Bed gi Chuny Mopong’ gi Mor e Kinde Rapar!
1. Achiel kuom gik manyalo medo morwa e dweche mag Mach, April, kod Mei en ang’o?
1 Be diher medo morni e dweche mag Mach, April, kod Mei? Achiel kuom gik manyalo konyi timo mano en lendo e okang’ momedore e dwechego, to ahinya wuon ka ibedo painia makonyo. Mano biro keloni mor e yo mane?
2. Ang’o momiyo wanyalo wacho ni lendo e okang’ momedore e kinde Rapar biro medowa mor e tijwa?
2 Med Morni: Jehova Nyasachwa nochweyowa gi nyalo mar bedo gi mor, ilo, kod chuny mokuwe sama watiyone kendo dich e weche motudore gi lamo. (Math. 5:3) Nochweyowa bende gi nyalo mar bedo mamor sama wakonyo jomamoko. (Tich 20:35) Par ni e tijwa mar lendo, watiyo ne Jehova kendo wakonyo jomamoko. Ka tiyo ne Jehova kendo konyo jomamoko kelo mana mor lilo, to nade sama watimo mano e okang’ malach, donge onego bed ni morwa bende medore e okang’ malach moloyo? Kwanono donjo mana kende. Nitie ber mamoko ma bende wayudo sama walendo e okang’ momedore. Kuom ranyisi, kaka wamedo lendo e kaka wamedo bedo molony. To kaka wamedo bedo molony e kaka wamedo loyo luoro ma wanyalo bedogo. E wi mago, lendo e okang’ momedore miyowa thuolo momedore mag nyiso ji adiera kendo chako puonjruok mag Muma. Bergi duto medowa mana mor e tijwa.
3. Ang’o momiyo Mach gi April biro bedo mowinjore ndi gi bedo jopainia makonyo?
3 Dweche mag Mach gi April biro bedo mowinjore ndi gi bedo jopainia makonyo nikech e dwechego wabiro bedo gi thuolo mar yiero lendo kuom seche 30 kata 50. Bende, chakre chieng’ Ngeso tarik 22 dwe mar Mach ka dhi nyime nyaka odiechieng Rapar ma en chieng’ Wuok Tich tarik 14 dwe mar April, wabiro timo kampen mar gwelo ji e Rapar. Jolendo duto e piny ngima biro bedo gi ilo sama gitiyo kanyachiel “gi chuny achiel” e neno ni gigwelo ji mang’eny kaka nyalore e kinde kampendno.—Zef. 3:9.
4. Ka wadwaro bedo jopainia makonyo e kinde Rapar, ang’o monego watim?
4 Chak Ikori Sani: Kapo ni pok ichako ikori ne lendo e okang’ momedore e kinde Rapar, non chenroni sani mondo ine ane lokruoge minyalo timo mondo thuolo makendeno kik bayi. Inyalo bedo painia makonyo dwe achiel kata mokalo kanyo. Ket wachno e lamo. (Jak. 1:5) Wuo gi jomamoko e odu kod e kanyaklau. (Nge. 15:22) Inyalo fwenyo ni kare kata obedo ni samoro in gi midekre kata tij yuto odiyi ahinya, pod inyalo bedo painia makonyo. Mano biro keloni mor mogundho.
5. Ka walendo e okang’ momedore e kinde Rapar, ber mage ma biro betie?
5 Jehova dwaro ni jotichne obed mamor. (Zab. 32:11) Omiyo, ka walendo e okang’ momedore e kinde Rapar, morwa biro medore. To gimaber moloyo en timo mano biro kelo mor kod ilo ne Jehova ma en Wuonwa manie polo.—Nge. 23:24; 27:11.