Luwuru Kristo Kunyiso Luor
1. Wi chokruog-distrikt ma higani utudore nade gi wach nyiso luor?
1 Muma nyiso ni, Jehova, ma e Jaloch e wi Polo gi Piny, orwako luor kaka nanga. (Zab. 104:1) Kinde duto Yesu ne wuoyo kendo timo gik moko e yo manyiso ni ne omiyo Wuon mare duong’ kendo ne ochiwo luor kuom chenro mag Wuon mare. (Joha. 17:4) Ng’ato ka ng’ato kuomwa biro bedo gi thuolo mar luwo ranyisi ma Yesu ne oketo, kendo kelo ne Jehova duong’ e kinde Chokruog-Distrikt mabiro mar “Mfuateni Kristo!”
2. Ere kaka ikruok ma watimo mar bedoe e odiechienge duto miyo Jehova duong’?
2 Lamo Manyiso Luor: Wanyalo miyo Jehova duong’ ka wachano mar bedoe e nyasi moseiknwa mar gago kuom Wach Nyasaye. Be isewuoyo gi jal mondiki tich, ma ichano yoreni mondo omi ibedie kuom odiechienge duto mag chokruogno, moriwo nyaka Tich Abich? Be isetimo chenro mondo omi ichop chon ma imany kar bet, kendo mondo wer gi lamo michakogo oyudi kisebet? Be isechano kaka ibiro chamo chiemb odiechieng’ kama chokruok timoree mondo omi ibed machiegni gi oweteni? Seche ma jakom gwelowa kokwayo mondo wabed e kombewa ka wer pok ochakore, onego wang’ad mbaka ma ne wagoyo piyo, kendo wabed piny kapok program ochakore.
3. Chiko itwa ka waketo pachwa duto e program nyiso nade ni wamiyo lamo marwa luor?
3 Chiko itwa ka waketo pachwa duto e program bende miyo Wuonwa manie polo duong’. Bang’ neno chokruog-distrikt ma ne otimore e alworane, jandik-gaset moro ne ondiko kawacho ni ng’ato ang’ata ma ne nyalo neno joma nie chogruogno, ne nyalo wuoro gi mor kuom neno “dimbruok ma joma ne nikanyo nyiso, ka gichiko itgi gi luor ne weche ma ne iwacho, kendo timo kamano e yo manyiso ni ne gimor kod Wach Nyasaye.” Bende ne owuoyo kuom “ng’eny nyithindo ma ne nikanyo . . . , ka giduto gidimbore e yo miwuoro kendo ka ginono kendo somo ndiko manie Muma Maler.” Seche ma program dhi nyime, mago ok gin kinde mag wuoyo awuoya oyiem, ndiko kata oro sms, chiemo, kata wuotho awuotha koni gi koni ma onge gimomiyo. Rowere onego obed kanyachiel gi jonyuolgi mondo omi jonyuol okonygi winjo program e yo maber. (Rapar 31:12; Nge. 29:15) Timo kamano nyiso ni wamiyo jomoko luor kendo ni wamor gi chenro majaber ma imiyowano, mar gago kuom Wach Nyasaye.
4. Ang’o momiyo onego warwakre e yo manyiso luor ka wan e chokruog-distrikt?
4 Rwakruok Manyiso Luor: Ji mang’eny ne opuoyo weche ma ne oparnwa e twak moro ma nogol e chokruog-distrikt higa mokalo, ma ne wacho ni “Nyis Luor Kaka Jakristo Kinde Duto.” Twagno ne ojiwo ni jotich Nyasaye onego otem ahinya mondo ginyis luor kaka Jokristo e rwakruok koda bidhruok margi. Higani, onego wakaw wachni e yo mapek kendo. Kaka warwakore en gima nyiso paro manie chunywa kuom Jehova koda kaka wakawo migawo ma wan-go mar bedo Joneno mage. Kinde duto onego warwakre kaka joma wacho ni, “giluoro Nyasaye.”—1 Timo. 2:9, 10.
5. Ere kaka wanyalo siko ka wanyiso luor e rwakruokwa kinde mag yueyo, e dala mitimoe chokruog-distrikt?
5 Be onego warwakre e yo manyiso luor mana e seche ma wan e program kende? Ng’e ni ji mathoth biro ng’iyowa ka warwako baj mag chokruog-distrikt e taon mitimoe chokruogno. Yo ma warwakrego onego onyis ni wapogore gi joma moko. Kuom mano, kata mana e kinde mag yueyo, kaka sama wadhi manyo chiemo bang’ program, onego warwakre kaka owinjore gi jotich Nyasaye ma obiro e dalano mondo omi gibed e chokruok mar Jokristo. Omiyo ok onego warwak lewni kaka jins, onyasa, kata tisat. Mano kaka nyiso luor e rwakruokwa biro chiwo neno ne jo modak e alworano! Jehova bedo mamor ka rwakruokwa nyiso ji ni kare wan jotich Nyasaye adier.
6. Gin ber mage mayudore kuom nyiso luor kaka Jokristo?
6 Ber mag Nyiso Luor: Nyiso luor kaka Jokristo e chokruogewa mag distrikt chiwonwa thuolo mar lendo kata ka ok ne wachano, kendo miyo joma ng’iyowa bedo gi paro maber kuomwa. E giko chokruok moro mar distrikt, ofisa moro ne owacho kama: “Podi ok ne waneno joma odimbore maber kama. Un mana kaka Nyasaye dwaro ni wabed.” Nyiso luor en gima nyiso ni wahero jowadwa kendo wamiyo Jehova duong’. (1 Pet. 2:12) Timo kamano nyiso ni wamiyo Nyasaye luor, kendo ni wamor gi thuolo ma wan-go mar mondo opuonjwa gi Wuonwa. (Hibr. 12:28) Watemuru matek mondo wanyis luor ka warito Chokruog-Distrikt ma higani mawacho ni, “Mfuateni Kristo!”
