Odiechienge Adek mag Yudo Chiemb Chuny
1. Ang’o mwageno yudo e chokruog-distrikt ma higani?
1 E piny ma ji onge gi winjruok maber gi Nyasaye kendo ma Satan ema lochoeni, Jehova osebedo ka pidho jotichne e yo maber. (Isa. 58:11) Achiel kuom yore ma Jehova pidhowago en chokruog-distrikt ma wabedogo higa ka higa. Ere kaka wanyalo ikore mar kawo kendo pogo ne jomoko chiemb chuny ma ibiro miwa e chokruog-distrikt mabiro?—Nge. 21:5.
2. Onego watim chenro ne gik mage?
2 Kapok itimo chenro mar bedo e chokruogno, chak chano sani gik motudore gi tiji mar ringruok kod mamoko mondo ibedie odiechienge adekgo duto. Be iseng’eyo ni biro kawi thuolo maromo nade odiechieng’ kodiechieng’ chopo kama itimoe chokruok mondo imany kar bet chon ka program pok ochakore? Kuom adier, ok dwaher bare ne chiemb chuny mogundho ma Jehova oseikonwa! (Isa. 65:13, 14) Be isechano kama ibiro nindoe kod kaka ibiro wuotho?
3. Moko kuom paro mabiro konyowa kaachiel gi joodwa yudo ber e program gin mage?
3 Ang’o mabiro konyi mondo iket pachi e program? Ka nyalore to ne ni inindo maber e otieno duto mag chokruog-distrikt. Ng’i jagol-twak. Som e Mumbi ndiko duto mowach. Ndik weche machuok mibiro tiyogo. Ber ka joot obet kanyachiel mondo jonyuol okony nyithindgi keto pachgi e program. (Nge. 29:15) Odhiambo kodhiambo unyalo wuoyo kuom weche madongo ma ne uyudo e program kaka joot. Mano biro miyo joodi omed paro kuom program kata bang’ chokruok, bende unyalo keto tenge seche moko e Lamo mar Joot mondo une kaka unyalo tiyo gi weche moko ma ne upuonjoru.
4. Ere kaka wanyalo konyo jomoko e kanyaklawa mondo gin bende giyud chiemb chuny?
4 Kony Jomoko Yudo Ber: Wadwaro ahinya ni jomamoko bende oyud chiemb chunyno. Be un gi jolendo ma hikgi ng’eny kata mamoko e kanyaklau manyalo dwaro ni okonygi mondo gichop e chokruog-distrikt? Be inyalo konyogi e yo moro? (1 Joh. 3:17, 18) To moloyo jodongo ma gin jorit-grup onego one ni jolendo ma kamago oyudo kony madwarore.
5. Ere kaka wabiro chiwo kalatese mag gwelo ji e chokruog-distrikt? (Ne bende sanduk e iteni.)
5 Mana kaka kinde mosekalo, wabiro timo kampen mar gwelo ji e chokruog-distrikt kodong’ jumbe adek to wadhi e chokruogno. Kanyakla duto onego otim chenro maber mondo gine ni gipogo kalatesego duto e alwora kaka nyalore. Kata kamano, kapo ni joodi ok otieko pogo kalatesegi, unyalo ting’ogi mondo ubigo kar chokruok. Kalatesego inyalo gwelgo joma wawuoyogo e yo maok ochan e taon mar chokruog-distrikt. Kalatese modong’ ma joodi ok bi chiwo ka gin e taon mar chokruok onego omi jarwak welo chieng’ Tich Abich seche mudonjo. Ibiro chiwnwa paro moko e chokruogno kuom kaka wanyalo tiyo gi kalatesego.
