Chokruoge mag Distrikt—Kinde mag Lamo Jehova gi Mor
1. Nyasi ma Jo-Israel ne timo chal e yo mane gi chokruoge mag distrikt ma wabedogo e kindegi?
1 Josef, Mariam, gi nyithindgi, kaachiel gi jomamoko ne jodhiga Jerusalem e nyasi ma ne itimo kuno higa ka higa. E kinde machalo kaka mago, gin kaachiel gi jotich Nyasaye mamoko ne giweyo tijegi mapile mondo giket pachgi kuom gima ne duong’ ahinya e ngimagi, ma en lamo mar Nyasaye. Nyasigo ne miyogi thuolo mar paro matut kendo wuoyo kuom ber mag Jehova kod nono Chikne. Chokruoge mag distrikt ma wabiro bedogo biro miyowa thuolo machalo gi mago mondo walam Jehova gi mor.
2. Ang’o monego watim mondo waikre ne chokruog-distrikt mabiro?
2 Ikruok Dwarore: Ne dwarore ni joodgi Yesu owuoth kilomita 200 dhi gi duogo. Kata obedo ni ok wanyal ng’eyo ni owete Yesu gi nyiminene ne gin adi, wanyalo temo paro ikruok ma ne dwarore ni Josef gi Mariam otim. Be isetimo ikruok madwarore mondo ibi bed e chokruog-distrikt kuom ndalo adek duto? Mano nyalo dwaro ni ikwa rusa e tich kata ikwa ne nyathini rusa e skul. Be iseyudo otel ma ibiro nindoe kapo ni mano dwarore? Be inyalo kawo thuolo mar konyo ng’ato e kanyakla monego okony e yo makende mondo obi e chokruog-distrikt?—1 Joh. 3:17, 18.
3. Ere kaka nyasi mag Jo-Israel ne chiwo thuolo mag jiwruok?
3 Kinde mag Jiwruok: Mano kaka nyasi mag Jo-Yahudi ne chiwo thuolo mag jiwruok ne jotich Nyasaye! Onge kiawa ni joodgi Yesu ne geno ahinya romo gi osiepegi ma ne gisebedo ka ok ginenrego kuom kinde malach. Bende ne gin gi thuolo mag bedo gi osiepe manyien ma Jo-Yahudi kaachiel gi jogo maok Jo-Yahudi ma nobiro Jerusalem e nyasino.
4. Ere gima wanyalo timo manyiso ni wakawo mapek tudruok ma wan-go kaka owete ma Jokristo?
4 Achiel kuom gik momiyo jatichno mogen kendo mariek timo chenro mondo wachokre e chokruoge mag distrikt mondo wawinj twege kar orogi ne ng’ato ka ng’ato e yo mondiki, en ni mondo wajiwre ng’ato gi nyawadgi. (Hib. 10:24, 25) Omiyo, tim chenro mondo ichop e chokruok chon e odiechienge duto mondo ijiwri gi jomamoko kapok jakom mar program olando thum manyiso ni koro en sa mar bet. Kar wuok dhi ng’iewo chiemb odiechieng’, ijiwowa ni wating’ chiemo mondo omi wayud thuolo mar wuoyo gi joma obet machiegni kodwa e chokruok. Tudruok ma wan-go kaka owete ma Jokristo en mich ma Jehova ochiwo ma onego wakaw mapek.—Mika 2:12.
5. Ang’o mabiro konyowa yudo ber chuth kuom program?
5 Kinde mar Puonjruok: Chakre tinne, Yesu notiyo maber gi thuolo mag nyasi mondo opuonjre e wi Wuon-gi me polo. (Luka 2:41-49) Ang’o mabiro konyowa kaachiel gi joodwa mondo wayud ber chuth kuom twege mibiro golo? E kinde ma chokruok dhi nyime, siki ka mibetie kendo kik iwuo ka onge gimomiyo. Kik iwe mondo simo kaachiel gi gik machalo kamago omoni kata omon jomoko winjo chokruok. Ket pachi kuom jagol-twak kendo indik weche machuok. Beduru kanyachiel kaka joot mondo ine ni nyithindi bende ochiko itgi. E seche mag odhiambo, kawuru thuolo mar wuoyo kuom weche ma ne omorou e chokruok.
