biro konyo jogo mantie mondo omak kendo opar thuond weche ma gipuonjore.
3 Nitie penjo mamoko moket mondo wapar kuomgi matut, kendo mondo wawuo kuomgi, to chiegni ni giyudore e nus mag sula duto manie bug Lam Nyasaye. Kuom ranyisi, moko kuom penjogi yudore e ite mag 48-49. Ok ochuno ni nyaka som penjogi kanyachiel gi paragraf. Seche ma jarit puonjruok nono penjogi gi joma nie grup mare, onego one ni gisomo ndiko moket kanyo mondo omi giwuo kuom penjogo ka thuolo nitie.
4 Ikruok Chon: Ikruok maber ne chokruok mar puonjruok-buk ok en mana goro lain kuonde ma dwoko nitie kende. Lamo kendo paro matut kuom ndiko moketi biro konyowa ikruok ok mana ni chiwo paro e romono kende, to maduong’ moloyo, wabiro kata iko chunywa. (Ezra 7:10) Waduto wanyalo miyo jiwruok obedie e kindwa ka wabedo thuolo mar chiwo paro machuok magero ji.—Rumi 1:11, 12.
5 Puonjruok bug Lam Nyasaye biro konyowa sudo machiegni gi Jehova, kendo obiro miyo wabed joma oikore mar konyo jogo ma chunygi nikare mondo gibi giriwre kodwa e lamo Nyasaye. (Zab. 95:6; Jak. 4:8) Weuru mondo waduto wayud kony chuth kuom chenro majaberni mowuok kuom Nyasaye.