6. Ere kaka timbewa mabeyo nyalo moro jomoko?
6 Kido Mabeyo Moro Jomoko: E kindegi ma ji mang’eny ‘oherore giwegi’ kendo ok par jomoko, mano kaka en gima ber bet gi Jokristo wetewa ma nigi kido mabeyo! (2 Tim. 3:2) Wanyiso timbe mabeyo kuom donjo e kar chokruok maok wadhirre e dhoudi sa 2:00 okinyi kendo kuom mako kombe mana ne joma wadakgo, ma wawuothogo kata joma wapuonjorego Muma. Waluwo gima jakom mar program nyisowa seche ma owacho ni wabed piny mondo wawinj thum manyiso ni koro program chakore. Keto simo e yo maok bi mono jomoko winjo program bende en tim maber. Bende wanyiso luor ka wabet maok wawuo, oro ote machuok e simo, chiemo kata wuotho awuotha maonge gimomiyo seche ma program dhi nyime.
7. Ere kaka bedo gi owetewa nyalo miyowa mor kendo miyo wajiwgi?
7 Bedo Kaachiel gi Owetewa Kelo Mor: Chokruog-distrikt miyowa thuolo momedore mag bedo kanyachiel gi owete ma Jokristo. (Zab. 133:1-3) Donge inyalo ‘yawo chunyi’ mondo iyangri gi owete gi nyimine mawuok e kanyakla mamoko? (2 Kor. 6:13) Inyalo keto chenro mondo ing’e kata ng’at achiel, kata joot moro e odiechieng’. Yueyo mwabedogo sa auchiel miyowa thuolo mar timo mano. Omiyo ting’ chiemb odiechieng’ mondo iyud thuolo mar bedo gi jomamoko moloyo wuok kar chokruok ni idhi manyo chiemo. Mano nyalo miyo iyud gweth mar bedo gi osiepe mamoko madier.
8. Ang’o momiyo onego wachiwre tiyo tije mag chokruog-distrikt, to ere kaka wanyalo timo mano?
8 Mano kaka en mor bedo gi Jokristo wetewa e lamo maler! Be nyalore mondo ichiwri e migawo moro kata konyo seche ma kanyaklau omi migawo mar ler e chokruok? (Zab. 110:3) Kapo ni ok omiyi migawo moro, inyalo dhi e Migawo mar Chiwruok. Tich bedo mayot kendo kelo mor ka ji mang’eny tiye.
9. Ang’o momiyo onego wakaw mapek rwakruokwa kod timbewa seche ma wan e chokruog-distrikt?
9 Timbewa Mabeyo Moro Joma Nenowa: Wan welo ndalo adek duto mag chokruok, ok mana sama program dhi nyime. Jogo ma nenowa ka wan e taon mar chokruok onego one pogruok manie kindwa gi joma ok Joneno. (1 Pet. 2:12) Rwakruokwa seche ma wan kar chokruok, kuonde ma wanindoe, kod kuonde ma wachiemoe onego omi Jehova duong’. (1 Tim. 2:9, 10) Ka waketo bajwa joma nenowa biro fwenyowa e yo mayot kendo mano biro miyowa thuolo mar nyisogi wach chokruog-distrikt kata lendonegi.
10. Ere kaka wanyalo miyo jogo matiyo e otende kod kuonde mwachiemoe obed gi paro mowinjore kuom chokruog-distrikt?
10 Ere kaka wanyalo miyo joma tiyo e otende tich mayot? Ok onego waor mondo omaknwa kuonde nindo moloyo mwabiro tiyogo nikech mano biro mono welo moko yudo kar nindo kendo nyalo ketho ne weg otendego ohala. Ka wayudo ka jotich mag otende odich seche ma wadonjo kata ma wadwaro wuok, onego wahore kendo nyiso ng’wono. (Kol. 4:6) Onego wabed gi tim mar weyo chiwo moro matin ne joma tiyo e otel kata mokonyowa ting’o bege, malwoko udi mwanindoe kata matimonwa tije mamoko.
11. Weche mage ma none manyiso kaka timbewa mabeyo mag Jokristo chiwo neno?
11 Joma neno timbewa mabeyo e kar chokruok bedo gi paro mane kuomwa? Kaluwore gi gaset moro, maneja moro mar kama notim e chokruog-distrikt nowacho kama: “Jogo muol. Wagombo ni higa ka higa gibed wendwa.” Higa mokalo, kibeti mar jal moro maok Janeno nolal e otel moro ma joneno bende nonindoe. Kane kibetino oyudore gi gik moko duto ma ne nie iye mi oterne maneja mar otendno, manejano nowacho kama: “Notimore maber ni Joneno mag Jehova ema ne timo chokruok machiegni kae kendo gin ema ne ging’eny e otendni. Dine ok obedo kamano, ok dine iyudo kibetinino.”
