‘Wuothuru Malong’o e Kind Joma Ok Oyie’

1. Ang’o momiyo biro dwarore ni wabed gi timbe mabeyo sama wan e chokruogewa mag distrikt?

¹ Nikech ji mang’eny nenowaga higa ka higa ka wadhi e chokruogewa madongo, en gima ber mondo warwakre e yo ma miyo Jehova duong’. (Lawi 20:26) Timbewa kod rwakruokwa onego onyis maler ni wan jolup Yesu madier. Sama wan e chokruogewa mag distrikt, ang’o ma wanyalo timo mondo ‘wawuoth malong’o e kind joma ok oyie’ kendo wami Wuonwa manie polo duong’?—1 Pet. 2:12.

2. Ere kaka wanyalo nyiso kido mag Jokristo madier sama wan e chokruog-distrikt?

² Nyis Kido mag Jokristo Madier: Yo ma waherogo Joneno wetewa kod kaka watimo ne joma ok Joneno opogore ahinya gi chuny ma ji mang’eny nyiso e pinyni. (Kol. 3:10; 4:5; 2 Tim. 3:1-5) Onego wabed mang’won kendo wahore sama watudore gi joma tiyo e otende ma wanindoe, kata mana sama chandruok moro oneno. Bende, wanyalo weyo gimoro matin ne joma konyowa e yo moro amora kama wanindoe kapo ni mano owinjore gi alworawa.

3. En wach mane ma iparo ne jonyuol, to nikech ang’o?

³ Jonyuol onego ong’e gima nyithindgi timo kinde duto bed ni gin e kar chokruok, e otende, kata e kuonde nindo. (Nge. 29:15) Maneja mar otel moro nowacho ne owadwa gi nyaminwa moro mokendore niya: “Wahero jou ahinya. Un duto kaachiel gi nyithindu timbeu beyo kendo un joma muol. Joma tiyo e iye kae mor kodu ahinya kendo gigombo mana ni ubiga kae juma ka juma.”

4. Ang’o momiyo onego warwakre e yo maber kinde duto ma wan e taon mitimoe chokruog-distrikt?

⁴ Rwak Lewni Mowinjore: Onego warwakre e yo maber, ma ok kal tong’ kendo mobidhore sama wan e chokruok ma ok wakopo yor rwakruok ma sani ji mang’eny ohero e piny. (1 Tim. 2:9) Kamano bende e kaka onego warwakre sama wan e otel, sama wachiemo, kata sama wang’iepo nikech ok wadwar rwakore e yo mojwang’ore. Ka warwakore maber, wiwa ok bi kuot rwako baj, kendo wabiro chiwo neno ka thuolo mar timo mano oyudore. Ka warwakore maber kendo nyiso kido mabeyo mag Jokristo sama wan e chokruog-distrikt mabironi, mano biro moro chuny Jehova kendo nyalo ywayo joma chunygi ni kare mondo giyie winjo puonj mawuok e Muma.—Zef. 3:17.

Weche Miparonwa Kuom Chokruog-Distrikt ma 2014

◼ Seche mag Program: Ibiro yaw rangeye sa 2:00 okinyi. Thum biro chakore sa 3:20 okinyi e odiechienge adekgo duto. Sama thum chakore onego oyud ka waduto wasebet mondo omi program ochakre e yo manyiso luor. Wer mogik ma iluwo gi lamo biro chakore sa 10:55 odhiambo chieng’ Tich Abich kod Ngeso, to chieng’ Jumapil wer mogik biro chakore sa 9:50 odhiambo.

