‘Hul Wach Maber’ Chuth —Kilendo e Gorofe ma Ji Mang’eny Odakie
1. ‘Hulo wach maber’ chuth oriwo lendo kuonde mage?
1 Mana kaka jaote Paulo, gombowa en ‘hulo wach maber’ chuth. (Tich 20:24) Omiyo watimo matek mondo waland wach Pinyruoth ne ji mang’eny kaka nyalore e alworawa. Ma oriwo nyaka lendo e gorofe ma ji mang’eny odakie kanyachiel. Seche moko, nyalo bedo matek mondo oyienwa donjo mondo walend ne joma odak e gorofe ma kamago. Kata kamano, bedo ni ji mang’eny dak e gorofe ma kamago, miyowa thuolo malach mar lando wach maber.
2. Ang’o momiyo rieko kod ng’ado paro e yo maber dwarore e sama walendo e gorofe?
2 Kuonde moko manyalo bedo gi jomecho kata jomahundu, gorofe mang’eny ithoro goyo rangeyegi kiful kendo gin gi jorit. (2 Tim. 3:1, 2) Joma ochung’ne gorofe ma kamago nyalo keto chik ni joma gikiya ok oyienegi donjo. Maneja mochung’ ne kanyo kata ng’at moro amora marito kanyo, nyalo wachonwa mondo wawuogi, to moloyo ka achiel kuom joma odak kanyo obedo gi ng’ur moro. Kuom mano, tiyo gi rieko kendo ng’ado paro e yo maber en gima dwarore.
3. Gin seche mage mowinjore ahinya lendo e udi manie gorofe, to nikech ang’o?
3 Lendo e Seche Mowinjore: Mana kaka onego otim e alwora mamoko, ber lendo e gorofe ma kamago seche ma weg udi nyalo yudore. Ji nyalo chich kodwa ka ginenowa e gorofego sama thoth weg udi onge. Thoth jolendo osebedo ka nwang’o ji e utegi ka gilendo seche mag odhiambo bang’ tich kaachiel gi Ngeso kod Jumapil godhiambo. Weg udi nyalo ng’ur ne maneja kapo ni walendo e seche mag okinyi ahinya e gorofe ma ji mang’eny odakie, to moloyo e giko juma.
4, 5. Ere kaka wanyalo donjo e gorofe ma ji mang’eny odakie, ma olor rangeyegi?
4 Kaka Wanyalo Donjo: Jolendo ok onego kwa rusa kuom ng’ato ang’ata marito gorofego kapok gichako tij lendo. Ka rangach mar gorofa olor to nitie simo mar intercom e dho rangano, wanyalo tiyo gi simono mondo wayud ng’at moyie wuoyo kodwa. Bang’ wuoyo gi jal momiyowa thuolo mar donjo, wanyalo timo lendo mar ot ka ot e udi mamoko manie gorofano kaluwore gi kaka udigo obet. Kata kamano, nitie kinde mowinjore wawuog oko mar gorofano, kae to wawuo gi wuon ot machielo ka watiyo gi simo mar intercom. Onego wati gi paro maber e ng’ado ni gin ji adi modak kanyo mwanyalo losogo e yo ma kamano e limbe achielni.
5 Jomoko modak kanyo nyalo hero mana ni inyisgi wach mokeli kitiyo gi simo mar intercom. Ka en kamano, to ifulri negi e yo maber. Ti gi nying wuon ot kapo ni nyinge ong’ere. Nyis wach ma iwuoyoe achiel ka chiel, kendo e yo machuok. Jomoko osenwang’o ber mar chako wuoyo ka gisomo bug Kutoa Sababu kaka ondike.
