Be Ibiro Bedo Jakinda Kaka Jehova gi Yesu e Kinde mag Rapar?
1. Ang’o momiyo Joneno mag Jehova medoga kindagi e tij lendo e kinde mag Rapar?
1 Jehova en jakinda e chopo dwarone. Bug Isaiah 9:7 wacho kama e wi moko kuom gueth ma Pinyruodh Nyasaye biro kelo: “Jehova mar ogendini mag lueny notim ma kuom kindane.” Wuod Nyasaye bende notiyo ne Nyasaye gi kinda ka en e piny. (Joh. 2:13-17; 4:34) Higa ka higa e kinde mag Rapar, jolendo tara gi tara e piny mangima medoga kindagi e tij lendo ka giluwo ranyisi mar Jehova gi Yesu. Be in bende ibiro medo kindani e kinde Rapar?
2. Kinda biro miyo watim ang’o chakre Mach 14?
2 Kampen mar Gwelo Ji e Rapar: Kampen mar gwelo ji e Rapar ma higani biro chakore chieng’ Ngeso, Mach 14. Chak chano sani kaka ibiro medo kindani e tij lendo. Kanyakla mang’eny biro bedo modich ka gigwelo ji mang’eny kaka nyalore e alworagi duto. Tim kinda mondo igwel jotich weteni, joskul weteni, wedeni, kod joma idok limo kitiyo gi kalatas migwelogo ji e Rapar kata kitiyo gi Websaitwa mar jw.org/luo.
3. Ere kaka wanyalo medo seche mwatiyogo e tij lendo e dwe mar Mach gi April?
3 Bedo Painia Makonyo: Kinda bende biro miyo wamed thuolo ma watiyogo e tij lendo. Ji mang’eny biro bedo jopainia makonyo e dweche mag Mach gi April nikech gibiro yudo thuolo mar yiero ka digiher lendo kuom seche 30. E lamou mar joot kata e puonjruok mari iwuon, kwa Jehova mondo okonyu neno kaka unyalo riwo chenroni lwedo. (Nge. 15:22) Wuoyo gi jomamoko e kanyakla e wi chenro ma in-go nyalo jiwogi mondo gimed kindagi. Ka itimo lokruoge moko mondo imed seche mitiyogo e tij lendo, ibiro bedo jakinda kaka Yesu.—Mar. 6:31-34.
4. Bedo jokinda kaka Jehova gi Yesu kelo gueth mage?
4 Wabiro yudo gueth mogundho ka wabedo jokinda kaka Jehova gi Yesu e kinde mag Rapar. Wabiro yudo thuolo mar lendo ne ji mang’eny e alworawa. Wabiro bedo gi mor kod chuny mokuwe nikech watiyo ne Jehova kendo nikech wachiwo thuolowa mondo wakony jomamoko. (Tich 20:35) To moloyo duto, wabiro moro Nyasaye kod Wuode ma gin jokinda.