Chokruogewa mag Distrikt Chiwo Neno e Wi Adiera
1. Nyasi ma ne itimo kinde ka kinde ne miyo Jo-Israel thuolo mar paro matut kendo wuoyo kuom adiera mage madongo?
1 Jo-Israel machon ne chokore didek higa ka higa mondo gitim nyasi mopogore opogore. Kata obedo ni chwo ema ne dwarore mondo odhi e nyasigo, kinde mang’eny joot duto ne dhi Jerusalem mondo gibed e chokruoge madongogo ma mor nogundhoe. (Rapar 16:15, 16) Mago ne gin kinde mabeyo mag paro matut kendo wuoyo kuom adiera mag wach Nyasaye. Moko kuom adierago ne gin mage? Achiel en ni Jehova en Jachiwo ma jahera. (Rapar 15:4, 5) Machielo en ni inyalo gene kendo orito joge. (Rapar 32:9, 10) Nyasigo bende ne miyo Jo-Israel thuolo mar paro matut kuom kaka ginyalo luwo ranyisi maber mar Jehova nimar niluongogi gi nyinge. (Rapar 7:6, 11) Mano bende e kaka chokruogewa mag distrikt ma higa ka higa konyowa e kindegi.
2. Chokruog-distrikt biro chiwo ler nade e wi adiera?
2 Chokruog-Distrikt Chiwo Ler e Wi Adiera: E chokruogewa mag distrikt, wawinjo twege mabeyo, drama, ranyisi mitimo, kaachiel gi migepe mag penjo ji kendo magi duto konyowa winjo maler tiend adiera mag Muma. (Joh. 17:17) Nitie gik mang’eny masani osetim e iko chokruog-distrikt mabiro. Riwruok mar oganda Jehova oikonwa program mowinjore chuth gi gik madwarore ahinya e kindegi. (Math. 24:45-47) Be in gi siso mar winjo kendo neno gik moseiknwago?
3. Ang’o ma onego watim mondo program mar chokruog-distrikt okonywa chuth?
3 Kuom adier, wabiro yudo ber chuth ka wabedo kendo chiko itwa maber kuom odiechienge adekgo duto. Kapo ni pok ikwayo rusa e tich, ne ni itimo mano sani. Ne ni inindo moromo otieno kotieno mondo ichik iti maber e odiechieng’ maluwo. Ji mang’eny yudo ni ka ging’iyo jagol-twak kaachiel gi ndiko weche machuok, mano konyogi keto pachgi e program. Kik iwe mondo simbi kaachiel gi gik tudruok mamoko omoni kata omon jomamoko winjo program. Tem matek mondo kik iwuo, kik indik SMS, kik imethi kata chiemo sama program dhi nyime.
4. Ere kaka jonyuol nyalo konyo nyithindgi mondo giyud ber chuth e chokruog-distrikt?
4 E kinde mapod ne itimo nyasi mag Sabato, kane joot ma Jo-Israel ochokore mondo giwinj kisomo Chik e Nyasi mar Kiche, ne gidhi bende gi ‘joggi matindo, mondo giwinj kendo gipuonjre.’ (Rapar 31:12) Mano kaka wayudo jip sama waneno joot kobet kanyachiel e chokruog-distrikt kendo neno ka nyithindgi chiko itgi! Odhiambo kodhiambo, unyalo tiyo gi thuolo moro mondo ukadhie weche ma undiko momorou ahinya e program modiechiengno. “Kit chuny nyathi en fuwo,” omiyo jonyuol nyalo timo maber ka girito nyithindgi moriwo nyaka mago ma ndhowe e kinde mag yueyo mar odiechieng’ kod e otel ma ginindoe maok ‘giwegi.’—Nge. 22:15; 29:15.
5. Ere kaka timbewa mabeyo sama wan e otel biro miyo ji one ber mar adiera?
5 Timbewa Mabeyo Miyo Ji Neno Ber mar Adiera: Bedo gi timbe mabeyo sama wan e taon mitimoe chokruog-distrikt biro miyo ji one ber mar adiera. (Tito 2:10) Weg otende bedo mamor ahinya sama ji luwo chike mag otendego, kendo ginyiso kido mag horuok kod ng’wono ne joma tiyo e otendego. (Kol. 4:6) E higa mokalo, kane ofis ooro jomoko mondo olos gi weg otel moro, jatend otendno nowachonegi kama: “Wamor ahinya sama jou obiro kae nikech gin joma beyo miwuoro. Gin joma odimbore kendo mang’won, kendo kinde duto gichiwo luor ne jotijwa kaachiel gi gik manie otendwa.”