6. Ang’o mwanyalo timo seche mwalendo e gorofe ma nigi jarit e rangach?
6 Ka gorofano nigi jarit ma ok yienwa donjo mondo walend ne weg udigo, wanyalo temo lendone. Jorit mathoth ohero somo bugewa. Wanyalo kata chako kendo timo puonjruok mar Muma e rangach kanyo. Ka jarit moro omiyowa thuolo mar loso gi wuon ot achiel morwako wach, ok nyal bedo maber ka kinde duto watemo wuoyo gi joma moko e gorofano e thuolo kaka mano.
7. Ofuko mwalendogo onego obed machal nade?
7 Kaka Wanenre gi Oko: Ting’o, ofuke madongo mag lendo nyalo miyo ji ochak ng’iyowa ahinya. Omiyo, ber ka wating’o mana ofuko moro matin e yor rieko, kata weyo ma ok wating’o ofuko moro amora. Jolendo moko keto buge milendogo e fail moro matin kendo giting’o Muma e lwetegi kata e ofuko mar nanga.
8. Ere kaka inyalo iki grup ne lendo mar udi manie gorofa?
8 Nyalo bedo maber ka ok wachokre kamoro, to moloyo, seche ma wan kuonde ma ji donjogo, kuonde michungoe mtokni, kata e ndara, mamiyo ji ng’iyowa ahinya. Onego wabed motang’ seche ma walendo e gorofe man kuonde ma timbe mahundu ng’enyie. (Nge. 22:3) Kuom ranyisi, grube ariyo kata adek ma nigi jolendo ariyo ariyo nyalo lendo kanyachiel ka gin e udi man piny kata ma diere mag gorofa ka giwilore e duong’o dhoudi, ka jolendo moko ritogi.
9. Ere kaka wanyalo nyiso tim maber, to ang’o momiyo mano dwarore ahinya?
9 Sama ilendo e udi manie gorofa, ywe wuocheni kendo ne ni iloro dhoot e yo maber kidonjo kata kiwuok. Seche mwanyiso timbe mabeyo kaka mago, wagolo gik manyalo miyo joma odak kanyo ong’ur. Ka usedonjo ei gorofa, dhiuru achiel kachiel e udi monego ulendie e gorofano kar wuotho awuotha kuonde midonjogo. Timo mano nyalo golo chich moro amora ma joma nenowa nyalo bedogo.
10. Ere kaka wanyalo lendo ma ok wago koko sama wan e gorofa?
10 E gorofe mathoth, duond ji winjore ka koko maduong’. Omiyo, wuo gi dwol ma wuon ot ma un-go ema winjo. Seche ma iwuoyo gi jolendo mamoko, wuo gi duol ma piny, kendo iwuo mos e yo mamiyo ji ok chich kodi. Mondo omi joma odak kanyo kik ne marach, jolendo moko nyalo lendo ka giwilore e duong’o dhoudi, nyaka gichop e dhoot mogik, kar duong’o dhoudi kaluwore. E wi mano, duong’o dhoot matek nyalo miyo weg udi luoro.
11. Gin paro mage manyalo konyo sama wadwong’o dhoot ma nigi kar ng’icho?
11 Kapo ni nitie kar ng’icho ma wuon ot nyalo nenougo, ber ka uchung’ e yo monyalo nenougo uduto. Ng’i kar ng’ichono moriere, kendo kapo ni ineno ka ng’ato ng’iyou, unyalo mose gi mor kendo chiwone wach ma un-go. Ka wuon ot openjo ni, ‘Mano ng’a?’ nyalo bedo maber ka ihulo nyingi kod nying jal ma ulendogo. Wuon ot koro ok nyal luor ahinya yawonu. Ka ok oyawo, pod unyalo chiwone achiwa wach ma un-go gie dhoot.
12. Ere kaka wanyalo geng’o chandruok seche ma waweyo bugewa e udi ma ok wayudoe ji?
12 Udi ma Ji Onge: Joma rito udi mag gorofe thoro ng’ur ni chunogi kwanyo bugewa ma giyudo ka oke e alwora mag utego. Buge ma owe e dhoudi ma ji onge, nyalo lwar piny ma bed yugi ma chido kamoro. Kuom mano, buk moro amora ma owe e udi ma ji onge onego oket kama joma kadho ok negi kata matin.
