Kinde mag Rapar En Thuolo mar Lendo e Okang’ Momedore!

1. Ang’o mabiro miyo walend e okang’ momedore e dweye mag Mach, April, kod Mei?

¹ Be inyalo lendo e okang’ momedore e kinde mabiro mag Rapar? Kindego biro yudo ka jolendo moko nie rusa mar tich kata mar skul, omiyo ginyalo tiyo gi thuolono e lendo. Chakre April 2, wabiro timo kampen makende mar gwelo joma orwako wach e Rapar ma notim April 17. Bang’ mano, wabiro timo kinda mar konyogi kendo gwelogi e twak makende mibiro gol juma machakore April 25. Kuom adier, nitie gik mang’eny manyalo miyo walend e okang’ momedore e dweye mag Mach, April, kod Mei.

2. En yo mane maberie moloyo mwanyalo lendogo e okang’ momedore?

² Bedo Painia Makonyo: Yo achiel maberie moloyo mwanyalo lendogo e okang’ momedore en bedo painia makonyo. Nikech waduto wadich, chenro ma kama dwaro ikruok chon kendo timo lokruok moko madwarore. (Nge. 21:5) Samoro inyalo chano mar weyo timo gik maok ochuno ahinya e chenroni mapile kuom kinde mondo iyud thuolo momedore. (Fili. 1:​9-​11) Donge nyalo bedo maber kinyiso jomamoko e kanyakla kuom chenro mitimo mondo ibed painia makonyo mondo gin bende giriwi lwedo ka mano nyalore?

3. Ere kaka joot nyalo timo chenro mondo gilendi e okang’ momedore?

³ Nyalo bedo maber ka uwuoyo kuom chenro ma un-go kaka joot e Lamo mar Joot maluwo. (Nge. 15:22) Kapo ni joot duto oriwo chenrono lwedo, moko kuomgi nyalo bedo jopainia makonyo e dwe achiel kata mokalo kanyo. To nade ka mano ok nyalre? Joot podi nyalo timo chenro mondo gilendi godhiambo kata lendo seche momedore e giko juma.

4. Gin gweth mage mwabiro yudo kuom lendo e okang’ momedore e kinde mag Rapar?

⁴ Jehova neno chenro duto mwatimo mondo watine kendo omor ahinya gi chiwruokwa. (Hib. 6:​10) Wayudo mor ka wachiwore ne Jehova kod jomamoko. (1 Weche 29:9; Tich 20:35) Be inyalo lendo e okang’ momedore e kinde mag Rapar mondo iyud mor kod gwedh?