‘Chok Oganda Duto’
1. Chokruoge mag distrikt gi chokruoge moriwo pinje chalre e yore mage gi chokruok moro maduong’ ma ne Jo-Israel obedogo bang’ wuok Misri?
1 Matin nono bang’ wuok Misri, Jehova ne owacho ne Musa mondo ‘ochok oganda duto’ e Got Sinai mondo giwinj wechene mondo omi giluore kendo gipuonj nyithindgi yorene. (Rapar 4:10-13) Donge nyaka bed ni chokruogno ne otego yiegi ahinya kendo ne okelonegi mor mogundho? E dweche manok maluwo, Joneno mag Jehova biro bedo gi chokruoge mag distrikt kod chokruoge moriwo pinje, kama gibiro winjoe weche Jehova. Ang’o monego watim mondo chokruogego okonywa chuth?
2. Ang’o monego watim mondo waikre ne chokruog-distrikt kata chokruok moriwo pinje?
2 Ikri: Jehova nochiko Jo-Israel mondo oikre ne chokruok makende ma ne dhi bedo e Got Sinai. (Wuok 19:10, 11) E yo ma kamano, dwarore ni ji duto ma biro dhi e chokruogewa mag distrikt kod moriwo pinje oikre maber, bed ni gin gi migepe e program kata ooyo. Kuom ranyisi, biro dwarore ni ji mang’eny otim chenro mondo giyud rusa e tich. Samoro biro dwarore ni itim gima chal gi ma Nehemia notimo. Nehemia ne tiyo kaka ng’at mamiyo Ruoth Artashashta divai. Ne odwaro thuolo mar dhi Jerusalem mondo okony e tij gero ohinga mag dalano ma ne osekethore. Kata kamano, Nehemia nong’eyo ni ruoth ne nyalo tamore miye thuolo. Ne olemo kae to nochoko chir kendo noyiero wechene adimba mokwayo ruoth rusa komiye luor mowinjore. Ruoth ne oyiene dhi kendo ne oriwe lwedo kuom miye gik ma ne dwarore e tij gedono! (Neh. 2:1-9) E wi kwayo rusa e tich, be isechano kaka ibiro wuotho kod kama ibiro nindoe? Jodong-kanyakla oikore konyo ng’ato ang’ata manyalo dwaro ni okonye chano weche ma kamago. Tim chenro ichop chon mondo program ka program kik chakre ka ionge, kendo iikri ‘chiko iti’ adimba sama in e chokruok.—Hib. 2:1.
3. Ang’o ma biro konyowa iko chunywa ne programno?
3 Gimachielo madwarore e ikruokwa en iko chunywa mondo wabi wachik itwa kendo wapuonjre. (Ezra 7:10) Ibiro ket program chon e Websaitwa mar jw.org. Programno oting’o list mar twege duto mibiro gol kaachiel gi ndiko achiel kata ariyo majiwo moro ka moro kuom twegego. Mano biro miyowa weche mabeyo ma wanyalo nono e Lamowa mar Joot e jumbe manok kapok wadhi e chokruogwa mar distrikt. Moko kuom jolendo goyoga programno kae to gitiyogo e ndiko weche machuok sama gin e chokruok.
4. Ang’o ma jonyuol nyalo timo mondo nyithindgi oyud puonj e chokruoge madongo ma wabiro timo?
4 ‘Puonj Nyithindi’: Achiel kuom gimomiyo ne Nyasaye ochoko ogandane e Got Sinai ne en ni mondo jonyuol ma Jo-Israel ‘opuonj nyithindgi.’ (Rapar 4:10) Chokruoge mag distrikt kod chokruoge moriwo pinje miyo jonyuol thuolo majaber mar timo mano. Jonyuol onego one ni gibet gi nyithindgi sama chokruok dhi nyime kendo gikonygi keto pachgi kuom gik mipuonjo. E giko odiechieng’ kodiechieng’ mar chokruok, kendo bang’e sama gitimo lamogi mar joot, jonyuol nyalo wuoyo gi nyithindgi e wi programno.
5. Wabiro yudo ber mage kuom dhi e chokruog-distrikt mabiro?
5 Chokruok makende ma ne otimore e Got Sinai ne okonyo Jo-Israel neno kaka ne gin gi thuolo makende mar bedo oganda Nyasaye. (Rapar 4:7, 8) Chokruog-distrikt mabironi bende olos mondo okonywa kamano. Kuom odiechienge adek, wabiro chalo joma owuok e piny Satan marachni kendo odonjo e paradiso. Ibiro pidhwa gi chiemb chuny ma gerowa kendo wabiro mor sidang’ bedo kanyachiel gi owetewa ma jiwowa. (Isa. 35:7-9) Kaka odiechieng Jehova medo sudo machiegni, mad watim duto ma wanyalo mondo wabed e chokruogni kendo wabed kanyachiel gi owetewa gi nyiminewa mondo wajiwre!—Hib. 10:24, 25.