6. Ere kaka rwakruokwa nyalo miyo ji one ber mar adiera sama wan e taon mitimoe chokruog-distrikt?
6 Sama warwako baj mag chokruog-distrikt, mano ok land mana chokruogwa kende kata miyo jomoko ofwenywa mayot, to bende ochiwo neno ne joma waromogo. Joma nie taon mitimoe chokruog-distrikt biro neno kaka joma nigi bajgo orwako lewni mowinjore, maok ojwang’ore, kendo maok luw kit rwakruok mar jopiny. (1 Tim. 2:9, 10) Omiyo, onego wang’i ahinya kit rwakruokwa sama wadonjo e taon mitimoe chokruok kachiel gi sama wachopo e otende ma wanindoe. Chopo kuondego ka warwako onyasa kod tisat ok bi chiwo luor mowinjore. Kata kapo ni watimo chokruok e pap, pod onego warwak lewni machiwo luor. Kapo ni waloko lewni sama wadhi chiemo godhiambo bang’ program, onego waket e paro ni gima duong’ mokelowa e taondno en chokruok, omiyo kik warwakre ajwang’a.
7. Achiel kuom gik ma wanyalo timo mondo wayud mor gi Jokristo wetewa e kinde chokruog-distrikt en mane?
7 Kane Jo-Israel nie nyasi ma ne gitimo, ne giyudo mor ahinya kuom jiwruok gi jowetegi ma ne a e pinje mamoko, kendo mano ne miyo winjruok bedoe. (Tich 2:1, 5) E kinde chokruoge mag distrikt, winjruokwa makende mar owete ma Jokristo nenorega ayanga. Winjruokwa maberno kinde mang’eny kawo joma nenowa gi wuoro. (Zab. 133:1) Kar wuok dhi ng’iewo chiemb odiechieng’, nyalo bedo gima ber ahinya ka wating’o chiemo moro mayot mondo wayud thuolo mar goyo mbaka gi owete gi nyiminewa!
8. Ang’o momiyo ber ka wachiwore tiyo kapo ni mano nyalorenwa?
8 Kinde mang’eny joma nenowa wuoroga ahinya kaka chokruogewa mag distrikt ichano e yo maber, to moloyo sama giwinjo ni joma timo tijego duto gin joma ochiwore. Be inyalo ‘chiwori gi hera’ mondo ikony tich e chokruog-distrikt. (Zab. 110:3) Joot duto kinde mang’eny jochiwre mondo gikony nyithindgi neno ber mar chiwruok. Kapo ni in ng’at ma wiye kuotga, to ichiwori tiyo e chokruog-distrikt, ibiro yudo thuolo mar romo gi osiepe mang’eny. Nyaminwa moro nowacho kama: “Ne ang’iyo wuoyo mana gi joodwa kaachiel gi osiepe moko manok e chokruog-distrikt. Kata kamano ka ne achiwora mondo akony e timo ler, ne ayudo thuolo mar ng’iyo gi owete gi nyimine mang’eny. Nayudo mor ahinya e kindeno!” Wabiro yudo mor ahinya ka wachiwore mondo wati gi jomamoko e migepe mag chokruog-distrikt. (2 Kor. 6:12, 13) Kapo ni pok ichiworiga e kinde mokalo, inyalo penjo jodongo mondo onyisi gigo madwarore.
9. Ere kaka wabiro gwelo ji e chokruog-distrikt?
9 Gwel Jomamoko Mondo Obi Owinj Adiera: Kodong’ jumbe adek to wachako chokruog-distrikt, wabiro timo kampen mar gwelo ji mana kaka wasebedo ka watimo e higini mosekalo. Kanyakla ka kanyakla biro temo gwelo ji mang’eny kaka ginyalo e alworagi duto. (Ne sanduk mawacho ni “Kaka Wabiro Chiwo Kalatese mag Gwelo Ji”) Onego ukel kalatese modong’ ka ubiro e chokruog-distrikt. Joma obiro e chokruog-distrikt biro tiyo gi kalatesego e gwelo jomodak e taon mitimoe chokruogno.
