Pok Giweyo Chiwo Neno
1 Nying ma watiyogo ni Joneno mag Jehova, nyiso tich ma watimo. Wachiwo neno e wi Nyasachwa ma en Jehova. (Isa. 43:10, 12) Ng’ato ang’ata ma dwaro bedo Janeno mar Jehova nyaka chiw neno e wi Nyasaye. Yore ma wachiwogo neno en kuom lando wach maber e ot ka ot, e nderni, dok limo joma orwako wach, kendo tayo puonjruok mag Muma. Waduto ijiwowa mondo wachiw neno e okang’ momedore.—1 Kor. 15:58.
3 Manyo Yore mag Lendo: Nitie jolendo mang’eny ma ok oseweyo mondo pek ma gikaloe omon-gi chiwo neno. Gisemanyo yore mopogore opogore mag chiwo neno. Jogo ma ok nyal wuok e ot lendo ka gitiyo gi simo. Bende, gitemo lendo ne ng’ato ang’ata mobiro limogi. Kata obedo ni nyalo bedo matek ne nyaminwa lendo ne joode nikech gikwede, onyalo lendo ne jirendene kata jomamoko ma oromogo sama en e dijene.
4 Jonyuol ma ok gin Joneno nyalo tamo nyathigi kik odhi e tij lendo. Kar mondo nyathigino one ni koro ok onyal lendo chuth, pod onyalo lendo ne joskul wetene kata jopuonj kendo chako puonjruok mar Muma kodgi. Jolendo moko ma odak e gwenge mosokore osechiwo neno kuom ndiko ne ji barua. Jogo duto ma nigi kinda biro manyo yore mag lendo ma biro miyo kik gibed ‘joma budho abudha nono kata ma onge nyak kuom wach ng’eyo malong’o ma gisebedogo e wi Ruodhwa Yesu Kristo.’—2 Pet. 1:8.
5 Jehova oseketnwa gima waduto onego watem timo sama walendo, ma en ni watine ‘gi chunywa duto.’ (Kol. 3:23) Kata obedo ni thuolo ma watiyogo e tij lendo ok chalre, kendo nyak ma wayudo bende opogore opogore, gima duong’ ma jiwowa waduto en hera ma wanyiso nikech wachiwore gi “chuny modimbore,” tiende ni gi chunywa duto. (1 We. 28:9; 1 Kor. 16:14) Sama watimo duto mwanyalo, ok wabi bedo gi paro mar ni waonge yie, kata ni wan joma nono ei kanyakla nikech watimo matin kopim gi jomamoko. Wan bende wabiro wacho kaka Paulo ni ‘ne ok waweyo yalo ne ji weche duto ma ne nyalo konyogi kendo puonjogi e lela.’—Tich 20:20.