Be Iseikori ne Nyasi mar Chiemo e Yor Winjo Wach Nyasaye?

1. Nyasi dwaro ikruok kaka mage?

¹ Iko nyasi kawo thuolo malach. Nyaka dwar chiemo, losgi e yo maber, kendo chiwogi ne joma chamo. Kaka ibiro chiw chiemogo nyaka chan e yo maber. E wi mano, kama ibiro chamie chiemogo bende nyaka ik chon. Welo bende nyaka tim ikruok moko, to moloyo ka biro dwarore ni giwuoth koa mabor mondo omi gichop kanyo. Kata obedo ni iko nyasi kelo tich matek, mor mabedoe sama wachamo chiemo mamit kanyachiel gi osiepe miyo waikore tiyo matek kamano. Kinde okayo machiegni ma Joneno mag Jehova e piny mangima biro chokore e nyasi ma giserito ahinya, ka gin e grube madongo kod matindo mondo giyud chiemo e yor winjo wach Nyasaye e Chokruog-Distrikt mar “Endeleeni Kukesha!” Osetim tich mang’eny e iko program kaachiel gi gik mamoko. Osegwelwa waduto. Mondo omi wabedie kendo yudo ber moloyo, wan bende nyaka waikre ng’ato ka ng’ato.​​—⁠Nge. 21:5.

2. En ang’o madwarore mondo omi wabedie e program duto mag chokruog-distrikt?

² Yud Ber Moloyo: Be isetieko timo chenro magi mondo omi ibedie e program duto mag chokruogni? Kanyalore, wuo kod ng’at mondiki tich ka inyise ni ibiro dhi e program duto mar chokruog-distrikt, moriwo nyaka odiechieng’ mokwongo. Be isetieko timo chenro mar wuoth kaachiel gi kama ibiro nindoe? Jodong-kanyakla onego onon kendo gine ni okony jogo moti kod jogo ma nigi midekre kaachiel gi joma moko manyalo dwarore ni omi kony.​​—⁠Yer. 23:4; Gal. 6:⁠10.

3. Ang’o momiyo ok onego wadhi e chokruok moriwo pinje ma ok ogwelwae?

³ Kuonde moko ibiro timie chokruoge moriwo pinje. Ng’euru ni nitie kanyakla kod welo mawuok e pinje mamoko ma osegwel e chokruogegi. E sama gitimo chenro mar gwelo ji, ofis oseiko adimba kwan jogo ma onego ogwel, ka ginono kwan kombe kaachiel gi kwan otel mag nindo. Kapo ni jolendo odhi e chokruok moriwo pinje ma ok ogwelgie, kwan ji nyalo bedo mang’eny mokalo tong’.

4. Gin weche mage ma iparonwa mabiro konyowa bedo moikore ne chakruok mar program pile ka pile?

⁴ Tim ikruok mar chopo chon pile ka pile mondo omi iyud kar bet chon kapok program ochakore. Kaw dakika matin kapok program ochakore mondo ing’i kalatas moting’o chenro mar program. Timo kamano biro miyo iik chunyi ne weche ma ibiro puonj. (Ezra 7:⁠10) Sama jakom program lando thum mar chako program, winj thumno kendo iikri ne wer mokwongo kod lamo.

5. Ere kaka joot duto nyalo yudo ber moloyo kuom program?

⁵ Ka joot duto obet kanyachiel e kinde chokruok, mano biro konyo jonyuol neno ni nyithindgi chiko itgi maber ne program. (Rapar 31:12) Ijiwo ji duto mondo oel Muma kendo somo ka giluwore gi jagol-twak. Ndiko weche e yo machuok biro konyi chiko iti maber. Weche ma isendikogo biro konyi bang’e paro weche madongo mag twege. Lo tem mar dwaro wuoyo ka ok ochuno sama program dhi nyime kata tem mar wuok kama ibetie. Ka in kod simo, kik iwe ochandi kata chando jomoko sama program dhi nyime. Bang’ program modiechieng’ mangima, donge inyalo wuoyo gi jomoko kuom gik ma ne omori kuom programno?