13. Onego watim ang’o ka wayudo weg udi ma okecho?
13 Weg Udi ma Okecho: Ka waromo gi wuon ot moro ma iye owang’ kendo madwaro luongonwa jal marito gorofano, ber wuok kanyo kendo rito duogo chieng’ machielo. Nitie kinde manyalo bedo maber wuok e gorofano chuth moloyo rito koko manyalo wuok kuom jal marito kanyo. Kata bed mana ni wuon odno ok owachonu achiel kachiel ni kik udogi e ode, nyalo bedo maber ka undiko namba gorofano piny kaka kama ok onego olendie, kendo kete e kad mar alwora mar lendo. Mana kaka onego otim kuonde moko ma ok onego duog lendoe, inyalo non kuonde ma kamago kinde ka kinde mondo one paro ma weg udigo koro nigo.
14, 15. Ang’o ma onego watim kapo ni jal marito gorofa mwalendoe owachonwa ni wawuogi?
14 Ka Owachni ni Iwuogi: Kapo ni seche ma ilendo to moro amora kuom joma rito kanyo, owachoni ni iwuogi, ber ka iwuok mapiyo. Kanyalore, ber ka watemo mondo kik wadonj e ywaruok ma ginyalo kelo, ka gibuogowa ni ginyalo donjonwa kata luongonwa polis. Kuonde mathoth, joma rito udi mag gorofe ok ochayo Joneno mag Jehova mak mana ni gitiyo tich ma ondikgi mondo giti.
15 Nitie kinde ma ka ng’at ma rito kanyo owachoni ni iwuogi, inyalo lerone e yo mamuol kendo kitiyo gi rieko kinyise gimomiyo itimo limbe. (1 Pet. 3:15) Wang’eyo maber ni tije en mar rito joma odak kanyo kendo rito udigo maber. Dipo ka omiyi thuolo mondo idhi nyime gi lendo kanyo. To ka oramo ni nyaka iwuogi kanyo, nyalo bedo maber ka iwuok ma ok imin wach. Kapo ni en gima nyalore, kwa thuolo mondo kinde ka kinde iwe ne joma odak kanyo bugewa, kiketogi kama ji donjogo kata e ofis manyalo bedo kanyo. (Kol. 4:6) Onego onyis jarit tij lendo weche ma kamago.
16. Ang’o monego watim kapo ni chandruok podi dhi nyime sama watemo lendo e udi manie gorofe?
16 Kapo ni nyalore, bang’ kinde moromo, jolendo nyalo tiyo gi rieko e temo dok lendo kanyo. Kata kamano, ka chandruoge moko podi dhi nyime, jodongo onego okwa ofis kony kar weyo jolendo ema otem loyo chandruogego gin giwegi. Kapo ni donjo e gorofano ok nyalre, pod inyalo tim kinda mar lendo ne weg udi ma kanyo kitiyo gi yore mamoko, kaka lendo mar simo kata barua. Jolendo moko nyalo lendo e ndara manie nyim gorofego kata man machiegni gi gorofego e seche mag okinyi kod odhiambo, magin seche mayudo ka thoth ji dhi tich kata dok e utegi.
17. Ang’o momiyo lendo e gorofe dwarore ahinya?
17 Giko mar piny marachni okayo machiegni. Jogo kende ma luongo nying Jehova ema ibiro resi. “To ji diluong nadi jal ma pok giyie kuome? Kendo, digiyie nadi jal ma pok giwinjo kuome?” (Rumi 10:13, 14) Nitie ji mathoth ‘ma chunygi oikore ne ngima mochwere’ modak e gorofe. (Tich 13:48) Ka watiyo gi rieko kendo ng’ado paro e yo maber, wanyalo miyo joma kamago owinj wach maber.