◼ Chokruoge Moriwo Pinje: Nitie kuonde mibiro timie chokruoge moriwo pinje (international conventions). Ofise ma pinjego ogwelo kanyakla moko kod owete gi nyimine moko ma a e pinje maoko, kendo gitimo mano bang’ nono kar kwan mar kombe, kuonde chungo mtokni, kod otende mayudore ma welo nyalo nindoe. Mondo kik kuondego pong’ mokalo tong’, jolendo ok onego odhi e chokruok moro moriwo pinje ka ok ogwelgi kata ka ok ogwel kanyaklagi. Kapo ni nitie gima biro chuni ni idhi e chokruok machielo mopogore gi ma kanyaklau dhiye, chokruok machielo miyiero dhiyeno kik bed moriwo pinje.

◼ Kuonde Chungo Mtokni: E kuonde duto ma ibiro timie chokruog-distrikt to nigi kuonde ma oyienwa chungoe mtokni, ji biro keto mtoknigi maok gichulo, ka joma okwongo chopo ema imiyo thuolo mokwongo. Nikech kuonde chungo mtoknigo kinde mang’eny ok lach, kar mondo ng’ato ka ng’ato ma nigi mtoka obi gi mare, nyalo bedo maber ka jomoko otimo chenro mar riwore e mtoka achiel. Nitie bende kuonde chungo mtokni moyang ne joma ong’ol, kendo joma ibiro yienegi keto mtokni kuondego gin mana joma nembni mtoknigi nyiso ni giting’o joma kamago to kod joma oketo kalatas maduong’ ma nyiso ni gin gi ng’at mong’ol e i mtokgi.

◼ Mako Kombe: Sama oyaw rangeye mag kama itimoe chokruok, kik waring ka wachomo kombe ka gima walaro kombe gi Jokristo wetewa. Onego wayie tuonore gik moko mondo jomamoko oyud ber. Chuny ma kamano miyo jomoko fweny ni wan Jokristo madier, kendo mano miyo gipako Nyasaye ma walamo. (Joh. 13:34, 35; 1 Kor. 13:4, 5; 1 Pet. 2:12) Inyalo mako kombe mana ne joma uidhogo mtoka achiel, joma idakgo, kod joma ipuonjorigo Muma. Nitie kuonde bet moyang ne joma hikgi oniang’ kata matuwore. Nikech kuonde moyanggo ok lach to joma obet kuondego nyalo dwaro ni okonygi e yo moro, ibiro yie ne ng’at achiel kata ji ariyo kende mondo obed but ng’atgi man kuondego.

◼ Chiemb Odiechieng’: Ting’uru chiemo kar wuok e seche mag yueyo ni udhi manyo chiemo. Ng’ato nyalo tiyo gi gir ting’o chiemo manyalo romo e bwo kome. Ok oyie ne ng’ato ang’ata ting’o chiemo e gik madongo dongo kata gik molos gi glas.

◼ Chiwo: Achiel kuom yore mwanyalo nyisogo ni wagoyo erokamano en golo chiwo mar siro tij piny mangima sama wan e chokruog-distrikt. Chiwo mitimo gi chek onego oketie nying riwruok ma Joneno mag Jehova tiyogo e pinyu. Kuonde moko, ng’ato nyalo golo chiwo kotiyo gi kad miluongo gi English ni debit kata credit card.

◼ Yedhe: Ka nitie yedhe ma itiyogo mag thieth, ne ni ibiro gi moromo nikech ok gibi yudore e kar chokruok. Joma nigi tuwo sukari ma seche moko chuno ni nyaka ting’ sindan mar thieth ok onego owit sindenego kama iketoe yugi e chokruog-distrikt kata e otel. Kar mano, onego giwitgi mana kuonde moyangi ne wito gik ma kamago.

◼ Geng’o Hinyruok: Tim duto minyalo mondo igeng’ hinyruok ma nyalo timore nikech kier kata goruok piny. Higa ka higa, ji mang’eny hinyore nikech kit wuoch ma girwako, to moloyo wuoch ma ofunjgi kata ombong’gi boyo. Ber rwako wuoche modimbore, moromi kendo mibiro wuothogo maber kuonde miidho, kata e seche mireto, kod kinde mamoko.