12. Kaka chokruog-distrikt medo sudo machiegni, dwarowa maduong’ onego obed ang’o, to nikech ang’o?
12 Chokruog-distrikt ma higani okayo. Osetim kinda e loso program kod kama ibiro time mondo wayud chiemb chuny. Tem matek ibed e odiechienge adekgo, kendo iikri ne gima Jehova kod riwruok mar oganda joge oikonwa. Ng’ad ni ibiro jiwo jomoko kokalo kuom kido, timbeni mabeyo, kaachiel gi goyo kodgi mbaka. Timo kamano biro miyo in kaachiel gi jomamoko uyud mor mana kaka achiel kuom welo ma ne odhi e chokruog-distrikt ma higa mokalo ma nondiko kama, “Pok aneno chokruok maber kaka mano!”
[Blab manie ite mar 4]
Mana kaka kinde mosekalo, wabiro timo kampen mar gwelo ji e chokruog-distrikt kodong’ jumbe adek to wadhi e chokruogno
[Blab manie ite mar 6]
Rwakruokwa seche ma wan kar chokruok, kuonde ma wanindoe, kod kuonde ma wachiemoe onego omi Jehova duong’
[Blab manie ite mar 7]
Ng’ad ni ibiro jiwo jomoko kokalo kuom kido, timbeni mabeyo, kaachiel gi goyo kodgi mbaka
[Sanduk manie ite mar 4]
Weche Miparonwa Kuom Chokruog-Distrikt ma 2011
◼ Seche mag Program: Program biro chakre sa 3:20 okinyi kuom odiechienge adekgo duto. Rangeye ibiro yaw sa 2:00 okinyi. Sama thum chakore onego oyud ka waduto wasebet mondo omi program ochakre gi luor mowinjore. Program biro rumo sa 10:55 odhiambo chieng’ Tich Abich gi Ngeso, to obiro rumo sa 9:40 odhiambo chieng’ Jumapil.
◼ Kar Chungo Mtokni: Kuonde duto ma ibiro timoe chokruog-distrikt to nigi kuonde chungo mtokni ibiro yie ne ji ketoe mtokni maok gichulo, joma okwongo biro ema kwongo nwang’o. Joma nigi nyawo moko inyalo timnegi ng’wono e yo makende.
◼ Mako Kom: Inyalo mako kombe mana ne joma uwuothogo e mtoka achiel, joma idakgo, kod joma ipuonjorigo Muma.—1 Kor. 13:5.
◼ Chiemb Odiechieng’: Wakwayi mondo iting’ chiemb odiechieng’ moloyo wuok kar chokruok ni idhi manyo chiemo seche mag yueyo modiechieng’. Ng’ato nyalo tiyo gi gir ting’o chiemo manyalo romo e bwo kome. Kik ubi gi gik madongo mag ting’o chiemo kod gik glas kar chokruok.
◼ Chiwo: Wanyalo nyiso ni wadwoko erokamano ka wagolo chiwo ne tich madhi nyime e piny ngima, kendo wanyalo timo kamano ka wan e Od Romo marwa kata e chokruog-distrikt. Chiwo mitimo gi chek e chokruog-distrikt onego oketie nying mar “International Bible Students Association” kata machielo ma joneno tiyogo e pinyu.
◼ Aksident kod Gik Matimore Apoya: Ka nitie gima otimore apoya madwaro ni mondo ng’ato oyud thieth mapiyo ka en e chokruog-distrikt, nyisuru achiel kuom jorwak welo man machiegni mondo oter wach sano sano ne joma ochung’ne migawono, mondo gine gima inyalo tim mondo ochiw kony madwarore. Joma ochung’ne migawono biro neno kaka ginyalo konyo e wach motimore apoya.
◼ Yien: Ka nitie yien mitiyogo mag thieth, ne ni ibiro gi moromo nikech ok gibi yudore e kar chokruok.