10. Chiw ane weche mosene manyiso ni kampen marwa mar higa ka higa nigi nyak maber.
10 Be kampen ma watimoga higa ka higa bedo gi nyak? E chokruog-distrikt moro, achiel kuom jorwak welo nomanyo ne dichwo moro gi jaode kom. Ne ginyise ni ‘kalatasno nomorogi ahinya’ ka ne omigigo. Ne giriembo mtokgi kuom kilomita mokalo 300 mondo gidhi e chokruogno! Kumachielo, nyaminwa moro ma ne lendo ot ka ot nogwelo dichwo moro ma ne dwaro ng’enyo weche momedore e wi chokruog-distriktno. Omiyo notiyo gi thuolono e lerone weche moko e kalatasno. Bang’ ndalo matin kane nyaminwano nie chokruog-distrikt noneno dichwocha kod osiepne moro ka giting’o buge manyien ma noyudo ogol e chokruogno!
11. Ang’o momiyo dwarore ahinya ni wabed e chokruogewa mag distrikt ma higa ka higa?
11 Jehova noketo nyasi ma nitimo kinde ka kinde mondo okony Jo-Israel ‘otine gi chunygi kendo gi adiera.’ (Josh. 24:14) Kamano bende, chokruogewa mag distrikt ma watimo higa ka higa konyowa dhi nyime ‘ka wawuotho e adiera,’ ma en gima dwarore ahinya e lamo Nyasaye. (3 Joh. 3) Mad Jehova gwedh kinda ma joma ohero adiera timo mar chopo e chokruogego kendo yudo ber kuomgi chuth!
[Blurb manie ite mar 3]
Bedo gi timbe mabeyo sama wan e taon mitimoe chokruog-distrikt biro miyo ji one ber mar adiera
[Blurb manie ite mar 4]
Kodong’ jumbe adek to wachako chokruog-distrikt, wabiro timo kampen mar gwelo ji
[Sanduk manie ite mar 3-6]
Weche Miparonwa Kuom Chokruog-Distrikt ma 2012
◼ Seche mag Program: Program biro chakore sa 3:20 okinyi kuom odiechienge adekgo duto. Sama thum chakore onego oyud ka waduto wasebet mondo omi program ochakre gi luor mowinjore. Program biro rumo sa 10:55 odhiambo chieng’ Tich Abich gi Ngeso, to obiro rumo sa 9:40 odhiambo chieng’ Jumapil.
◼ Kar Chungo Mtokni: Kuonde duto ma ibiro timie chokruog-distrikt to nigi kuonde chungo mtokni, ibiro yie ne ji keto mtokni maok gichulo, ka joma okwongo chopo ema kwongo nwang’o.
◼ Mako Kom: Inyalo mako kombe mana ne joma uwuothogo e mtoka achiel, joma idakgo, kod joma ipuonjorigo Muma.—1 Kor. 13:5.
◼ Chiemb Odiechieng’: Wakwayi mondo iting’ chiemb odiechieng’ moloyo wuok kar chokruok ni idhi manyo chiemo seche mag yueyo modiechieng’. Ng’ato nyalo tiyo gi gir ting’o chiemo manyalo romo e bwo kombe. Kik ubi gi gik madongo mag ting’o chiemo kod gik glas kar chokruok.
◼ Chiwo: Wanyalo nyiso ni wagoyo erokamano ka wagolo chiwo ne tich madhi nyime e piny ngima, kendo wanyalo timo kamano e chokruog-distrikt. Chiwo mitimo gi chek onego oketie nying mar “International Bible Students Association” kata nying machielo ma joneno tiyogo e pinyu.
◼ Aksident kod Gik Matimore Apoya: Ka nitie gima otimore apoya madwaro ni mondo ng’ato oyud thieth mapiyo ka en e chokruog-distrikt, nyisuru achiel kuom jorwak welo man machiegni mondo oter wach sano sano ne joma ochung’ne migawono, mondo gine gima inyalo tim mondo ochiw kony madwarore. Joma ochung’ne migawono biro neno kaka ginyalo konyo e wach motimore apoya.