6. Ang’o monego waket e paro kaluwore gi rwakruokwa?
6 Rwakruok: Johala ma ne nie yo ne nyalo fwenyo joodgi Yesu kod Jo-Yahudi mamoko ma jotich Nyasaye ma ne dhi kata wuok e nyasi e yo mayot nikech lepgi ne nigi usi momin e riakgi kendo kuom usigo, noket tol maratiglo. (Kwan 15:37-41) Kata obedo ni Jokristo ok rwak lewni makende, ong’ewa kaka joma ler kendo ma rwakore e yo mobidhore. Onego waket wach rwakruok mobidhore e paro seche ma wadhi kendo wuok e chokruok kendo seche ma wan kama itimoe chokruok. Kata ka wawilo lewni bang’ program, onego warwak lewni mamiyo Jehova duong’ kendo waket baj. Timo kamano biro miyo wapogre gi jogo maok gin Joneno kendo miyo gibed gi paro maber kuomwa.
7. Ang’o momiyo onego wanon ka wanyalo chiwore e tich e chokruog-distrikt?
7 Joma Chiwore: Jotich mang’eny dwarore mondo chokruok otimre e yo maber. Be inyalo chiwori mondo ikony e tich? (Zab. 110:3) Tije ma itimo e chokruoge mag distrikt gin mitiyo ne Nyasaye kendo gichiwo neno maber. Maneja moro mar kar timo chokruok ne omor ahinya gi jogo ma nochiwore molwoko kama notimie chokruok, mi owacho kama: “Amor mokalo nikech chokruok ma ne utimo kae. Asebedo ka awinjo ni Joneno mag Jehova gin joma kende ahinya kendo ma nigi nying maber e gweng’waka nikech giweyoga kama gitimoe chokruok kaler moloyo kaka ne giyude. Ne uloso kae obedo kama ber ahinya ne jogweng’, jou ma nolwoko kae ne ng’won ahinya kendo ne wamor ng’ere kodgi yo e yo maber.”
8. Thuolo mage mag lendo mabiro yudore kama itimoe chokruok?
8 Thuolo mag Lendo: Ji mang’eny biro neno joma orwakore maler moketo baj mag chokruok, kendo mano biro miyo gidwar ng’eyo gimomiyo en kamano, to mano biro miyowa thuolo maber mar lendonegi e wi chokruok. Nyathi moro ma wuowi ma jahigini ang’wen nodhi e otel bang’ program ka en gi buk manyien ma nogol e chokruok, nonyiso miyo moro ma ne tiyo e otendno bugno. Mano nomiyo jonyuolne thuolo mar gwelo miyono e chokruok.
9. Ere kaka wanyalo luwo ranyisi ma joodgi Yesu noketo e kawo mapek gigo ma Jehova chiwonwa mar bedo gi winjruok maber kode?
9 Nyasi ma ne itimo chon ne gin kinde mag mor ma Jo-Yahudi ma ne dwaro puonjore e wi Jehova ne orito ahinya. (Rapar 16:15) Joodgi Yesu ne oikore timo chiwruok moro amora mondo gidhi e nyasigo kendo giyud ber chuth kuomgi. Wabende wakawo mapek chokruogewa mag distrikt kendo nenogi kaka mich mowuok kuom Wuonwa me polo ma jahera. (Jak. 1:17) Ma e kinde monego waikre ne thuolo ma wajabedogo higa ka higa mar lamo Jehova gi mor!
[Sanduk Manie ite mar 4]
Weche Miparonwa Kuom Chokruog-Distrikt
◼ Aksident Koda Gik Matimore Apoya: Ka nitie gima otimore apoya madwaro ni mondo ng’ato oyud thieth mapiyo ka en e chokruog-distrikt, nyisuru achiel kuom jorwak welo man machiegni mondo oter wach sano sano ne joma ochung’ne migawono, mondo jal mowinjore one gima inyalo tim mondo ochiw kony madwarore. Joma ochung’ne migawono biro neno kaka ginyalo konyo e wach motimore apoya.
◼ Chiemb Odiechieng’: Wakwayi mondo iting’ chiemb odiechieng’ moloyo wuok kar chokruok ni idhi manyo chiemo seche mag yueyo modiechieng’. Ng’ato nyalo tiyo gi gir ting’o chiemo manyalo romo e bwo kome. Kik ubi gi gik madongo mag ting’o chiemo kod gik glas kar chokruok.
