Weche Miparonwa Kuom Chokruok Maduong’ mar Ndalo Adek
Seche mag Program: Ibiro yaw rangeye sa 2:00 okinyi. Thum biro chakore sa 3:20 okinyi e odiechienge adekgo duto. Sama thum chakore onego oyud ka waduto wasebet mondo omi program ochakre e yo ma nyiso luor. Program ma chieng’ Tich Abich gi Ngeso biro rumo sa 11:00 odhiambo, to ma chieng’ Jumapil norum sa 10:00 odhiambo.
‘Pak Jehova gi Wer’: Jotich Nyasaye machon ne pako Jehova gi wer, to nyaka chil kawuono wer en gima duong’ ahinya e lamo madier. (Zab. 28:7) Nitie thumbe molos ma yawo program mokinyi gi modiechieng’ kuom ndalo adekgo duto. Magi ok gin mana thumbe migoyo agoya mondo obudh ji, to olos thumbego mondo okonywa e lamo Jehova. Kuom mano, sama jakom mar program owacho ni koro thum dwaro chakore, ber ka wabet e kombewa mondo wawinjgi kar goyo mbaka e kindeno. Timo kamano nyiso ni wakawo ma pek kinda ma joma noloso wendego (Watchtower orchestra) notimo. Ber ng’eyo ni diriyo e higa, owetewa gi nyiminewa wuokga kuonde mopogore opogore e piny mangima, kendo gichulo pes wuoth giwegi, mondo gidhi Patterson, New York, losonwa thumbe mamitgo. Bang’ winjo thumbego kuom dakika matin, waduto wanyalo riwore e wero wende mag Pinyruoth ma wapakogo Jehova.
Kuonde Chungo Mtokni: E kuonde duto ma ibiro timie chokruogno to nigi kuonde ma oyienwa chungoe mtokni, ji biro keto mtoknigi ma ok gichulo, ka joma okwongo chopo e ma imiyo thuolo mokwongo. Nikech kuonde chungo mtoknigo kinde mang’eny ok lach, kar mondo ng’ato ka ng’ato ma nigi mtoka obi gi mare, nyalo bedo maber ka jomoko otimo chenro mar riwore e mtoka achiel. Nitie bende kuonde chungo mtokni moyang ne joma ong’ol, kendo joma ibiro yienegi keto mtokni kuondego gin mana joma nembni mtoknigi nyiso ni giting’o joma kamago, to kod joma oketo kalatas maduong’ ma nyiso ni gin gi ng’at mong’ol e i mtokgi.
Mako Kombe: Sama oyaw rangeye mag kama itimoe chokruok, kik waring ka wachomo kombe ka gima walaro kombe gi Jokristo wetewa. Onego wayie tuonore gik moko mondo jomamoko oyud ber. Chuny ma kamano miyo jomoko fwenyo ni wan Jokristo madier, kendo mano miyo gipako Nyasaye ma walamo. (Joh. 13:34, 35; 1 Kor. 13:5; 1 Pet. 2:12) Inyalo mako kombe mana ne joma uidhogo mtoka achiel, joma idakgo, kod joma ipuonjrigo Muma. Ikwayowa ni kik waket gik moko e kombe ma ok wabi betie. Timo kamano biro konyo jomamoko ng’eyo ni kombego ni thuolo. Nitie kuonde bet moyang ne joma hikgi oniang’ kata ma tuwore. Nikech kuonde moyanggo ok lach to joma obet kuondego nyalo dwaro ni okonygi e yo moro, ibiro yie ne ng’at achiel kata ji ariyo kende mondo obed but ng’atgi man kuondego.
Rwak Lewni Mowinjore: Onego warwakre e yo maber, ma ok kal tong’ kendo mobidhore sama wan e chokruok ma ok waluwo kit rwakruok ma ji mang’eny ohero e pinyni. (1 Tim. 2:9) Kamano bende e kaka onego warwakre sama wan e otel, sama wachiemo, kata sama wang’iepo nikech ok wadwar rwakore e yo mojwang’ore. Ka warwakore maber, wiwa ok bi kuot rwako baj, kendo wabiro chiwo neno ka thuolo mar timo mano oyudore. Ka warwakore maber kendo nyiso kido mabeyo mag Jokristo sama wan e chokruok maduong’ ma bironi, mano biro moro chuny Jehova, kendo nyalo ywayo joma chunygi ni kare mondo giyie winjo puonj ma wuok e Muma.—Zef. 3:17.
Tiyo gi Masindewa e Yo Mowinjore: En tim maber keto simbewa, kata masin moro amora ma wan-go e yo ma ok choch jomamoko. Kapo ni itiyo gi kamera, vidio, tablet, kata masin machielo ma kamago, ti kodgi e yo ma ok ibi geng’o jomoko kata chochogi. Bende ok en tim mowinjore oro sms kata email ma ok ochuno sama program dhi nyime.
Chiemb Odiechieng’: Ting’uru chiemo kar wuok e seche mag yueyo ni udhi manyo chiemo. Ng’ato nyalo tiyo gi gir ting’o chiemo ma nyalo romo e bwo kome. Ikwayowa ni kik wating’ chiemo e gik madongo dongo mag ting’o chiemo, kata ting’o gik molos gi glas.