◼ Yedhe: Ka nitie yedhe mitiyogo mag thieth, ne ni ibiro gi moromo nikech ok gibi yudore e kar chokruok. Joma nigi tuwo sukari ma seche moko chuno ni nyaka ting’ sindan mar thieth ok onego owit sindenego e kar keto yugi e chokruog-distrikt kata e otel.
◼ Wuoche: Higa ka higa, ji mang’eny hinyore nikech kit wuoch ma girwako. Ber rwako wuoche modimbore, maromi maber kendo mibiro wuothogo maber kuonde miidho, kata e seche mireto, kod kinde mamoko.
◼ Modhi ma Nigi Suya Mager: Nitie chokruoge moko mag distrikt mitimo kuonde mogeng’ore. Kuom mano, en gima nyiso hera ka ok watiyo gi modhi ma nigi suya mager ahinya manyalo chando jogo ma nigi tuoche mag kor.—1 Kor. 10:24.
◼ Fom mag Tafadhali Fuatia Upendezi (S-43): Fom mar Tafadhali Fuatia Upendezi onego otigo e chiwo weche kuom ng’at moro amora morwako wach bang’ ka oselendne e seche maok ochan e kinde chokruog-distrikt. Jolendo onego oting’ fom achiel kata ariyo sama gidhi e chokruog-distrikt. Fom ma osepong’ maber inyalo ter kar Migawo mar Buge kata miyo jagoro kidok e kanyaklau.—Ne Tijwa mar Pinyruoth ma Mei 2011, ite mar 3.
◼ Kuonde Chiemo: Mi nying Jehova luor kuom tim maber seche ma in kuonde chiemo. Kapo ni e alworau ji joweyo gimoro matin ne joma tiyo kuonde chiemo, inyalo timo kamano.
◼ Otende:
(1) Kik imak kuonde nindo mokalo mibiro tiyogo, kendo kik iwe ji mokalo kwan moketi onind e odno.
(2) Kochuno ni nyaka ilok chenro ma ne iseketo mar mako kar nindo, nyis weg otel gie sechego.—Math. 5:37.
(3) Kapo ni itiyo gi kad mar chulo pesa e otel, ket e paro ni nitie kwan moro mar pesa ma gimakoga mondo gichulgo gik mitiyogo kaachiel gi gimoro amora manyalo kethoreni e otendno. Ok ibi tiyo gi pesa momakgo kuom kinde nyaka bang’ ndalo matin ka giseng’ado pesagi.
(4) Kaw gir dhiro osike ei otendno mana ka iikori mar tiyo kode, kendo iduoke mapiyo mondo jomamoko bende oti kode.
(5) Ne ni iweyo gimoro matin ne jal mokonyi ting’o gigi kod maluoko ot.
(6) Kik ited e ot kama ok oyienie timo kamano.
(7) Kik ikaw chiemo mohingo ma weg otel ochano ne welo mabiro bedo e otendno, obed chiemb okinyi kata mamoko.
(8) Kinde duto, nyis nyak mar roho sama itudori gi jotich manie otendno. Jotijego rito welo mang’eny kendo gimor kodwa ka wang’won, wahore, kendo wawinjo wach.
(9) Jonyuol onego ong’e gima nyithindgi timo kata tuke ma gitugo seche duto ma gin e otendno.
(10) Ka wach moro marach oneno e ot ma omiyino, ne ni inyiso owete matiyo e Migawo mar Kar Nindo sama in e chokruok.
◼ Chiwruok: Ng’at ma diher chiwore onego odhi e Migawo mar Chiwruok mayudore e chokruogni. Nyithindo ma johigini 16 kadok piny nyalo konyo ahinya kapo ni gitiyo e bwo jonyuolgi kata jal machielo ma jonyuolgi oyiene.
[Sanduk manie ite mar 6]
Kaka Wabiro Chiwo Kalatese mag Gwelo Ji
Mondo wagwel ji e alworawa duto, onego wawuo machuok. Wanyalo wacho kama: “Amosi. Wagwelo ji duto e piny ngima e chokruok ma wabiro bedogo. Kalatasni mari. Ibiro yudo weche momedore e iye.” Wuo gi ilo. Ka wagwelo ji e giko juma, wanyalo chiwo gasede bende ka mano owinjore.