Timbewa Mabeyo Miyo Nyasaye Duong’
1. Ang’o momiyo yot mondo joma nenowa sama wadhi e chokruogewa mag distrikt ofweny ni nitie gima timore e taondgi?
1 Seche ma wadhiga e chokruogewa mag distrikt, yot mondo joma nenowa ofweny ni nitie gimoro matimore e taondegi. E taonde mang’eny mitimoe chokruoge mag distrikt, jolendo mag redio, televison, kata gasede landoga chokruogego. Otende koda ute mag nindo pong’ga gi welo mobiro e chokruok kendo joma odak e alworago nenoga welo mang’eny morwako baj. Weche maluwogi biro konyowa miyo Nyasaye duong’ sama wan e taon mitimoe chokruog-distrikt.—1 Pet. 2:12.
2. Ere kaka rwakruokwa mobidhore sama wan e taon mitimoe chokruog-distrikt miyo Nyasaye duong’?
2 Rwakruok Mobidhore: Rwakruokwa mobidhore sama wadhi e chokruogewa mag distrikt konyoga e chiwo neno. Kamano bende e kaka onego warwakre sama wan e otel, sama wachiemo, kata sama wang’iepo nikech mano konyo e chiwo neno moloyo. Kata obedo ni e kinde kaka mago ok ochuno ni warwakre ka joma dhi e chokruok, pod onego warwakre e yo mobidhore kendo manyiso luor. Joma nenowa onego one kaka wapogore mabor gi joma ok gin Joneno. (Rumi 12:2) E wi mago, onego warwak baj nikech mano biro konyo e lando chokruogno, biro miyowa thuolo mar chiwo neno, kendo konyo Joneno wetewa mondo ofwenywa.
3. Ere kaka wanyalo nyiso horuok kod dimbruok sama wan e chokruog-distrikt?
3 Horuok kod Dimbruok: Sama wanyiso horuok kod dimbruok e piny ma ji onge herani, donge mano biro moro jotich mag otende koda jomamoko ma nenowa? (2 Tim. 3:1-5) Sama wamako kombe kata wariedo mondo wakaw buge manyien, onego wadew jomamoko bende. (1 Kor. 10:23, 24) Bang’ ka jal moro nohango dhi e chokruog-distrikt, nowacho kama: “Ok anyal paro twege ma nogol chieng’no, kata kamano, timbe Jonenogo nomora ahinya.”
4. Ang’o momiyo ber ka wachiwore konyo e tije mopogore opogore e chokruog-distrikt ka mano nyalorenwa?
4 Chiwruok: Chuny mar chiwruok en achiel kuom kido mifwenyogo Jokristo madier. (Zab. 110:3) Be inyalo chiwori mondo ikony tich e chokruog-distrikt? E chokruog-distrikt moro, owete gi nyimine madirom 600 nochiwore e timo ler kapok odiechieng chokruogno ochopo. Weg kama notimie chokruogno nowacho kama: “Pok ne waneno gima kama! Tek ahinya neno ji mathoth kamae kochiwore tiyo atiya maok ochulgi.” Mano kaka wan gi siso mar chopo e chokruoge distrikt ma 2013 ma biro miyowa thuolo mar winjo kendo puonjruok wach Nyasaye, kaachiel gi miyo Nyasaye duong’!