6. En thuolo mane makende mayudore e chokruog-distrikt, kendo ere kaka wanyalo tiyo gi thuolono chuth?

⁶ E chokruog-distrikt, wan kod thuolo makende mar bedo kanyachiel gi owete kod nyiminewa ka wamor, ma en gima ok timre e piny. (Zab. 133:⁠1-3; Mari. 10:⁠29, 30) Donge inyalo temo mondo ing’eri gi jogo mobet machiegni kodi kendo wuoyo kodgi e sa yueyo ka ji chamo chiemo modiechieng’? Mano en achiel kuom gik mamiyo ber ting’o chiemo mayot kendo dong’ e kar timo chokruok moloyo wuok ka wadhi manyo chiemo e otel. Ne ni thuolo makende mar jiwruok gi oweteni ok kali.​​—⁠Rumi 1:⁠11, 12.

7. Gin ikruok mage monego watim kaluwore gi nanga mwabiro rwako?

⁷ Rwakruok: Ber neno ni Jehova ne ochiko Jo-Israel mondo giket usi momin e riak lepgi kendo kuom usi mominno giket usi maratiglo. (Kwan 15:⁠37-​41) Mano ne paronigi ni gin jogo mowal nikech lamo Jehova. E kindegi, ka warwakore e yo manyiso luor kendo ma ok kal tong’ ka wan e chokruog-distrikt, miyo wabedo mopogore gi piny. Rwakruokwa chiwo neno maber ne jogo ma nenowa kata sama wadhi chiemo e otel bang’ program duto. Omiyo, non chon ka iketo e paro kit nanga ma ibiro rwako.

8. Ere kaka wanyalo lendo ne jomoko e gweng’ ma itimoe chokruog-distrikt?

⁸ Chiw Neno: Ka watimo chenro chon, wanyalo lendo ne ji e gweng’ ma itimoe chokruok. Owadwa moro gi chiege ma ne odhi e otel bang’ program ne onyiso jatij otel baj mare kae to openje kama: “Be iseneno joma orwako baj machalo kama?” Jatij otelno ne owacho ni ne oseneno, kendo ne owuoro gimomiyo ji mang’eny ne orwako baj. Mano ne omiyo gidhi nyime gi wuoyo, kendo owadwano ne ogwelo ja otelno e chokruog-distriktno.

9. Ere kaka wanyalo nyiso erokamano ne Wuon nyasi mogwelowa, ma en Jehova?

⁹ Kata obedo ni owetewa ema biro golo twege, chiwo penjo gi dwoko, kod timo ranyisi mopogore opogore, Jal ma ikonwa nyasi mar higa ka higa e yor winjo wach Nyasaye, en Wuonwa me polo Jehova. (Isa. 65:⁠13, 14) Wanyiso erokamano ne Wuon nyasi mogwelowa, ka wabedoe odiechienge duto kendo chamo chiemo duto michiwo e yor wach Nyasaye. Be isetieko timo ikruok mondo omi itim kamano?

[Sanduk manie ite mar 4]

Weche Miparonwa Kuom Chokruog-Distrikt

◼ Seche mag Program: Program biro chakre sa 3:20 okinyi kuom odiechienge adekgo duto. Rangeye ibiro yawo sa 2:00 okinyi. Sama ichako goyo thum, onego mano yud ka waduto wasebet e kombewa mondo omi program ochakre gi luor mowinjore. Program biro rumo sa 10:55 odhiambo chieng’ Tich Abich gi Ngeso, to obiro rumo sa 10:00 odhiambo chieng’ Jumapil. E chokruoge moriwo pinje, program mar Tich Ang’wen biro chakre sa 7:20 odiechieng’, to rumo sa 10:45 odhiambo.

◼ Kar Mtokni: Kuonde duto ma ibiro timoe chokruog-distrikt to nigi kuonde chunge mtokni ibiro yie ne ji ketoe mtokni ma ok otim chudo, joma okwongo biro ema kwongo nwang’o. Mana joma ong’ol kende ema ibiro yieni mondo ochung’ mtokegi kuonde moyanginegi. Nikech kuonde michungoe mtokni ok hiny bedo malach, jogo ma nigi mtokni mang’eny nyalo tiyo gi mtoka achiel.

◼ Mako Kom: Inyalo mako kombe mana ne jogo ma wuotho kodi e mtoka achiel kata ne joma idak godo e ot achiel.