[Sanduk manie ite 5]
Weche Miparonwa Kuom Chokruog-Distrikt
◼ Seche mag Program: Program biro chakore sa 3:20 okinyi kuom odiechienge adekgo duto. Rangeye ibiro yawo sa 2:00 okinyi. Sama ichako goyo thumbe mag Pinyruoth, onego mano yud ka waduto wasebet e kombewa mondo omi program ochakre gi luor mowinjore. Program biro rumo sa 11:05 odhiambo chieng’ Tich Abich gi Ngeso, to obiro rumo sa 10:10 odhiambo chieng’ Jumapil.
◼ Kar Mtokni: Kuonde duto ma ibiro timoe chokruog-distrikt to nigi kuonde keto mtokni, ibiro yie ne ji ketoe mtokni ma ok otim chudo. Baj mag chokruog-distrikt ema ibiro ti godo kaka gir ng’eyo joma onego omi kar keto mtoka. To nikech kuonde chungo mtokni thoro bedo matin, onego joma wuok kamoro achiel oti gi mtoka achiel ka digiromie, moloyo biro gi mokalo achiel.
◼ Mako Kom: Inyalo mako kombe mana ne jogo ma wuotho kodi e mtoka achiel kata ne joma idak godo a ot achiel.
◼ Chiemb Odiechieng’: Wakwayi mondo iting’ chiemb odiechieng’ moloyo wuok kar chokruok ni idhi manyo chiemo seche mag yueyo. Ng’ato nyalo tiyo gi gir ting’o chiemo manyalo romo e bwo kome. Gik madongo mag ting’o chiemo, gik molos gi glas, koda kong’o ok oyie ne ng’ato birogo kar chokruok.
◼ Chiwo mag Pesa: Pesa mang’eny itiyo godo e miyo chokruog-distrikt otimre. Wanyalo nyiso ni waduoko erokamano ka wagolo chiwo ne tich ma dhi nyime e piny mangima, kendo wanyalo timo kamano ka wan e Od Romo marwa kata e chokruog-distrikt. Chiwo mag pesa michiwo kitiyo gi chek e chokruog-distrikt onego oketie nying’ riwruok ma Joneno tiyo godo e pinyu.
◼ Aksident Koda Gik Matimore Apoya: Ka nitie gima otimore apoya madwaro ni mondo ng’ato oyud thieth mapiyo ka en e chokruog-distrikt, nyisuru achiel kuom joruak-welo man machiegni mondo oter wach sano sano ne joma ochung’ ne migawono, mondo jal mowinjore moseket one gima inyalo tim mondo ochiw kony madwarore. Ka ochuno, to inyalo ter ng’ato e osiptal man machiegni.
◼ Joma Itgi Ok Winj Mayot: Program ibiro winj bende e redio mar FM e alwora mag kuonde chokruog-distriktgo. Mondo ng’ato oti gi chenroni, biro dwarore mondo oting’ rete moro matin mamako FM kaachiel gi spika matindo miketo e it.
◼ Mako Weche e Tep: Rete mag mako weche e tep ok onego ochuogi e sitima mar kama itimoe chokruogno kata tude gi masin mar thum mitiyogo e chokruok, kendo inyalo mana ti kode e yo mamiyo ng’ato ok chand jomoko.
◼ Modhi Manigi Suya: Nitie chokruoge moko mag distrikt mitimo kuonde mogeng’ore kama yamo mikwadho gi masin ema tiyoe. Kuom mano, en gima biro nyiso ng’wono ka ok wati mang’eny gi modhi magolo suya ahinya manyalo chando jogo ma nigi tuoche mag kor.—1 Kor. 10:24.
◼ Fom mag Manyo Ji: Fom mar Tafadhali Fuatia Upendezi (S-43) onego oti godo e chiwo weche kuom ng’at moro amora morwako wach bang’ ka oselendne e yo ma ne ok ochan e kinde chokruog-distrikt. Jolendo onego oting’ fomgo achiel kata ariyo sama gidhi e chokruog-distrikt. Fomgo bende biro yudore Kar Migawo mar Buge. Fom ma osepong’ iye maber inyalo ter kar Migawo mar Buge kata miyo jagoro bang’ dok e kanyaklau.—Ne Tijwa Mar Pinyruoth mar Februar 2005, ite mar 6.
◼ Kuonde Chiemo: Kuonde mang’eny michieme, ji thoro weyo gimoro matin mar erokamano ne jotich kaluwore gi kaka olosgi.
◼ Otende: (1) Koyie kik imak kuonde nindo mokalo mago ma ibiro tiyogo, kendo kik iwe ji mokalo kwan moketi onind e odno. (2) Kochuno ni nyaka ilok chenro ma ne iseketo mar mako kar nindo, nyis weg otel gie sechego. (3) Kaw gir dhiro osike ei otendno mana ka iikri mar tiyo kode, kendo iduoke mapiyo mondo jomoko bende oti kode. (4) Kik ited e ot kama ok oyienie timo kamano. (5) Ne ni iweyo gimoro matin ne jal malero ot, pile ka pile. (6) Kaka Jokristo, kuom adier ok wabi ketho chiemo momiwa gokinyi kaka chae, kahawa, koda mamoko michiwo ne welo ka gin e otendno. (7) Kinde duto, nyis nyak mar roho kitudori gi jotich manie otendno. (8) Ka wach moro marach oneno e ot ma omiyino, ne ni inyiso owete ma tiyo Kar Migawo mar Kuonde Nindo sama in e chokruok.