Chiwo: Achiel kuom yore mwanyalo nyisogo ni wagoyo erokamano en golo chiwo mar siro tij piny mangima sama wan e chokruogno. Chiwo mitimo gi chek onego oketie nying riwruok ma Joneno mag Jehova tiyogo e pinyu. Kuonde moko, ng’ato nyalo golo chiwo kotiyo gi kad mar debit kata credit card.
Yedhe: Ka nitie yedhe ma itiyogo mag thieth, ne ni ibiro gi moromo nikech ok gibi yudore e kar chokruok. Joma nigi tuwo sukari ma seche moko chuno ni nyaka ting’ sindan mar thieth ok onego owit sindenego kuonde ma iwitoe yugi e chokruogno, kata e otel. Kar mano, onego giwitgi mana kuonde moyang ne wito gik ma kamago.
Geng’o Hinyruok: Tim duto minyalo mondo igeng’ hinyruok ma nyalo timore nikech kier kata goruok piny. Higa ka higa, ji mang’eny hinyore nikech kit wuoch ma girwako, to moloyo wuoch ma ofunjgi kata ombong’gi boyo. Ber rwako wuoche modimbore, moromi kendo mibiro wuothogo maber kuonde miidho, kata e seche mireto, kod kinde mamoko.
Kombe Midhirogo Nyithindo kod Mwabetgo Kar Kendwa: Kombe midhirogo nyithindo kod kombe mibetie ka ng’ato ni kar kende ok onego obigo e kar chokruok. Kata kamano, kombe ma nyithindo nyalo betgo maber e dir jonyuolgi to inyalo bigo.
Modhi ma Nigi Suya: Nitie chokruoge moko madongo mag ndalo adek mibiro tim kuonde mogeng’ore. Kuom mano, en gima nyiso hera ka wayiero mar weyo tiyo gi modhi ma nigi suya mager ma nyalo chando joma nigi tuoche mag kor.—1 Kor. 10:24.
Fom mag Tafadhali Fuatia Upendezi (S-43): Onego oti gi fomgo e chiwo weche kuom ng’at moro amora ma olendne e kinde chokruoge mag ndalo adek to orwako wach. Inyalo chiwo fom ma isepong’o maber ne Migawo mar Buge kata inyalo miyo jagoro ka idok e kanyaklau.
Kuonde Chiemo: Mi nying Jehova duong’ kuom bedo gi timbe mabeyo seche ma in e kuonde chiemo. Rwakri ka Jakristo madier. Kapo ni e alworau ji joweyo gimoro matin ne joma tiyo kuonde michieme, inyalo timo kamano.
Otende:
Kik imak kuonde nindo mokalo mibiro tiyogo, kendo kik iwe ji mokalo kwan moketi onind e odno.
Ka isemako kar nindo e otel, kik ilok chenrono mak mana ka nitie wach mowuok apoya, to sama mano otimore, ne ni inyiso weg otendno mapiyo kaka nyalore mondo jomamoko ma nyalo dwaro kuonde nindo oti gi thuolo ma iweyono. (Mat. 5:37) Ka iloko chenro kamano, ne ni weg otendno omiyi namba kata kalatas ma nyiso ni iloko chenro. Kapo ni iloko otel ma nisemako kodong’ ndalo ariyo to ichak nindo e otendno, ok bi dwokni pesa ma nimakogo kanyo.
Kapo ni itiyo gi kad mar chulo pesa e otel, ber ng’eyo ni nitie kwan moro mar pesa ma weg otel makoga mondo gichulgo gik mitiyogo kaachiel gi gimoro amora ma nyalo kethoreni e otendno. Ok ibi tiyo gi pesa momakgo kuom kinde nyaka bang’ ndalo matin ka giseng’ado pesagi.
Kaw gir dhiro osike ei otendno mana ka iikori mar tiyo kode, kendo idwoke mapiyo mondo jomamoko bende oti kode.
Ne ni iweyo gimoro matin ne jal ma konyi ting’o gigi kod jal ma lwokoni ot, kapo ni mano owinjore gi alworau.
Kik ited e ot ma ok oyienie timo kamano.
Kik ikaw chiemo mohingo ma weg otel ochano ne welo ma nindo e otendno.
Kinde duto, nyis nyak mar roho sama itudori gi jotich man e otendno. Jotijego rito welo mang’eny kendo gimor kodwa ka wang’won, wahore, kendo wawinjo wach.
Jonyuol onego ong’e gima nyithindgi timo kata tuke ma gitugo seche duto ma gin e otendno.
Nengo kuonde nindo e otende mochan e Recommended Lodging List oromo odiechieng’ mangima moriwo nyaka osuru. Kapo ni weg kuondego okwayi pesa momedore, kik imigi; kar mano, nyis owete ma tiyo e Migawo mar Kar Nindo mapiyo kaka nyalore sama idok e chokruok.
Ka wach moro marach oneno e ot ma omiyino, ne ni inyiso owete ma tiyo e Migawo mar Kar Nindo sama in e chokruok.
Chiwruok: Ng’at ma diher chiwore onego odhi e Migawo mar Chiwruok ma yudore e chokruogni. Nyithindo ma johigini 16 kadok piny nyalo konyo ahinya kapo ni gitiyo e bwo jonyuolgi kata jal machielo ma ritogi.