◼ Wuoche: Higa ka higa, ji mang’eny hinyore nikech kit wuoche ma girwako. Ber rwako wuoche modimbore, maromi maber kendo mibiro wuothogo maber kuonde miidho, kata e seche mireto, kod kinde mamoko.
◼ Modhi ma Nigi Suya: Nitie chokruoge moko mag distrikt mitimo kuonde mogeng’ore. Kuom mano, en gima nyiso hera ka ok wati gi modhi ma nigi suya ahinya, manyalo chando jogo ma nigi tuoche mag kor.—1 Kor. 10:24.
◼ Fom mag Tafadhali Fuatia Upendezi (S-43): Fom mar Tafadhali Fuatia Upendezi onego otigo e chiwo weche kuom ng’at moro amora morwako wach bang’ ka oselendne e yo ma ne ok ochan e kinde chokruog-distrikt. Jolendo onego oting’ fomgo achiel kata ariyo sama gidhi e chokruog-distrikt. Fom ma osepong’ maber inyalo ter kar Migawo mar Buge kata miyo jagoro kidok e kanyaklau.—Ne Tijwa mar Pinyruoth ma Novemba 2009 ite mar 4.
◼ Kuonde Chiemo: Mi nying Jehova luor kuom tim maber seche ma in kuonde chiemo. Kapo ni e alworau ji joweyo gimoro matin, inyalo timo kamano.
◼ Otende:
(1) Kik imak kuonde nindo mokalo mibiro tiyogo, kendo kik iwe ji mokalo kwan moketi onind e odno.
(2) Kochuno ni nyaka ilok chenro ma ne iseketo mar mako kar nindo, nyis weg otel gie sechego.—Math. 5:37.
(3) Kaw gir dhiro osike ei otendno mana ka iikri mar tiyo kode, kendo idwoke mapiyo mondo jomoko bende oti kode.
(4) Kik ited e ot kama ok oyienie timo kamano.
(5) Ne ni iweyo gimoro matin ne jal mokonyi ting’o giki kod malwoko ot.
(6) Kik ikaw chiemo mohingo ma weg otel ochano ne welo mabiro bedo e otendno, obed chiemb okinyi kata mamoko.
(7) Kinde duto, nyis nyak mar roho sama itudori gi jotich manie otendno. Jotich mag otendego rito welo mang’eny kendo gimor kodwa ka wang’won, wahore, kendo wawinjo wach.
(8) Nengo monyis e fom mar Recommended Lodging List en mar odiechieng’ achiel, ok oriwo osuru moro amora. Kapo ni okaw kuomi pesa mang’eny mohingo monego ichul kata kuom gimoro amora ma ne ok ikwayo kata tiyogo, kik ichul, kendo ne ni inyiso Migawo mar Kar Nindo e chokruog-distrikt mapiyo kaka nyalore.
(9) Ka wach moro marach oneno e ot ma omiyino, ne ni inyiso owete ma tiyo e Migawo mar Kar Nindo sama in e chokruok.
◼ Chiwruok: Mor mwayudo e bedo e chokruok medore ahinya seche ma wachiwore mondo wati tije motudore gi chokruog-distrikt. (Tich 20:35) Ng’at ma diher chiwore onego odhi e Migawo mar Chiwruok mayudore e chokruogni. Nyithindo ma johigini 16 kadok piny nyalo konyo ahinya kapo ni gitiyo e bwo jonyuolgi kata jal machielo ma jonyuolgi oyiene.
[Sanduk manie ite mar 5]
Wabiro Chiwo Nade Kalatese mag Gwelo Ji?
Mondo wagwel ji e alworawa duto, onego wawuo machuok. Wanyalo wacho kama: “Amosi. Wagwelo ji duto e piny mangima e chokruok ka watiyo gi kalatesegi. Mae mari. Ibiro yudo weche momedore e iye.” Ng’e kalatasno olosi e yo mamoro wuon ot, omiyo miyego e yo ma dhi miyo onene maber. Wuo gi ilo. Ka wagwelo ji e giko juma, wanyalo chiwo gasede bende ka mano owinjore.