◼ Chiemb Odiechieng’: Wakwayi mondo iting’ chiemb odiechieng’ moloyo wuok kar chokruok ni idhi manyo chiemo seche mag yueyo modiechieng’. Ng’ato nyalo tiyo gi gir ting’o chiemo manyalo romo e bwo kome. Gik madongo mag ting’o chiemo, gik molos gi glas, koda kong’o ok oyie ne ng’ato birogo kar chokruok.

◼ Chiwo: Wanyalo nyiso ni wadwoko erokamano ka wagolo chiwo ne tich madhi nyime e piny mangima, kendo wanyalo timo kamano ka wan e Od Romo marwa kata e chokruog-distrikt. Chiwo mag pesa michiwo kitiyo gi chek e chokruog-distrikt onego oketie nying riwruok ma Joneno tiyogo e pinyu.

◼ Aksident Koda Gik Matimore Apoya: Ka nitie gima otimore apoya madwaro ni mondo ng’ato oyud thieth mapiyo ka en e chokruog-distrikt, nyisuru achiel kuom jorwak welo man machiegni mondo oter wach sano sano ne joma ochung’ne migawono, mondo jal mowinjore moseket one gima inyalo tim mondo ochiw kony madwarore. Joma ochung’ne migawono biro neno kaka ginyalo konyo e wach motimore apoya.

◼ Wuoche: Higa ka higa, ji mang’eny hinyore nikech kit wuoche ma girwako. Ber rwako wuoche modimbore, maromi maber kendo mibiro wuothogo maber kuonde mag raidhi, kata e seche miwuotho piyo, kod kinde mamoko bende.

◼ Mako Weche e Tep: Gik mako weche ok onego ochuogi e sitima mar kama itimoe chokruok kata tudogi e masin mar thum mitiyogo e chokruok, kendo inyalo mana ti kodgi e yo mamiyo ng’ato ok chand jomoko.

◼ Kombe Midhirogo Nyithindo kod Mwabetgo Kar Kendwa: Kombe mag dhiro nyithindo kod kombe mibetie ka ng’ato ni kar kende ok onego okel kar chokruok. Kata kamano, kombe ma nyithindo nyalo betgo maber e dir jonyuolgi inyalo kel.

◼ Modhi ma Nigi Suya: Nitie chokruoge moko mag distrikt mitimo kuonde mogeng’ore. Kuom mano, en gima biro nyiso ng’wono ka ok wati ahinya gi modhi magolo suya ahinya, manyalo chando jogo ma nigi tuoche mag kor.​​—⁠1 Kor. 10:24.

◼ Fom mag Manyo Ji: Fom mar Tafadhali Fuatia Upendezi (S-43) onego oti godo e chiwo weche kuom ng’at moro amora morwako wach bang’ ka oselendne e yo ma ne ok ochan e kinde chokruog-distrikt. Jolendo onego oting’ fomgo achiel kata ariyo sama gidhi e chokruog-distrikt. Fom ma osepong’ iye maber inyalo ter kar Migawo mar Buge kata miyo jagoro bang’ dok e kanyaklau.​—⁠Ne Huduma Yetu ya Ufalme, ma Februar 2005, ite mar 6.

◼ Kuonde Chiemo: Mi nying Jehova duong’ kuom tim maber seche ma in kuonde chiemo. Kuonde mang’eny michieme, ji thoro weyo gimoro matin ne jotich, kaluwore gi kaka olosgi.

◼ Otende: (1) Kik imak kuonde nindo mokalo mago ma ibiro tiyogo, kendo kik iwe ji mokalo kwan moketi onind e odno. (2) Kochuno ni nyaka ilok chenro ma ne iseketo mar mako kar nindo, nyis weg otel gie sechego. (3) Kik ited e ot kama ok oyienie timo kamano. (4) Ne ni iweyo gimoro matin ne jal malwoko ot. (5) Kik ikaw chiemo mang’eny mokalo mochan gi weg otel ne welo ma bende tiyo gi otendno, obed chiemb okinyi, kahawa, kata chiemo mamoko. (6) Kinde duto, nyis nyak mar roho sama itudori gi jotich manie otendno. Jotich mag otendego rito welo mang’eny kendo gimor ahinya seche ma wang’won, wahore mos, kendo winjo wach. (7) Ka wach moro marach oneno e ot ma omiyino, ne ni inyiso owete ma tiyo e Migawo mar Kuonde Nindo sama in e chokruok.