◼ Modhi ma Nigi Suya Mager: Nitie chokruoge moko mag distrikt mitimo kuonde mogeng’ore. Kuom mano, en gima nyiso hera ka ok watiyo gi modhi ma nigi suya mager ahinya manyalo chando joma nigi tuoche mag kor.—1 Kor. 10:24.

◼ Fom mag Tafadhali Fuatia Upendezi (S-43): Onego oti gi fomgo e chiwo weche kuom ng’at moro amora ma olendne e kinde chokruog-distrikt to orwako wach. Inyalo chiwo fom ma isepong’o maber ne Migawo mar Buge kata inyalo miyo jagoro ka idok e kanyaklau.

◼ Kuonde Chiemo: Mi nying Jehova duong’ kuom bedo gi timbe mabeyo seche ma in e kuonde chiemo. Rwakri ka Jakristo madier. Kapo ni e alworau ji joweyo gimoro matin ne joma tiyo kuonde michieme, inyalo timo kamano.

◼ Otende:

Kik imak kuonde nindo mokalo mibiro tiyogo, kendo kik iwe ji mokalo kwan moketi onind e odno.
Ka isemako kar nindo e otel, kik ilok chenrono mak mana ka nitie wach mowuok apoya, to sama mano otimore, ne ni inyiso weg otendno mapiyo kaka nyalore mondo jomamoko manyalo dwaro kuonde nindo oti gi thuolo ma iweyono. (Math. 5:⁠37) Ka iloko chenro kamano, ne ni weg otendno omiyi namba kata kalatas ma nyiso ni iloko chenro. Kuonde mang’eny, ka iloko chenro mar kar nindo e dakika mogik, tiende ni ka odong’ seche ma tin ne 48 to ichako tiyo gi odno, ok bi dwokni pesa misechulo.
Kapo ni itiyo gi kad mar chulo pesa e otel, ber ng’eyo ni nitie kwan moro mar pesa ma weg otel makoga mondo gichulgo gik mitiyogo kaachiel gi gimoro amora manyalo kethoreni e otendno. Ok ibi tiyo gi pesa momakgo kuom kinde nyaka bang’ ndalo matin ka giseng’ado pesagi.
Kaw gir dhiro osike ei otendno mana ka iikori mar tiyo kode, kendo idwoke mapiyo mondo jomamoko bende oti kode.
Ne ni iweyo gimoro matin ne jal ma konyi ting’o gigi kod jal ma lwokoni ot kapo ni mano owinjore gi alworau.
Kik ited e ot ma ok oyienie timo kamano.
Kik ikaw chiemo mohingo ma weg otel ochano ne welo ma biro bedo e otendno mana ni mondo idhigo e chokruok, obed chiemb okinyi kata mamoko.
Kinde duto, nyis nyak mar roho sama itudori gi jotich manie otendno. Jotijego rito welo mang’eny kendo gimor kodwa ka wang’won, wahore, kendo wawinjo wach.
Jonyuol onego ong’e gima nyithindgi timo kata tuke ma gitugo seche duto ma gin e otendno.
Nengo kuonde nindo e otende mochan e Recommended Lodging List oromo odiechieng’ mangima moriwo nyaka osuru. Kapo ni weg kuondego okwayi pesa momedore, kik imigi; kar mano, nyis owete ma tiyo e Migawo mar Kar Nindo mapiyo kaka nyalore sama idok e chokruok.
Ka wach moro marach oneno e ot ma omiyino, ne ni inyiso owete ma tiyo e Migawo mar Kar Nindo sama in e chokruok.

◼ Chiwruok: Ng’at ma diher chiwore onego odhi e Migawo mar Chiwruok mayudore e chokruogni. Nyithindo ma johigini 16 kadok piny nyalo konyo ahinya kapo ni gitiyo e bwo jonyuolgi kata jal machielo ma jonyuolgi oyiene ritogi.