◼ Chiwo: Wanyalo nyiso ni wadwoko erokamano ka wagolo chiwo ne tich madhi nyime e piny ngima, kendo wanyalo timo kamano ka wan e Od Romo marwa kata e chokruog-distrikt. Chiwo mitimo gi chek e chokruog-distrikt onego oketie nying riwruok ma Joneno tiyogo e pinyu.
◼ Chiwruok: Mor mwayudo e bedo e chokruok medore ahinya seche ma wachiwore mondo wati tije motudore gi chokruog-distrikt. (Tich 20:35) Ng’at ma diher chiwore onego odhi e Migawo mar Chiwruok mayudore e chokruogni. Nyithindo ma johigini 16 kadok piny nyalo konyo ahinya kapo ni gitiyo e bwo jonyuolgi kata jal machielo ma jonyuolgi oyiene.
◼ Fom mag Manyo Ji: Fom mar Tafadhali Fuatia Upendezi (S-43) onego otigo e chiwo weche kuom ng’at moro amora morwako wach bang’ ka oselendne e yo ma ne ok ochan e kinde chokruog-distrikt. Jolendo onego oting’ fomgo achiel kata ariyo sama gidhi e chokruog-distrikt. Fom ma osepong’ maber inyalo ter kar Migawo mar Buge kata miyo jagoro bang’ dok e kanyaklau.—Ne Tijwa mar Pinyruoth ma Novemba 2009, ite mar 4.
◼ Kar Chungo Mtokni: Kuonde duto ma ibiro timoe chokruog-distrikt to nigi kuonde chungo mtokni ibiro yie ne ji ketoe mtokni maok gichulo, joma okwongo biro ema kwongo nwang’o.
◼ Kuonde Chiemo: Mi nying Jehova duong’ kuom tim maber seche ma in kuonde chiemo. Kuonde mang’eny michiemoe, ji thoro weyo gimoro matin ne jotich kaluwore gi kaka olosgi.
◼ Mako Kom: Inyalo mako kombe mana ne joma uwuothogo e mtoka achiel, joma idakgo, kod joma ipuonjorigo Muma.—1 Kor. 13:5.
◼ Mako Weche e Tep: Gik mako weche ok onego ochuogi e sitima mar kama itimoe chokruok kata tudogi e masin mar thum mitiyogo e chokruok, kendo inyalo mana ti kodgi e yo mamiyo ng’ato ok chand jomoko.
◼ Modhi ma Nigi Suya: Nitie chokruoge moko mag distrikt mitimo kuonde mogeng’ore. Kuom mano, en gima biro nyiso hera ka ok wati gi modhi ma nigi suya ahinya, manyalo chando jogo ma nigi tuoche mag kor.—1 Kor. 10:24.
◼ Otende: (1) Kik imak kuonde nindo mokalo mago ma ibiro tiyogo, kendo kik iwe ji mokalo kwan moketi onind e odno. (2) Kochuno ni nyaka ilok chenro ma ne iseketo mar mako kar nindo, nyis weg otel gie sechego. (3) Kaw gir dhiro osike ei otendno mana ka iikri mar tiyo kode, kendo idwoke mapiyo mondo jomoko bende oti kode. (4) Kik ited e ot kama ok oyienie timo kamano. (5) Ne ni iweyo gimoro matin ne jal malwoko ot. (6) Kik ikaw chiemo mang’eny mokalo mochan gi weg otel ne welo ma bende tiyo gi otendno, obed chiemb okinyi kata mamoko. (7) Kinde duto, nyis nyak mar roho sama itudori gi jotich manie otendno. Jotich mag otendego rito welo mang’eny kendo gimor ahinya seche ma wang’won, wahore, kendo winjo wach. (8) Ka wach moro marach oneno e ot ma omiyino, ne ni inyiso owete ma tiyo e Migawo mar Kuonde Nindo sama in e chokruok.
◼ Seche mag Program: Program biro chakre sa 3:20 okinyi kuom odiechienge adekgo duto. Rangeye ibiro yawo sa 2:00 okinyi. Sama thum chakore onego oyud ka waduto wasebet mondo omi program ochakre gi luor mowinjore. Program biro rumo sa 10:55 odhiambo chieng’ Tich Abich gi Ngeso, to obiro rumo sa 9:40 odhiambo chieng’ Jumapil.
◼ Wuoche: Higa ka higa, ji mang’eny hinyore nikech kit wuoche ma girwako. Ber rwako wuoche modimbore, maromi maber kendo mibiro wuothogo maber kuonde miidho, kata e seche miwuotho piyo, kod kinde mamoko.